<div class="article-content">
<p><strong>កណ្ដាល ៖</strong> ដោយអនុវត្ត តាមគោលនយោបាយភូមិ ឃុំ មានសុវត្ថិភាព និងទទួលបញ្ជា ពីអធិការស្រុក ក្នុងការបង្រ្កាប និងទប់ស្កាត់បទល្មើស ក្នុងភូមិមូលដ្ឋានរបស់ខ្លួននោះ នាយនគរបាលប៉ុស្ដិ៍រដ្ឋបាលឃុំគគីរ ដឹកនាំដោយលោក ព្រំ សំណាង បានកោះហៅអ្នកកត់កន្ទុយលេខ និងកត់ភ្នាល់បាល់ នៅក្នុងផ្សារគគីរ មក ធ្វើកិច្ចសន្យាបញ្ឈប់សកម្មភាពជាបន្ទាន់ ។</p>
<p>ជាក់ស្តែង កាលពីថ្ងៃទី២៥ ខែកុម្ភៈ ឆ្នាំ២០១៤ នគរបាលប៉ុស្តិ៍ បានធ្វើការកោះហៅ ក្រុមអ្នកកត់កន្ទុយ លេខ និងបាល់ ភ្នាល់ដាក់លុយឲ្យមកធ្វើកិច្ចសន្យា បញ្ឈប់សកម្មភាពរបស់ពួកគេ។</p>
<p>លោក ព្រំ សំណាង មេប៉ុស្ដិ៍ឃុំគគីរ បានឲ្យដឹងថា ក្នុងប្រតិបត្តិការចុះហាមឃាត់ ឈានដល់ការនាំខ្លួនអ្នក កត់កន្ទុយលេខ អ្នកកត់ភ្នាល់បាល់នោះ មានឈ្មោះ ងោង សំអាង ភេទប្រុស អាយុ៥២ឆ្នាំ រស់នៅភូមិកោះប្រាក់ ឃុំភូមិធំ ដែលលួចរកស៊ីកត់កន្ទុយលេខ និងបាល់ នៅក្នុងផ្សារគគីរ ឲ្យមកធ្វើកិច្ចសន្យា បញ្ឈប់ជា បន្ទាន់ ព្រោះគាត់មិនព្រមបញ្ឈប់ និងរឹងរូសចំពោះចំណាត់ការរបស់សមត្ថកិច្ច ។ លោកថា បើនៅតែបន្ត សកម្មភាពទៀត លោកនឹងចាត់វិធានការតាមផ្លូវច្បាប់ ។</p>
<p>ជាមួយគ្នាលោកមេប៉ុស្ដិ៍ ក៏បានឲ្យដឹងដែរថា លោកបានចាត់តាំងកម្លាំង ឲ្យធ្វើការស៊ើបអង្កេត ចំពោះអ្នកដែលញៀនល្បែងកន្លងមក នៅក្នុងមូលដ្ឋាន យកមកអប់រំ ហើយបើពួកគេមិនកែប្រែទេ នោះលោកនឹងចាត់ការតាមនីតិវិធី ។</p>
<p>អាជីវករ និងប្រជាពលរដ្ឋ នៅផ្សារគគីរនោះ បាននិយាយថា ចំពោះអ្នកកត់កន្ទុយលេខ អ្នកកត់ភ្នាល់បាល់ មានជាច្រើន នៅក្នុងផ្សារគគីរ មិនមែនមានតែម្នាក់នោះទេ ប៉ុន្តែពួកគាត់មិនឃើញ កោះហៅទៅដែរនោះទេ ហើយក៏មិនដឹងថា តើអ្នកផ្សេង បើកលេងដោយចំហបានជាគេមិនកោះហៅ សមត្ថកិច្ចកោះហៅតែអ្នកលួច លាក់លេង ឬយ៉ាងណា ?</p>
<p>ទាក់ទងបញ្ហានេះ លោក ប៉ា សំអិត អធិការស្រុកកៀនស្វាយ បានឲ្យដឹងថា លោកក៏បានដាក់បទបញ្ជាទៅ កាន់ប៉ុស្តិ៍ចំនួន៨ផងដែរ ដោយត្រូវតែអនុវត្ត នូវគោលនយោបាយភូមិ ឃុំ មានសុវត្ថិភាពឲ្យបានជោគជ័យ និងមានតម្លាភាព ៕</p>
<p style="text-align: center;"><img title=" " src="http://image.dap-news.com:81/dap-news/dap-images/2014/February/id-015/T-0421.jpg" alt="" width="500" /></p>
<p style="text-align: center;"><img title=" " src="http://image.dap-news.com:81/dap-news/dap-images/2014/February/id-015/T-0420.jpg" alt="" width="500" /></p>
<p style="text-align: right;">ផ្តល់សិទ្ធិដោយ៖ ដើមអម្ពិល</p>
</div>