<p>នៅភាគខាងត្បូងនៃប្រទេស Ethiopia ត្រើយខាងលិចរបស់ទន្លេ Omo នៅមានកុលសម្ព័ន្ធមួយដែលមានចំណូលចិត្តចម្លែកដ៏គួរឱ្យខ្លាច នោះគឺការផឹកឈាមស្រស់។</p>
<p style="text-align: center;"><a class="thickbox" title="" href="/FileManager/Commons/2013/10/8/surma១-08-10-2013--22-53-38.jpg"><img src="/FileManager/Articles/mce/2013/10/8/surma១-08-10-2013--22-53-38.jpg" alt="" /></a></p>
<p>កុលសម្ព័ន្ធនេះ មានឈ្មោះថា Surma ឬអ្នកខ្លះហៅថា Suri ។ កុលសម្ព័ន្ធមួយនេះ នៅតែរក្សាការយល់ឃើញតាមបុរាណ គឺបុរសគឺជាមេគ្រួសារ។ ពួកគេរស់នៅ និងចិញ្ចឹមជីវិត ដោយការដាំដុះ ចិញ្ចឹមសត្វ។ <br /><br />ក្នុងបណ្ដាទំនៀមទម្លាប់បុរាណចម្លែកៗរបស់កុលសម្ព័ន្ធនេះ គេឃើញមានទម្លាប់ផឹកឈាមស្រស់ ក៏ត្រូវបានគេចូលចិត្ត និងរក្សាមកដល់បច្ចុប្បន្ន។ ពួកគេចូលចិត្តផឹកឈាមគោស្រស់ មិនមែនផ្អែកទៅលើតែអបិយជំនឿទាំងស្រុងនោះទេ ប៉ុន្ដែក៏ជាចំណូលចិត្ត និងជាវិធីដើម្បីបង្កើនកម្លាំង សម្រាប់យុទ្ធជន និងមនុស្សក្នុងកុលសម្ព័ន្ធ។</p>
<p style="text-align: center;"><a class="thickbox" title="" href="/FileManager/Commons/2013/10/8/surma៤-08-10-2013--22-54-49.jpg"><img src="/FileManager/Articles/mce/2013/10/8/surma៤-08-10-2013--22-54-49.jpg" alt="" /></a></p>
<p>បណ្ដាបុរសក្នុងកុលសម្ព័ន្ធ Surma តែងជ្រើសរើសគោមួយក្បាលដែលមានកម្លាំងខ្លាំងក្លា ដើម្បីយកឈាម។ ពួកគេប្រើធ្នូ បាញ់ចំករបស់គោ រួចយកផ្ដិលមកត្រងយកឈាមដែលកំពុងបាញ់ចេញក្រហមឆ្អៅ។ ចំណែកផ្ដិល ឬរបស់សម្រាប់ត្រងឈាមគោ មិនត្រូវបានលាងដោយទឹកស្អាតនោះទេ ប៉ុន្ដែពួកគេ យកទឹកនោមគោមកលាង ដោយសារយល់ថា ទឹកនោមគោ គឺជារបស់ស្អាតបំផុត បរិសុទ្ធបំផុត។<br /><br />បន្ទាប់ពីបានប្រើធ្នូ បាញ់កគោ និងបានយកឈាមប្រហែល ២លីត្រ ពួកគេយកដីឥដ្ឋមកបិទរបួសឱ្យគោនោះ ដើម្បីឃាត់ឈាម ក្នុងបំណងរក្សាជីវិតរបស់វា។ នៅក្នុងពិធីជប់លៀងឈាមស្រស់នោះ ព្រឹធាចារ្យក្នុងកុលសម្ព័ន្ធនឹងជាអ្នកផឹកឈាមនោះមុនគេ បន្ទាប់មក គឺអ្នកមានអាយុច្រើន រួចដល់វេនអ្នកពេញវ័យ ។</p>
<p style="text-align: center;"><a class="thickbox" title="" href="/FileManager/Commons/2013/10/8/surma៥-08-10-2013--22-55-19.jpg"><img src="/FileManager/Articles/mce/2013/10/8/surma៥-08-10-2013--22-55-19.jpg" alt="" /></a></p>
