<p><strong>ភ្នំពេញៈ</strong> តារាសម្តែងជើងចាស់ ក្នុងទស្សវត្សន៍៩០អ្នកស្រី ឌឿ ដារ៉ាស៊ី បានទទួលមរណៈភាព កាលពីម៉ោង៧យប់ ថ្ងៃអាទិត្យទី២០ ខែមេសា កន្លងទៅ ដោយសារជំងឺពុកឆ្អឹងធ្ងន់ធ្ងរ។ សាកសព ត្រូវបានក្រុមគ្រួសារ តម្កល់ធ្វើបុណ្យ នៅគេហដ្ឋាន ម្តុំសង្កាត់ភ្នំពេញថ្មី ។</p>
<p>សម្រាប់អ្នកស្រី ឌឿ ដារ៉ា ស៊ីត្រូវបានមហាជន និងអ្នកសិល្បៈជំនាន់ក្រោយ ចាត់ទុកថា ជាតារាសម្តែងស្រីមួយរូប ដែល មានទេពកោសល្យ ក្នុងការសម្តែង ជាតួកាចឆ្នាស់ឆ្នើម បានយ៉ាងល្អ ហើយក៏ជាតារាគំរូមួយដួង ដែលតារាសម្តែងស្រករ គោរពរាប់អាន។ អ្នកស្រីបានទទួលមរណៈភាព កាលពីយប់ ថ្ងៃ អាទិត្យ ទី២០ ខែមេសា ក្នុងជន្មាយុ៦៧ឆ្នាំ ដោយសារ ជម្ងឺពុកឆ្អឹង ដំណាក់កាលចុងក្រោយ។</p>
<p>ប្រធានសមាគមសិល្បករខ្មែរ លោក សុះ ម៉ាច បានបង្ហាញពីភាពសោកសៅ ស្តាយស្រណោះ ប្រាប់ LookingTODAY ឲ្យដឹងថា លោកពិតជាមានអារម្មណ៍ទុក្ខសោកណាស់ ដែលបានទទួលដំណឹងថា អ្នកសិល្បៈជើងចាស់ អ្នកស្រី ឌឿ ដារ៉ាស៊ី ទទួលមរណភាព។ ក្នុងនាមលោកជា ប្រធានសមាគម និងតំណាងឲ្យ សិល្បករ-សិល្បការិនី ទាំងអស់ សូមចូល រួម សោកស្តាយ និងចូលរួមរំលែកទុក្ខដ៏ក្រៀមក្រំនេះ ជាមួយក្រុមគ្រួសារសព និងសូមបួងសួង ឲ្យវិញ្ញាណក្ខន្ធរបស់ គាត់បានដល់ សុគតិភព កុំបីឃ្លៀងឃ្លាតឡើយ ។</p>
<p>លោក សុះ ម៉ាច បានប្រាប់ទៀតថា “ខ្ញុំក៏សូមអំពាវនាវ ទៅដល់អ្នកសិល្បៈទាំងអស់ ទៅចូលរួមក្នុងពិធីបុណ្យសព តារា ជើងចាស់រូបនេះផង ចុះ ហើយសម្រាប់ព័ត៌មាន បន្ថែមអាចទាក់ទង ទៅក្រុមគ្រួសារបាន ។ ការទទួលមរណភាព របស់ អ្នកស្រី ដារ៉ាស៊ី ខ្ញុំជឿជាក់ថា អ្នកសិល្បៈទាំងអស់ ប្រាកដជា មានការសោកស្តាយ និងមានទុក្ខមិនចាញ់គ្នាទេ ហើ។ បើទោះជា គាត់ (ដារ៉ាស៊ី) មិនមែនជាសមាជិកក្នុង សមាគមរបស់ខ្ញុំក្តី តែខ្ញុំក៏ត្រូវតែចេញមុខជួយ និងចែករំលែកការជួយ ទុក្ខធុរពីគ្រួសារសពតាមដែលអាចជួយ ទៅបាន”។</p>
<p>សម្រាប់សពអតីតតារាសម្ដែង ជើងចាស់ មានឈ្មោះបោះសំឡេង អ្នកស្រី ឌឿ ដារ៉ាស៊ី បានតម្កល់ក្នុងគេហដ្ឋាន នៅ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ខាងក្រោយផ្សារដីហុយ និងមានគម្រោងត្រៀមធ្វើបុណ្យ៧ថ្ងៃ នៅក្នុង ពេលដ៏ខ្លីខាងមុខនេះ ។ អាស្រ័យហេតុនេះអ្នកសិល្បៈ ដែលមានបំណងចង់ទៅចូលរួម ពិធីបុណ្យក៏ដូចជាគោរព វិញ្ញាណក្ខន្ឌ របស់អ្នកស្រី អាចអញ្ជើញទៅបាន ។ គេហទំព័រ LookingTODAY សូមចូលរួមរំលែកទុក្ខយ៉ាងក្រៀមក្រំនេះ ជាមួយក្រុមគ្រួសារសព និងសូមឲ្យដួងវិញ្ញាណក្ខន្ធ អ្នកស្រី ឌឿ ដារ៉ាស៊ី បានទៅកាន់សុគតិភព កុំបីឃ្លៀងឃ្លាតឡើយ ៕</p>
<p style="text-align: center;"><img src="http://image.dap-news.com:81/dap-news/dap-images/2014/April/id-078/Lay-222.jpg" alt="Photo by DAP-News" width="500" /></p>
<p style="text-align: right;"><a href="http://lookingtoday.com/index.php/entertainment-general-news/29649-2014-04-23-06-45-23.html" target="_blank">ផ្តល់សិទ្ធដោយ ៖ ដើមអម្ពិល</a></p>