<p>បុរសម្នាក់នៅប្រទេសចិន បានធ្វើពិធីបុណ្យសពឱ្យរថយន្ដទំនើប ម៉ូដែល Porsche Cayenne ដែលខ្លួនទើបបានទិញ ក្រោយពីជួបគ្រោះថ្នាក់ដោយសារមានបញ្ហាម៉ាស៊ីន ប៉ុន្ដែក្រុមហ៊ុនចែកចាយរថយន្ដនេះ មិនសងការខូចខាត។<br /><br />បន្ទាប់ពីការប៉ះទង្គិចរថយន្ដ ដែលបានកើតឡើងនៅក្រុង Changsha ខេត្រ Hunan ប្រទេសចិន លោក Hao Gang ដែលជាម្ចាស់រថយន្ដ បានសម្រេចចិត្តធ្វើពិធីបុណ្យសពឱ្យរថយន្ដទំនើប ម៉ាក់ Porsche របស់ខ្លួន។ មូលហេតុដែល Hao Gang ធ្វើបែបនេះ គឺដើម្បីទាមទារសំណងខូចខាតពីក្រុមហ៊ុនចែកចាយ ក្រោយពីគាត់បានទិញរថយន្ដ ម៉ូដែល Porsche Cayenne ប៉ុន្ដែត្រូវជួបគ្រោះថ្នាក់ ដោយសារតែម៉ាស៊ីនមានបញ្ហាបច្ចេកទេស។</p>
<p style="text-align: center;"><a class="thickbox" title="" href="/FileManager/Commons/2013/9/24/ijqyqsoy3afet43sdes0bvrg4ibrpvyl-24-09-2013--20-00-26.jpg"><img src="/FileManager/Articles/mce/2013/9/24/ijqyqsoy3afet43sdes0bvrg4ibrpvyl-24-09-2013--20-00-26.jpg" alt="" /></a></p>
<p style="text-align: center;"><em>Hao Gang កំពុងធ្វើពិធីបុណ្យសពឱ្យរថយន្ដរបស់ខ្លួន</em></p>
<p><br />Hao Gang ដែលជាម្ចាស់រថយន្ដនេះ ឱ្យដឹងថា ៖ “ខ្ញុំពិតជាមានការរីករាយណាស់ នៅពេលបានក្លាយជាម្ចាស់រថយន្ដ Porsche Cayenne។ ប៉ុន្ដែ បញ្ហាគួរឱ្យសោកស្ដាយបានកើតឡើង នៅពេលខ្ញុំ និងភរិយា កំពុងធ្វើដំណើរទៅទេសចរណ៍ ហើយបានជួបនឹងគ្រោះថ្នាក់។ រថយន្ដខ្ញុំ បានបុករថយន្ដមួយផ្សេងទៀត តែសំណាងល្អ យើងនៅមានជីវិត។ ក្រុមនគរបាលជំនាញផ្នែកចរាចរណ៍ បានធ្វើការត្រួតពិនិត្យរថយន្ដរបស់ខ្ញុំ ហើយបានប្រាប់ថា ហ្វ្រាំងរថយន្ដ មានបញ្ហា ដោយសារតែម៉ាស៊ីន ត្រូវបានតម្លើង មិនត្រឹមត្រូវ” ។ <br /><br /> Hao Gang ថ្លែងបន្ដដោយមិនសប្បាយចិត្តថា ៖ “បើទោះជាយ៉ាងនេះក្ដី ខាងក្រុមហ៊ុនចែកចាយរថយន្ដ បានបដិសេធ និងមិនយល់ព្រមសងការខូចខាតដល់ខ្ញុំ។ ដូច្នេះ ខ្ញុំបានសម្រេចចិត្តធ្វើពិធីបុណ្យសពឱ្យរថយន្ដរបស់ខ្ញុំ ហើយព្រមានដល់អតិថិជនផ្សេងទៀតដែលប្រើរថយន្ដប្រភេទនេះ អំពីគ្រោះថ្នាក់ដែលអាចនឹងកើតឡើង” ។ <br /><br />មិនត្រឹមតែធ្វើពិធីបុណ្យសពឱ្យរថយន្ដ Porsche Cayenne របស់ខ្លួននោះទេ ប៉ុន្ដែ Hao Gang ថែមទាំងមានគម្រោងនឹងទុករថយន្ដនេះ នៅក្នុងចំណត់រថយន្ដរបស់ក្រុមហ៊ុនចែកចាយរថយន្ដ រហូតដល់ទទួលបានសំណងសមរម្យ។</p>
<p style="text-align: right;"><br />ដោយ ៖ តារា<br />ប្រភព ៖ orange<br /><br /><br /></p>