<p>សម្រាប់កុលសម្ព័ន្ធ Surma គោត្រូវបានគេចាត់ទុកថា មានអត្ថន័យផ្នែកជំនឿយ៉ាងសំខាន់។ ដូច្នេះ ប្រសិនមិនមែនជាពិធីពិសេស ដូចជាពិធីបូជាយញ្ញនោះទេ ពួកគេនឹងមិនសម្លាប់សត្វគោឡើយ។ គោលបំណងនៃការចិញ្ចឹមសត្វគោរបស់ពួកគេ មិនមែនដើម្បីយកសាច់ ឬទឹកដោះនោះដែរ គឺដើម្បីយកឈាម។ គោគឺជានិមិត្តរូបឱ្យសង្គមរបស់ Surma ។ បុរស Surma ក៏បង្ហាញអំណាចរបស់ខ្លួន តាមរយៈចំនួនគោដែលពួកគេកំពុងចិញ្ចឹម។<br /><br />នៅពេលមានអាយុ ៨ឆ្នាំ បុរសក្នុងកុលសម្ព័ន្ធ Surma ចាប់ផ្ដើមចិញ្ចឹមគោ ហើយពួកគេនឹងមានសិទ្ធិយកប្រពន្ធ លុះណាតែមានគោយ៉ាងតិច ៦០ក្បាល។ បន្ទាប់ពីយកប្រពន្ធ គោទាំងនោះនឹងក្លាយជារបស់ខាងប្រពន្ធ ដូច្នេះ មួយជីវិតរបស់បុរស Surma គឺតែងផ្សារភ្ជាប់នឹងការឃ្លាលគោ។</p>
<p style="text-align: center;"><a class="thickbox" title="" href="/FileManager/Commons/2013/10/8/surma៦-08-10-2013--22-56-19.jpg"><img src="/FileManager/Articles/mce/2013/10/8/surma៦-08-10-2013--22-56-19.jpg" alt="" /></a></p>
<p>កាលពីបុរណ នៅពេលចេញច្បាំងជាមួយសត្រូវ បុរស Surma ក៏នាំគ្នាប្រារព្ធពិធីផឹកឈាម ដើម្បីបង្កើនភាពក្លាហាន ហើយវាក៏ជាពិធីបួងសួង សូមជ័យជំនះផងដែរ។ បច្ចុប្បន្ន ពួកគេនៅតែរក្សាទម្លាប់ផឹកឈាម ក្នុងន័យដូចខាងលើ។ ក្រៅពីការបង្កើនភាពក្លាហាន ឈាមគោស្រស់ ក៏ត្រូវគេចាត់ទុកជាភេសជ្ជៈ សម្រាប់បំបាត់ការស្រេចទឹក។ អ្នកណាដែលមានសុខភាពចុះខ្សោយ គឺត្រូវតែផឹកឈាមគោឱ្យបានច្រើន។</p>
<p style="text-align: center;"><a class="thickbox" title="" href="/FileManager/Commons/2013/10/8/surma៧-08-10-2013--22-56-54.jpg"><img src="/FileManager/Articles/mce/2013/10/8/surma៧-08-10-2013--22-56-54.jpg" alt="" /></a></p>
<p>នៅក្នុងការយល់ឃើញរបស់កុលសម្ព័ន្ធដទៃ Surma គឺជាក្រុមមនុស្សស្រេចឈាម។ នៅពេលបានឃើញទិដ្ឋភាពបុរស និងស្ដ្រីកុលសម្ព័ន្ធ Surma កាន់កាំបិត ធ្នូ ជាដើម ហើយបច្ចុប្បន្ន ពួកគេងាកមកកាន់កាំភ្លើងជាប់ក្នុងដៃ យើងក៏អាចយល់បានថា ពួកគេជាមនុស្សក្លាហាន ចូលចិត្តចម្បាំង។</p>
<p style="text-align: right;"><br />ដោយ ៖ តារា<br />ប្រភព ៖ CL/ omovalley<br /><br /></p>