<p><span style="color: #000000;"><strong>ភ្នំពេញ៖</strong> កំពូលតារាសម្តែង ហូលីវូដល្បីឈ្មោះ ប្រចាំប្រទេសអាមេរិក អ្នកនាង Angelina Jolie បានធ្វើដំណើរមកដល់ ទឹកដីប្រទេសកម្ពុជា ជាមួយនឹងកូនប្រុសចិញ្ចឹម របស់ខ្លួន គឺ Maddox ដែលមានវ័យ១៣ ឆ្នាំ កាលពីពេលថ្មីៗនេះ និងបានជួបជាមួយផលិតករ ជើងចាស់ លោក រិទ្ធី ប៉ាន់ ដើម្បីសិក្សាពីការថត និងប្រមូលផ្តុំឯកសារផលិតកុន ទាក់ទងទៅនឹងប្រវត្តិ នៃការឈឺចាប់ក្នុងរបប ខ្មែរក្រហម ។</span></p>
<p><span style="color: #000000;">នៅក្នុងដំណើរមកដល់ទឹកដីកម្ពុជានេះ តារាសម្តែង Angelina Jolie បានទៅទស្សនកិច្ច នៅមជ្ឈមណ្ឌល«បុប្ផាណា» ដែលជាកន្លែង ប្រមូលផ្ដុំឯកសារ និងផលិតកុនទាក់ទងនឹងខ្មែរ ក្រហមហើយ នៅក្នុងនោះអ្នកនាង ក៏បានប្រាប់ឲ្យដឹងថា ការដឹកនាំរឿងនេះ គឺផ្អែកតាមសៀវភៅ «First They Killed My Father: A Daughter of Cambodia Remembers» ដែលមានចំណងជើង ជាភាសាខ្មែរថា «ពីដំបូងខ្មែរក្រហម សម្លាប់ប៉ារបស់ខ្ញុំ» របស់ លឿង អ៊ឹង នារីខ្មែរមួយរូបរួចរស់ពីរបបខ្មែរក្រហម ហើយបានសរសេររៀបរាប់ ពីការចងចាំរបស់ខ្លួន ដែលចេញផ្សាយ កាលពីឆ្នាំ២០០០ ។ </span><br /><span style="color: #000000;">តារាហូលីវូដ ដែលនាំយកកូនកម្ពុជាទៅចិញ្ចឹម អ្នកនាង Angelina ថ្លែងឲ្យដឹងថា «ខ្ញុំមានកិត្តិយស និងមោទនភាពណាស់ ក្នុងការនាំយករឿងនេះ ខ្សែភាពយន្តនេះ ផ្អែកលើការចងចាំ ដ៏ក្ដុកក្ដួលរបស់អ្នកនិពន្ធ អ្នកនាង លឿង អ៊ឹង ដែលកាលនោះ គាត់មានអាយុ៥-៨ឆ្នាំ ។ ភាពយន្តនេះ នឹងថតចេញពីការចងចាំ របស់ក្មេងស្រីរូបនេះ វាគឺជាការ មើលឃើញ របស់កុមារម្នាក់ពីសង្គ្រាម ការយល់ និងទស្សនៈរបស់កុមារម្នាក់នោះ អំពីសង្គ្រាម»។</span></p>
<p><span style="color: #000000;">អ្នកនាង Angelina បាននិយាយបន្តទៀតថា «តាមរយៈរឿងនេះ បានធ្វើឲ្យខ្ញុំមានអារម្មណ៍រំជួលចិត្ត យល់កាន់ច្បាស់ពីអារម្មណ៍កុមារ ដែលឆ្លងកាត់ សង្គ្រាម និងត្រូវរងឥទ្ធិពល ដោយសារការចងចាំ ដ៏អាក្រក់នេះ។ ម្យ៉ាង វាបានជួយឲ្យខ្ញុំ មានអារម្មណ៍ កាន់តែស្និទ្ធស្នាលជាមួយ ប្រជាជនកម្ពុជា ដែលជាប្រទេសកំណើត របស់ Maddox កូនប្រុសខ្ញុំ។ វាជាសុបិនខ្ញុំយូរមកហើយ ដែលចង់ឲ្យសាច់រឿង ក្នុងសៀវភៅនេះក្លាយជា ខ្សែភាពយន្ត ហើយក៏ជាកិត្តិយសរបស់ខ្ញុំ ដូចគ្នា ដែលបានសហការ ជាមួយផលិតករជើងចាស់ របស់កម្ពុជា» ។</span></p>
<p><span style="color: #000000;">ក្រុមការងារ របស់តារាហូលីវូដ វ័យជាង៤០ឆ្នាំ ដែលមានរូបសម្រស់ស្រស់ ផូរផង់រូបនេះ ក៏បានបង្ហើបឲ្យដឹងទៀតថា បានរៀបចំចាប់ពី ខែកក្កដានេះទៅ ហើយនឹងចាប់ផ្ដើមថត នៅខែវិច្ឆិកា ដល់ចុងខែមករា។ ខ្សែភាពយន្តនេះ នឹងថតនៅក្នុងស្រុក ជាមួយតួសម្ដែង និងក្រុមការងារកម្ពុជា ហើយនិងនិយាយជាភាសាខ្មែរ។ ខ្សែភាពយន្តនេះ ផលិតឡើងជាមួយប្រជាជនកម្ពុជា និងដើម្បីប្រជាជនកម្ពុជា។ ឱកាសនេះ ដើម្បីរួមការងារជាមួយ ក្រុមផលិតកម្មកម្ពុជា និងសិល្បករ ដ៏មានទេពកោសល្យ របស់កម្ពុជា។</span></p>
<p><span style="color: #000000;">ក្រោយពីខ្សែភាពយន្តនេះ ថតបញ្ចប់ នឹងត្រូវបានចាក់ផ្សាយ តាមបណ្ដាញ អ៊ីនធឺណិត សំខាន់ៗនៅចុងឆ្នាំ២០១៦ ហើយនឹងត្រូវដាក់ បញ្ចាំងផងដែរ តាមមហោស្រពភាពយន្ត អន្តរជាតិធំៗ ជុំវិញពិភពលោក ទៀតផង ៕</span></p>
<p><span style="color: #000000;"><a class="thickbox" title="" href="/FileManager/Commons/2015/7/29/7-29-2015-2-31-47-pm-29-07-2015--14-38-05.png"><span style="color: #000000;"><img src="/FileManager/Articles/mce/2015/7/29/7-29-2015-2-31-47-pm-29-07-2015--14-38-05.png" alt="" /></span></a></span></p>
<p> </p>
<p style="text-align: right;">ផ្ដល់សិទ្ធដោយ៖ ដើមអម្ពិល</p>