<p>ក្រុមហ៊ុនតូយ៉ូតា បានប្រមូលរថយន្តជាង ១០០គ្រឿងនៅ ក្នុងប្រទេសកម្ពុជា ដែលជាផ្នែកមួយនៃ ការប្រមូលនៅ ជុំវិញពិភពលោក ចំនួន ៦,៤លានគ្រឿង ដោយសារបញ្ហាបច្ចេកទេស។</p>
<p>លោក លី ប៊ុនហៃ ប្រធានគ្រប់គ្រង ក្រុមហ៊ុនតូយ៉ូតាប្រចាំ ប្រទេសកម្ពុជា បានថ្លែងឲ្យដឹងថា ចាប់តាំងពីក្រុមហ៊ុន បានចេញសេចក្ដីប្រកាស ប្រមូលរថយន្តចំនួន ៦,៤លានគ្រឿង នៅជុំវិញពិភពលោក ដោយសារបញ្ហា ពោងសុវត្ថិភាព ចង្កួត និងកៅអ៊ីមក នៅកម្ពុជាក៏ត្រូវ ប្រមូលរថយន្តជាង ១០០គ្រឿងទៅជួសជុលផងដែរ។</p>
<p>យោងតាមការឲ្យដឹងពីក្រុមហ៊ុន រថយន្តដែលត្រូវ ប្រមូលច្រើនជាងគេ គឺម៉ូដែល Toyota Hilux Pickup ដែលមានចាប់តាំងពីឆ្នាំ ២០០៦។ ការប្រមូលរថយន្តនេះ គេមិនបានដឹង ច្បាស់ពីតួលេខ និងផលប៉ះពាក់នោះទេ ព្រោះថា ការនាំចូលរថយន្តភាគច្រើន មិនត្រូវបានធ្វើឡើង ជាលក្ខណៈផ្លូវការ ។<br />"វាជាការលំបាក់ខ្លាំង ណាស់ក្នុងការកំណត់ និងតាមដានរថយន្ត នៅក្នុងប្រទេសកម្ពុជា ទៅលើម៉ាកដែលត្រូវប្រមូល ព្រោះថា ទាំងរថយន្តថ្មី និងចាស់ភាគច្រើន គឺមិនមានតួលេខ ច្បាស់លាស់"។ នេះជាការបញ្ជាក់ បន្ថែមរបស់លោក ប៊ុនហៃ។</p>
<p>លោកបានបន្ថែមទៀតថា ក្រុមហ៊ុនតូយ៉ូតាបាន កាន់កាប់ទីផ្សារ រថយន្តកម្ពុជា ៧០ភាគរយ ប៉ុន្តែនៅក្នុងនោះមាន តែ ១០ភាគរយប៉ុណ្ណោះ ដែលបានទិញពីតំណាង ចែកចាយរបស់ក្រុមហ៊ុន៕</p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/April/id-098/S_0322.jpg" alt="" width="600" /></p>
<p style="text-align: right;"><a href="http://lookingtoday.com/index.php/technology-business-news/29613-2014-04-22-08-56-18.html" target="_blank">ផ្តល់សិទ្ធដោយ ៖ ដើមអម្ពិល</a></p>