<p><strong>ភ្នំពេញៈ</strong> ពិធីការិនីស្រីវ័យក្មេង ឈរជើងនៅក្នុងស្ថានីយ ទូរទស្សន៍ ស៊ីធីអិន កញ្ញា គង់ វង្សយ៉ាទី នៅពេលថ្មីៗនេះ នាងបានបង្អួតសារមួយ ក្នុងគោលបំណងរិះគន់ ទៅលើបុគ្គលមួយចំនួន ដែលចាំតែចាប់កំហុសនាងគ្រប់ពេលវេលា គ្រប់ដង្ហើមរហូតធ្វើឲ្យនាង មានអារម្មណ៍ធុញទ្រាន់ និងបញ្ចេញសារនេះឡើង ស្តែងឲ្យឃើញពីអារម្មណ៍ផ្ទាល់ខ្លួន របស់នាងជាសាធារណៈ ។</p>
<p>តាមរយៈពាក្យសម្តីមួយចំនួន ដែល កញ្ញា គង់ វង្សយ៉ាទី រំលេចនៅលើបណ្តាញ ទំនាក់ទំនងសង្គមរបស់នាងនោះ គឺនាងបាន សរសេរជាភាសាខ្មែរយ៉ាងខ្លីថា "មានពួកនៅមិនសុខខ្លះ វាដើរចាំចាប់កំហុសគេ ព្រោះពួកវាមានចរិត នៅមិនស្ងៀម ខ្ញុំចង់សើចក្នុងខ្លួន វាចេះតាម៉េច!! បើពួកអែងទំនេរ យកពេលទៅរៀនសូត្រទៅ... កុំអត់បានការចឹង (យកពេលធ្វើរឿងមិនល្អ).."។</p>
<p>ជាមួយគ្នានេះ លោក គង់ ចំរ៉ុង ដែលត្រូវបានគេស្គាល់ថា ជាតារាសម្ដែងល្បីឈ្មោះបង្គួរ មួយដួងផងនោះ បានបញ្ចេញមតិ (Comment) បន្ទរ ហាក់បីដូចជាមិនសមឈ្មោះ ជាតារាល្បីថា " កុំទៅខ្វល់ជាមួយមនុស្ស សណ្ដានឆ្កែចឹងអូន..វាដើរចាប់កំហុសគេ ទាំងខ្លួនឯង លាងក្ដិតខ្លួនឯងមិនទាន់ជ្រះផង មនុស្សបែបនេះ បងធ្លាប់ជួបហើយ ហៅវាទៅកសាង១ដង ទៅ២ដង វារាងហើយ!!!"។</p>
<p>នៅក្នុងសារនោះ ពិធីការិនីប្រចាំកម្មវិធី “រាត្រីកម្សាន្ត” គង់ វង្សយ៉ាទី មិនបានបញ្ជាក់ច្បាស់ ទៅលើបុគ្គលណាម្នាក់ទេ នាងគ្រាន់តែប្រើសម្តី ដោយប្រយោល ក្នុងគោលបំណងរិះគន់ វាយប្រហារ ទៅលើអ្នកដែលគិតមិនល្អ ចំពោះនាង ហើយគេក៏ មិនដឹងថា នាងមានអីជាអាថ៌កំបាំង ឬបញ្ហាអ្វី ត្រូវឲ្យគេរិះគន់ស្ថាបនានោះទេ ទើបនាងបញ្ចេញមតិ ហាក់ដូចជាខឹងសម្បារខ្លាំង អមដោយការបន្ទរធ្ងន់ៗពីលោក គង់ ចំរ៉ុង បែបនេះ ។</p>
<p>LookingTODAY មិនអាចទាក់ទងដើម្បីឲ្យ កញ្ញា គង់ វង្សយ៉ាទី បកស្រាយ និងបញ្ជាក់ពីរឿងនេះច្បាស់ទេ នៅ ថ្ងៃទី២៥ ខែកុម្ភៈ ឆ្នាំ២០១៤នេះ។នេះមិនមែនជាលើកទី១ទេ ដែលមានអ្នកសិល្បៈ សម្ញែងសារ រិះគន់ និងបញ្ចេញប្រតិកម្ម ទៅលើបុគ្គលដែលព្យាយាម តាមចាប់កំហុស ឬធ្វើការរិះគន់ទៅលើពួកគេ ជាសាធារណៈ ដោយជារឿយៗពួកគេតែងតែ យកបណ្តាញទំនាក់ទំនងសង្គម Facebook ធ្វើការប្រតិកម្ម និងបកស្រាយ ច្រានចោល ចំពោះការវាយប្រហារ ធ្វើឲ្យពួកគេ ខូចកេរ្តិ៍ឈ្មោះប៉ះពាល់ កិត្តិយសរបស់ពួកនាង៕</p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/February/id-100/Ravuth-511.jpg" alt="" width="600" /></p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/February/id-100/Ravuth-512.jpg" alt="" width="600" /></p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/February/id-100/Ravuth-513.jpg" alt="" width="600" /></p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/February/id-100/Ravuth-510.jpg" alt="" width="600" /></p>
<p style="text-align: right;">ផ្តល់សិទ្ធដោយ ៖ ដើមអម្ពិល</p>