<div class="article-content">
<p><strong>ភ្នំពេញ៖</strong> បន្ទាប់ពីមិនបានទទួលប្រាក់ខែ អស់រយៈពេលបីខែកន្លងមក ហើយមិនមានអ្វីសម្រាប់<br />ផ្គត់ផ្គង់ដល់គ្រួសាររបស់ពួកគេនោះក្រុមបុគ្គលិករបស់អង្គជំនុំជម្រះវិសាមញ្ញ ក្នុងតុលាការកម្ពុជា<br /> (អ.វ.ត.ក) រឺហៅសាមញ្ញថា សាលាក្តីខ្មែរក្រហមប្រមាណ ជិត២០០នាក់បានសម្រេចចិត្តមិនចូល<br /> ធ្វើការបន្តទៀតឡើយ ហើយថា រហូតដល់មានដំណោះស្រាយ ទើបពួកគេវិលចូលធ្វើជាធម្មតា<br />វិញ។</p>
<p>ការពហិការរបស់បុគ្គលិកទាំងនោះគឺបានកើតឡើងតាំងពីថ្ងៃទី១ ខែកញ្ញា មកម្ល៉េះ ហើយវាក៏ជា<br />លើកទីពីរផងដែរ សម្រាប់ ឆ្នាំ២០១៣នេះ។ នេះបើយោងតាម អ្នកនាំពាក្យរបស់សាលាក្តីខ្មែរ<br />ក្រហម លោកនេត្រ ភក្រ្តា។</p>
<p>លោក បានមានប្រសាសន៍ប្រាប់ដល់ មជ្ឈមណ្ឌលព័ត៌មាន ដើមអម្ពិល តាមទូរស័ព្ទនាថ្ងៃទី២<br /> ខែកញ្ញា នេះថា បុគ្គលិករបស់ជាតិប្រមាណ ជិត២០០នាក់ ក្នុងចំណោម២៥០នាក់ពួកគេ បាន<br />ព្យួរការងារបណ្តោះអាសន្ន របស់ពួកគេ ដោយសារតែការធ្វើការរបស់ពួកគេ មិនទទូលបាន<br />ប្រាក់ខែ ហើយមិនតែប៉ុណ្ណោះ ពួកគេក៏គំរាមថា នឹងមិនចូលធ្វើវិញដែរ ប្រសិនណាមិនមាន<br />ដំណោះស្រាយ ជូនពួកគេនោះ។</p>
<p>លោក នេត្រ ភក្ត្រាបានបន្តថា “ពួកគាត់មិនអាចបន្តការធ្វើការងារដោយមិនមានប្រាក់បៀវត្សរ៍<br />ទៀតទេ គាត់ជួបប្រទះនឹងបញ្ហាថវិកាប្រចាំថ្ងៃ ប្រចាំក្រុម គ្រួសាររបស់ពួកគាត់ ដូច្នេះហើយ<br />បានជាពួកគាត់ បានសម្រេចជាបណ្តោះអាសន្ន រហូតដល់មានដំណោះស្រាយ។ សាលាក្តីនា<br />ថ្ងៃនេះមានសភាពស្ងប់ស្ងាត់ មានតែបុគ្គលិកជាតិ ថ្នាក់ដឹកនាំមួយចំនួន ដែលគាត់ទៅធ្វើការ<br /> ហើយនិងមន្រ្តីបុគ្គលិកអន្តរជាតិ តែប៉ុណ្ណោះក្រៅពីនោះគឺគ្មានឡើយ”។</p>
<p>លោក បន្ថែមទៀតថា ការធ្វើពហិការមិន ចូលធ្វើការរបស់បុគ្គលិកនេះ គឺមានចំនួនពីរលើក<br />ហើយ សម្រាប់ប្រាំមួយខែ ដើមឆ្នាំ២០១៣នេះ ហើយកាលពីលើកទីមួយ បានធ្វើឡើងកាល<br />ពីថ្ងៃទី៤ ខែមីនា កន្លងទៅនេះ ហើយបានបញ្ចប់ទៅវិញ នៅថ្ងៃទី១៧ខែដដែលនោះ។<br />ទាក់ទងនឹងបញ្ហាប្រាប់បៀវត្សរ៍ របស់បុគ្គលិក នៃសាលាក្តីខ្មែរក្រហមនេះ កាលពីថ្ងៃទី១៨ <br />ខែសីហាកន្លងទៅ ទាំងភាគីរាជរដ្ឋាភិបាលនិងអង្គការសហ ប្រជាជាតិ បានសម្រេចចិត្តទៅ<br />ប្រទេស អាស៊ានមួយចំនួន ដែលមានប្រទេស ព្រុយណេ ប្រទេសសិង្ហបូរី ម៉ាឡេស៊ី និង <br />ប្រទេសឥណ្ឌូណេស៊ី ក្នុងគោលបំណងស្វែងរក ជំនួយ ប៉ុន្តែប្រទេសទាំងនោះ បានត្រឹមតែ<br />ស្វាគមន៍ប៉ុណ្ណោះ មិនបានសន្យាថា នឹងជួយដល់តុលាការនេះឡើយ ដោយគ្រាន់តែថានឹង<br />ពិចារណា។</p>
