<div class="article-content">
<p><strong>កណ្តាល:</strong> ស្រ្តីម្នាក់ ត្រូវនគរបាលឃាត់ខ្លួន ពីបទបន្លំ យកមាសរបស់ អាជីវករ នៅ ផ្សារគគីរ នៅ<br />មុខអធិការ ដ្ឋាននគរបាល ស្រុកកៀនស្វាយ កាលពីព្រឹកថ្ងៃទី៨ ខែមេសា ឆ្នាំ២០១៣។</p>
<p>លោក ប៉ា សំអិត អធិការ នគរបាលស្រុកកៀនស្វាយ បានបង្ហើបឲ្យដឹងថា ស្រ្តីជាប់ចោទ ឈ្មោះ<br /> ប៊ុត ញិច អាយុ ៣៥ឆ្នាំ ស្នាក់នៅ ផ្ទះជួល នៅសង្កាត់ភ្នំពេញថ្មី មានមុខរបរ ជាអ្នកម៉ាស្សា នៅម្តុំ<br />ត្រឡោកបែក ។</p>
<p>នៅចំពោះមុខអធិការ ស្រ្តីជាប់ចោទ បាននិយាយថា ខ្លួនជាស្រ្តីម៉ាស្សា បានស្គាល់ បុរសម្នាក់អាយុ<br /> ៦៧ឆ្នាំ ជាម៉ូយទៅម៉ាស្សា កោសជប់ នៅកន្លែងនាងធ្វើការ ហើយរាប់អានគ្នាជាស្រីកំណាន់តែម្តង<br />ទៅ ។</p>
<p>ស្រ្តីជាប់ចោទបន្តថា នៅថ្ងៃកើតហេតុ បុរសចំណាស់នោះ បាននាំនាងមកផ្សារ ដើម្បីរកទិញមាស<br />ឲ្យ ដោយ មុនដំបូងបុរសជាសង្សារ បាននាំនាងទៅផ្សារតាខ្មៅ ហើយមិនត្រូវចិត្ត គាត់បាននាំនាង<br />មកផ្សារគគីរនេះ ។</p>
<p>ស្រ្តីជាប់ចោទបន្តទៀតថា ពេលមកដល់ផ្សារគគីរ បុរសជាសង្សារ បាននាំនាង ទៅកាន់តូបលក់<br />មាស របស់ឈ្មោះ លី ដោយបាន យកខ្សែកមាស ទម្ងន់ ២តម្លឹង ៧ជី ។ បន្ទាប់ពីបាន ខ្សែកមាស<br />នេះហើយ បុរស ជាសង្សារនោះ បានយកខ្សែកទៅបាត់ ដោយបាននិយាយប្រាប់ថា ចេញទៅ<br />យកលុយពីកូន ដែលរង់ចាំនៅខាងក្រៅផ្សារ។ នាងក៏រង់ចាំរហូត មិនឃើញសង្សារមកវិញហើយ<br />ក៏ត្រូវម្ចាស់ មាសប្តឹងឲ្យសមត្ថកិច្ចឃាត់ខ្លួន តែម្តង។</p>
<p>លោកប៉ា សំអិត អធិការ នគរបាលស្រុកកៀនស្វាយ បានឲ្យដឹងថា ចំពោះករណី នេះ សមត្ថកិច្ច<br />របស់លោក កំពុងស្រាវជ្រាវ រកជនសង្ស័យ ដៃដល់ល្បិចខ្ពស់ ដែលបានបន្លំយកមាស របស់ជន<br />រងគ្រោះទៅបាត់នោះ ។</p>
<p>ដោយឡែកចំពោះស្រ្តី ជាប់ចោទរូបនេះ សមត្ថកិច្ច បានកសាងសំណុំរឿងបញ្ជូន ទៅតុលាការ <br />ដើម្បីចាត់ការ តាមនិតិវិធីច្បាប់៕</p>
<p style="text-align: center;"><img src="http://111.92.240.170:81/dap-news/dap-images/2013/April/id-067/CH-0134.jpg" alt="Photo by DAP-NEWS" width="400" /></p>
<p style="text-align: right;">ផ្តល់សិទ្ធិដោយ៖ ដើមអំពិល</p>
</div>