<div class="article-content">
<p><span style="color: #000000;"><strong>ភ្នំពេញ៖</strong> ក្នុងកម្មវិធីបណ្ដុះបណ្ដាល មន្ត្រីគណៈកម្មាធិការជាតិ រៀបចំការបោះឆ្នោត (គ.ជ.ប) ទូទាំងរាជធានី-ខេត្ត នាសាលប្រជុំក្រសួង មហាផ្ទៃនៅព្រឹកថ្ងៃទី៧ ឧសភា ឆ្នាំ២០១៥ លោក គួយ ប៊ុនរឿន អនុប្រធាន គ.ជ.ប បានមានប្រសាសន៍ថា មន្ត្រីគ.ជ.ប ទូទាំងប្រទេស នឹងត្រូវបញ្ចូលជាមន្ត្រីរាជការស៊ីវិល និងមានក្របខ័ណ្ឌពេញសិទ្ធិ ។</span></p>
<p><span style="color: #000000;">លោក គួយ ប៊ុនរឿន បានមានប្រសាសន៍ថា ក្រោយពី ព្រះរាជក្រឹត្យបានចូលជាធរមានហើយ ដោយបានពិនិត្យទៅលើ សមាហរណកម្មនៃមន្រ្តី គ.ជ.បទាំងអស់ ដើម្បីចូលជាមន្រ្តីក្របខ័ណ្ឌ ។ នៅពេលដែលមន្រ្តីណាម្នាក់ បានសម្រេចជ្រើសរើស ធ្វើការឲ្យស្ថានប័នគ.ជ.ប មន្រ្តីរូបនោះ អាចទទួលបានការលើកតម្កើង ឲ្យក្លាយជាមន្រ្តីរាជការដូចស្ថាប័នដទៃដែរ។</span></p>
<p><span style="color: #000000;">លោកបន្តថា បើទោះបីជាមានការផ្លាស់ប្ដូរ រចនាសម្ព័ន្ធនៃថ្នាក់ដឹកនាំ គ.ជ.ប យ៉ាងម៉េចក៏ដោយ ក៏មន្រ្តីលេខាធិការដ្ឋាន នៅតែរក្សាដដែល គឺស្ថិតនៅក្នុងក្របខ័ណ្ឌ គ.ជ.ប។</span></p>
<p><span style="color: #000000;">លោកបានបញ្ជាក់ថា «ដើម្បីឲ្យមានគោលការណ៍ស្មើភាពគ្នា ដោយសារពួកគាត់ បានបំពេញការងារជូនជាតិ អស់រយៈពេលជាច្រើនឆ្នាំ ដូច្នេះនៅពេលចុងបញ្ចប់ នៃការងារគាត់ត្រូវតែមានសិទ្ធិ និងបុព្វសិទ្ធិ ជាពិសេសសិទ្ធិ នៃការចូលនិវត្តន៍ដូចមន្រ្តីឯទៀត ដែលគេបម្រើជាតិដែរ គឺនៅពេលគេចប់ ពួកគេមានសិទ្ធិចូលនិវត្តន៍ និងទទួលបានប្រាក់សោធននិវត្តន៍ផងដែរ”។</span></p>
<p><span style="color: #000000;">សូមបញ្ជាក់មន្រ្តី គ.ជ.ប ដែលអាចចូលជាមន្រ្តីរាជការស៊ីវិល ហើយមានក្របខ័ណ្ឌពេញសិទ្ធិបាន លុះត្រាតែពួកគេជាមន្រ្តី ដែលបម្រើការងារឲ្យស្ថាប័ន គ.ជ.ប ដោយមិនមានមុខតំណែង ២ឬ៣ឡើយ៕</span></p>
</div>
<p style="text-align: right;"><span style="color: #000000;">ផ្តល់សិទ្ធដោយ ៖ ដើមអម្ពិល</span></p>