<p>បើយោងតាម លោកនេត្រ ភក្រ្តា ប្រសិនណាបើសាលាក្តីនេះ មិនមានប្រាក់ឧត្ថម្ភជាបន្តទៀត<br />នោះ វា នឹងមានហានិភ័យខ្ពស់ ហើយវាក៏ជាសោកនាដកម្ម មួយទៀតផងដែរសម្រាប់ ប្រជា<br />ពលរដ្ឋដែលពួកគាត់ខំ ទទឹងរង់ចាំរកយុត្តិធម៌។</p>
<p>តែយ៉ាងណាក្តី អគ្គលេខាធិការអង្គការសហប្រជាជាតិ លោកបាន គីមួន ក៏តែងតែ អំពាវនាវ<br />ដល់ម្ចាស់ជំនួយ ជាបន្តដើម្បីឲ្យជួយដល់ដំណើរការសាលាក្តីនេះទៀតផងដែរបន្ទាប់ពីលោក<br />ដឹងថាតុលាការនេះ នឹងមានភាពផុយស្រួយប្រសិនណា អត់ថវិកាបន្តទៀតនោះ។</p>
<p>សូមបញ្ជាក់ថា សាលាក្តីកាត់ទោសអតីត មេដឹកនាំខ្មែរក្រហម ត្រូវបានបង្កើតឡើងរួមគ្នា <br />ដោយអង្គការសហប្រជាជាតិ និង រដ្ឋាភិបាលកម្ពុជា កាលពីឆ្នាំ២០០៦។ ហើយ មកដល់<br />ឆ្នាំ២០១២នេះ សាលាក្តីចម្រុះ បានចំណាយថវិកាសរុប ១៧៣,៣ លានដុល្លារហើយ។ ក្នុង<br />នោះ ភាគីជាតិចំណាយ៤២,១ លានដុល្លារនិងអន្តរជាតិចំណាយអស់១៣១,២ លានដុល្លារ។</p>
<p>ហើយជាមួយគ្នានេះសម្រាប់ឆ្នាំ២០១៣ វិញ សាលាក្តី ត្រូវការថវិកាសរុបចំនួន ៣៥,៤ លាន<br />ដុល្លារ ដែលភាគីជាតិ ត្រូវការ ៩,៤ លានដុល្លារ និងអន្តរជាតិ ត្រូវការ២៦ លានដុល្លារ។</p>
<p>តែយ៉ាងណាក្តីសម្រាប់បុគ្គលិក ភាគីកម្ពុជា បានជួបនឹងវិបត្តិថវិកា នេះចាប់តាំងពីខែមិថុនា<br />មកម្លេះហើយ បុគ្គលិកជាតិប្រមាណ ២៥០ រូប មិនបានទទួលប្រាក់ខែឡើយ។</p>
<p>បើតាមការឲ្យដឹងរបស់អ្នកនាំពាក្យតុលាកាខ្មែរក្រហម លោកនេត ភក្ត្រា បានថ្លែងបន្តទៀត<br />ថា ភាគីកម្ពុជា នៅខ្វះថវិកាប្រមាណ ៣ លានដុល្លារ។ តែសម្រាប់ ភាគីអន្តរជាតិវិញពួកគេ<br /> មានថវិកាដំណើរការ រហូតដល់ចុងឆ្នាំនោះឯណោះ។</p>
<p>សូមរំលឹកផងដែរថា សាលាក្តីខ្មែរក្រហម សព្វថ្ងៃ កំពុងដំណើរការកាត់ទោស អតីតមេខ្មែរ<br />ក្រហមក្នុងសំណុំរឿង០០២ដំណាក់កាលទី១ដែលមានលោកនួនជា និងលោកខៀវសំផន។<br /> សំណុំរឿក្តីនោះ គ្រោងនឹងបិទបើកសវនាការដោយការសន្និដ្ឋានចុងក្រោយ ចាប់ពីថ្ងៃទី៩<br />តុលា។ រីឯសាលក្រម អាចនឹងប្រកាសនៅដើមឆ្នាំ២០១៤ ខាងមុខនេះ៕</p>
<p style="text-align: center;"><img src="http://image.dap-news.com:81/dap-news/dap-images/2013/September/id-030/Kosal-0006.jpg" alt="" width="500" /></p>
<p style="text-align: right;">ផ្តល់សិទ្ធិដោយ៖ ដើមអម្ពិល</p>
</div>