<div class="article-content">
<p><strong>ភ្នំពេញ៖</strong> នារីជនជាតិ វៀតណាមម្នាក់ ដោយសារឥទ្ធិពល គ្រឿងញៀន ចូលខ្លួនច្រើនពេក បាត់បង់ស្មារតី បានដើររើសដំថ្ម គប់កញ្ចក់រថយន្ត មន្ត្រីភូមិបាល ខណ្ឌដង្កោ ដែលចតនៅមុខ ការិយាល័យភូមិបាល ដែលមាន ទីតាំងស្ថិតនៅក្នុងបុរី ចំការដូង ភូមិសំបួរ សង្កាត់ដង្កោ ខណ្ឌដង្កោ បណ្តាលឲ្យបែក ចំនួន៣ផ្ទាំង កាលពីវេលាម៉ោង ១៥និង៥០នាទី រសៀលថ្ងៃទី២៣ ខែមករា ឆ្នាំ២០១៤។</p>
<p>សមត្ថកិច្ចប្រាប់ឲ្យដឹងថា នារីជនជាតិវៀតណាម ដែលបែកថ្នាំនោះ មានឈ្មោះ ថាន់ អាយុ២២ឆ្នាំ មិនមាន អាស័យដ្ឋាន ពិតប្រាកដនោះទេ គឺម្តងដើរដេកទីនេះ ហើយម្តងដើរដេកនៅទីនោះ ។</p>
<p>ប្រភពព័ត៌មាន ពីសមត្ថកិច្ច ប្រាប់បន្តថា នារីជនជាតិវៀតណាមនោះ កាលពីមិនទាន់ញៀនថ្នាំ គឺរូបគេបាន មកជួយលក់កាហេ្វ ជាមួយពូម្នាក់ ប៉ុន្តែមិនមែនជាសាច់ ញ្ញាតិនោះទេ នៅក្នុងសង្កាត់ ដង្កោ លុះដល់ពេល ដើរលេងច្រើនពេក សេពគប់មិត្តភក្រ័មិនល្អ នាំគ្នាជក់គ្រឿងញៀន រហូតកែ ខ្លួនលែងបាន ទើបពូម្នាក់នោះ លែងឲ្យចូលផ្ទះ ក៏ដើរដេកត្រង់នេះខ្លះ និងត្រង់នោះខ្លះ ។ ដោយ ពេលខ្លះ ថ្នាំញៀនធ្វើទុកខ្លាំងពេក ក៏ដើរ វាយបំផ្លាញទ្រព្យសម្បត្តិ បងប្អូនប្រជាពលរដ្ឋ ក្នុងភូមិ ជាច្រើនលើក ច្រើនសាររួចមកហើយ ។ ប៉ុន្តែមាន ពេលខ្លះ ក៏ត្រូវម្ចាស់របស់ប្តឹង សមត្ថកិច្ចដែរ តែមិនដឹងជាធ្វើយ៉ាងម៉េច ក៏ដោះលែងទៅវិញ។</p>
<p>សមត្ថកិច្ច ប្រាប់បន្ថែមទៀតថា លុះដល់ថ្ងៃកើតហេតុនេះ មិនដឹងជាគាត់ដើរមកពីទីណានោះទេ ស្រាប់តែរើសដំថ្មមកគប់លើកញ្ចក់រថយន្ត របស់មន្ត្រីភូមិបាល ខណ្ឌដង្កោ ដែលចតនៅមុខការិយាល័យភូមិបាល ដែលមានទីតាំងស្ថិតនៅក្នុងបុរី ចំការដូង ភូមិសំបួរ សង្កាត់ដង្កោ ខណ្ឌដង្កោ បណ្តាលឲ្យបែក ចំនួន៣ផ្ទាំង គឺកញ្ចក់ផ្នែកខាងមុខ មួយផ្ទាំង និងកញ្ចក់ទ្ចារ រថយន្តខាងឆ្វេងចំនួន ពីរ ផ្ទាំងទៀត ហើយក្រោយពីបង្ក ហេតុ នារីជនជាតិវៀតណាម ដែលញៀនថ្នាំនោះ ក៏ត្រូវបាននាំយកមកទីស្នាក់ប៉ុស្តិ៍ដង្កោ ដើម្បីធ្វើការ សួរនាំ ។</p>
<p>ជាមួយនេះដែរលោក លត់ ឃីម នាយប៉ុស្តិ៍នគរបាល រដ្ឋបាលដង្កោ ប្រាប់ឲ្យដឹងថា ក្រោយពីធ្វើការសួរនាំ នារីខាងលើត្រូវបាន ដឹកបញ្ជូនយកទៅ មន្ទីរសង្គមកិច្ច រាជធានីភ្នំពេញ បន្ទាប់ពីទទួលបាន យោបល់ពី ថ្នាក់លើ៕</p>
<p style="text-align: center;"><img src="http://image.dap-news.com:81/dap-news/dap-images/2014/january/id-011/Hong-0549.jpg" alt="" width="500" /></p>
<p style="text-align: center;"><img src="http://image.dap-news.com:81/dap-news/dap-images/2014/january/id-011/Hong-0550.jpg" alt="" width="500" /></p>
<p style="text-align: center;"><img title=" " src="http://image.dap-news.com:81/dap-news/dap-images/2014/january/id-011/Hong-0551.jpg" alt="" width="500" /></p>
<p style="text-align: right;">ផ្តល់សិទ្ធិដោយ៖ <a href="http://www.dap-news.com/2011-06-14-02-39-55/79756-2014-01-24-08-10-16.html"><span style="color: #0000ff;">ដើមអំពិល</span></a></p>
</div>