<p><span style="color: #000000; font-size: 12px;">(សេអ៊ូល)៖ មេដឹកនាំកំពូលផុតលេខរបស់កូរ៉េខាងជើងលោក គីម ជុងអ៊ុន បានបង្ហាញចំណាប់អារម្មណ៍ ក្រោយពីប្រទេសរបស់លោក ធ្វើតេស្តសាកល្បងបាញ់គ្រាប់មីស៊ីល រយៈចម្ងាយមធ្យមប្រកបដោយជោគជ័យនោះថា «គ្រាប់មីស៊ីលផ្លោងរយៈចម្ងាយមធ្យម ដែលប្រទេសយើងបានផលិត» បង្ហាញច្បាស់ថាឥឡូវនេះយើងមាន សមត្ថភាពអាចវាយប្រហារទឹកដីនានារបស់អាមេរិក នៅតំបន់ប៉ាស៊ីហ្វិកបាន។ នេះបើតាមការចេញផ្សាយមុននេះបន្តិច ដោយ Channel News Asia នាព្រឹកថ្ងៃព្រហស្បតិ៍ ទី២៣ ខែមិថុនា ឆ្នាំ២០១៦។</span></p>
<p><br /><a class="thickbox" title="" href="/FileManager/Commons/2016/6/23/23-23-06-2016--11-27-02.jpg"><img src="/FileManager/Articles/mce/2016/6/23/23-23-06-2016--11-27-02.jpg" alt="" /></a></p>
<p><span style="color: #000000;">មន្ត្រីយោធាកូរ៉េខាងត្បូង និងសហរដ្ឋអាមេរិក បានថ្លែងបន្ទាប់ពីការបាញ់សាកល្បងគ្រាប់មីស៊ីល របស់កូរ៉េខាងជើង នោះថា តាមពិតទៅមីស៊ីលទាំងពីរគ្រាប់ ដែលកូរ៉េខាងជើងបានបាញ់ ដែលទីមួយបានទទួលបរាជ័យ និងលើកទីពីរ ទទួលបានជោគជ័យនោះ គឺជាប្រភេទរយៈចម្ងាយជិត តែដាក់ឈ្មោះថា Musudan ដ៏មានឥទ្ធិពល។ ទោះបីជាកូរ៉េខាងជើងអះអាងថា លើកចុងក្រោយ បានទទួលជោគជ័យក្តី ក៏យោធាអាមេរិក និងកូរ៉េខាងត្បូង បានបកអាក្រាតថា កូរ៉េខាងជើងបានទទួលបរាជ័យទៅវិញទេក្នុងការបាញ់ ទាំងពីរលើកកាលពីថ្ងៃពុធ ម្សិលមិញ។</span></p>
<p><span style="color: #000000;">គួរបញ្ជាក់តាម របាយការណ៍ពីក្រសួងការពារជាតិកូរ៉េខាងត្បូងថា ការបាញ់មីស៊ីលលើកទីពីរក្នុងថ្ងៃតែមួយ ដែលកូរ៉េខាង ជើង អះអាងថាបានទទួលជោគជ័យនោះ គឺហោះបានរយៈចម្ងាយ ៤០០ គីឡូម៉ែត្រ រួចក៏ធ្លាក់ចូលទៅក្នុងទឹកសមុទ្រ។ យ៉ាងណាក៏ដោយ សារព័ត៌មានរដ្ឋកូរ៉េខាងជើង KCNA បានចេញផ្សាយថា ខ្លួនបានធ្វើតេស្តសាកល្បងនេះ ដោយទទួលបានជោគជ័យធំធេង ហើយថែមទាំងមិនបានបង្កការគំរាមកំហែងណាមួយ ដល់ប្រទេសជិតខាងនោះឡើយ៕</span></p>
<p style="text-align: right;"><span style="color: #000000;">ប្រភព ៖ CNA</span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>