<div class="article-content">
<p><strong>ភ្នំពេញ៖</strong> រថយន្តក្រុងខ្សែទី១ ក្នុងចំណោម គម្រោងផ្លូវរថយន្តក្រុងថ្មី ទាំង៣ខ្សែ នៅភ្នំពេញ ត្រូវបាន អាជ្ញាធរ ដាក់ ឱ្យដំណើរការ នៅព្រឹក ថ្ងៃចន្ទ ទី១ ខែកញ្ញានេះ ជាមួយនឹង តម្លៃ១៥០០រៀល សម្រាប់មនុស្សម្នាក់ៗ។</p>
<p>លោកឡុង ឌីម៉ង់ អ្នកនាំពាក្យ សាលារាជធានីភ្នំពេញ បានឱ្យដឹងថា រថយន្តខ្សែទី១ ដែលត្រូវបានដាក់ ឱ្យដំណើរ ការ នៅព្រឹកមិញនេះ បានរត់ពីគីឡូម៉ែតលេខ១១ ក្នុងខណ្ឌឫស្សីកែវ កាត់តាម ស្ពានច្បារអំពៅ រហូតទៅដល់ វត្តក្តីតាកុយ នៅខណ្ឌច្បារអំពៅ ក្នុងតម្លៃ១៥០០រៀល ប៉ុណ្ណោះ សម្រាប់មនុស្ស, ចំណែក២ខ្សែទៀត នឹងដាក់ ឱ្យដំណើការ នៅពាក់កណ្តាល ខែកញ្ញា ខាងមុខនេះ ។</p>
<p>សូមជំរាបថា ដើម្បីកាត់បន្ថយការកកស្ទះចរាចរណ៍ និងសម្រួល ដល់ការធ្វើដំណើរដល់ប្រជាពលរដ្ឋ អាជ្ញាធរ រាជធានី ភ្នំពេញ បានសម្រេចទិញរថយន្តក្រុង៤០គ្រឿង បន្ថែមទៀត ដើម្បីដាក់ឱ្យរត់លើផ្លូវ ៣ខ្សែ នៅរាជធានី ភ្នំពេញ បន្ថែមលើផ្លូវរថយន្តក្រុង១ខ្សែ ជាជំនួយរបស់អង្គការ JICA ដែលបានដាក់ឱ្យដំណើរការ កាលពីខែកុម្ភៈ កន្លងទៅ ។</p>
<p>ផ្លូវរថយន្តក្រុងថ្មី ទាំង៣ខ្សែនេះ រួមមាន ខ្សែទី១រត់ពី គីឡូម៉ែតលេខ១១ ខណ្ឌឫស្សីកែវ ទៅដល់ វត្តក្តីតាកុយ (ផ្លូវជាតិលេខ១) ស្ថិតក្នុងខណ្ឌច្បារអំពៅ ខ្សែទី២ពីផ្លូវគីម អ៊ីលស៊ុង កាត់តាម ផ្លូវម៉ៅសេទុង រហូតដល់តាខ្មៅ និងខ្សែទី៣ចាប់ពីផ្សាររាត្រី ផ្សារចាស់ ឡើងមកផ្លូវកម្ពុជាក្រោម មកផ្លូវ សហព័ន្ធរុស្សី រហូតដល់ចោមចៅ ខណ្ឌ ពោធិ៍សែនជ័យ ។ ការបើកដឹកអ្នកដំណើរ តាមរថយន្តក្រុង ទាំង៣ខ្សែនេះ អាជ្ញាធរ នឹងប្រើប្រាស់អ្នកបើកបរ ចំនួន៩០នាក់ ៕</p>
<p style="text-align: center;"><img src="http://image.dap-news.com:81/dap-news/dap-images/2014/August/id-078/Lay-414.jpg" alt="Photo by DAP-News" width="550" /></p>
</div>
<p style="text-align: right;"><a href="http://www.dap-news.com/2011-06-14-02-39-55/94136-2014-09-01-04-33-27.html" target="_blank">ផ្តល់សិទ្ធដោយ ៖ ដើមអម្ពិល</a></p>