<p><span style="color: #000000;"><strong>ភ្នំពេញ៖</strong> ទីបំផុតអតីតតារាចម្រៀង ធ្លាប់មានឈ្មោះល្បីគួរសម ក្នុងផលិតកម្ម Rock លោក លំ សុក្រិត ពេលនេះ បានចេញមុខបំបែកភាពស្ងាត់ស្ងៀម របស់ខ្លួន ក្នុងទីផ្សារចម្រៀងវិញហើយ បន្ទាប់ពីតារាប្រុសរូបនេះ ឃ្លាតឆ្ងាយពីប្រិយមិត្តអ្នកគាំទ្រ អស់រយៈពេល ប្រមាណជាង២ឆ្នាំ ក្រោយផលិតកម្ម Rock សម្រេចបិទទ្វារ ផ្អាកផលិតបទចម្រៀង។</span></p>
<p><span style="color: #000000;">តាមការកត់សម្គាល់ លោក លំ សុក្រិត បានបាត់មុខអស់មួយខ្យល់ធំ ពីវិស័យចម្រៀង បន្ទាប់ពីផលិតកម្ម Rock ត្រូវបិទទ្វារផ្អាកចេញបទចម្រៀង កាលពីប៉ុន្មានឆ្នាំមុន ខណៈតារាចម្រៀងរួមដំបូលផ្សេងទៀត ស្ទុះស្ទារនាំគ្នា រត់រកទ្រនំថ្មីបន្តអាជីពចម្រៀង របស់ពួកគេរៀងៗខ្លួន។ ក្នុងនោះតារាចម្រៀង ខាន់ ជែមស៍ បានរសាត់មកទើរ លើផលិតកម្មសាន់ដេ ។ ចំណែកឯកញ្ញា សួស វីហ្សា និង កញ្ញា ផន នីដា បានរសាត់ ទៅដល់ផលិតកម្ម ហង្សមាស។</span></p>
<p><span style="color: #000000;">ត្បិតតែអតីតតារាចម្រៀង ផលិតកម្ម Rock លោក លំ សុក្រិត បានស្ងប់ស្ងាត់បាត់មុខ ពីសង្វៀនសិល្បៈ ចាប់តាំងពីពេលនោះក៏ពិតមែន ប៉ុន្តែរឿងដែលសំខាន់នោះ តារារូបនេះ មិនបានបាក់ទឹកចិត្ត និងបោះបង់ចោលឆ្នាំងចាស់នេះឡើយ។ ផ្ទុយមកវិញ សុក្រិត ក៏ខំប្រឹងស្វះស្វែងជាថ្មី រហូតរកបានទ្រនំជ្រកកោនឡើងវិញ គឺ ចូលច្រៀងឲ្យផលិតកម្ម Diamond Music។</span></p>
<p><span style="color: #000000;">ផ្តល់សម្ភាសន៍ ជាមួយគេហទំព័រ LookingTODAY កាលពីរសៀលថ្ងៃទី៤ ខែកញ្ញា ឆ្នាំ២០១៤នេះ តា រាចម្រៀងចំណូលថ្មី របស់ផលិតកម្ម Diamond Music លោក លំ សុក្រិត បាននិយាយប្រាប់ថា លោកពិតជា បានចុះកិច្ច សន្យារយៈពេលពីរឆ្នាំ ច្រៀងនៅក្នុងផលិតកម្ម Diamond ។ ពេ លនេះលោក ក៏មានបទចម្រៀងចំនួន១០ បទត្រៀម នឹងចេញលក់ ក្នុងពេលឆាប់ៗខាងមុខនេះ។</span></p>
<p><span style="color: #000000;">តារាចម្រៀង លំ សុក្រិត បាននិយាយបន្តថា ក្នុងចំណោមបទចម្រៀងទាំង១០ របស់លោក គឺមានចំនួន៤ បទ គ្រោងនិងចេញលក់ក្នុងទីផ្សារ នាពាក់កណ្តាលខែកញ្ញា ឆ្នាំ២០១៤នេះ។ ៤បទក្នុងអាល់ប៊ុម វ៉ុល ១៧ មានដូចជា៖ បទ ទោះសល់ពេលខ្លី ក៏នៅស្រឡាញ់អូន, កុំចេះតែហ៊ានបែក, សង្សារគេហ្នឹង វាយ៉ាងមិច?និង បទ សុនីតា ដែលបទនេះ និងចាក់ក្នុងរឿងភាគ របស់ស្ថានីយន៍ទូរទស្សន៍ ប៉ុស្តិ៍CTN ចំណងជើង សុនីតា។</span></p>
<p><span style="color: #000000;">ជាមួយគ្នានេះ តារាចម្រៀង លំ សុក្រិត បានបង្ហាញជំនឿចិត្ត ចំពោះចម្រៀងថ្មីៗ ចំនួន៤ បទ ត្រៀមចេញលក់លើទីផ្សារ នាពេលខាងមុខនេះថា លោកសង្ឃឹមថា អាចមានអ្នកគាំទ្រឡើងវិញ ដូចពីមុនព្រោះ លោកជឿជាក់ថាកេរ្តិ៍ឈ្មោះល្បីល្បាញលើវិថីសិល្បៈ បានដរាបណា មានបទល្អ និងទឹកដមសំឡេងពីរោះ។ ពិសេសមានបទចម្រៀង ចេញច្រើនលើទីផ្សារ ទើបមានភាពល្បីឈ្មោះ៕</span></p>
<p style="text-align: center;"><span style="color: #000000;"><img src="http://image.lookingtoday.com:81/lookingtoday/looking-images/news/2014/August/ID-100/Ravuth-129.jpg" alt="" width="600" /></span></p>
<p style="text-align: center;"><span style="color: #000000;"><img src="http://image.lookingtoday.com:81/lookingtoday/looking-images/news/2014/August/ID-100/Ravuth-130.jpg" alt="" width="600" /></span></p>
<p style="text-align: right;"><a href="http://lookingtoday.com/index.php/entertainment-general-news/33929--diamond-music.html" target="_blank"><span style="color: #000000;">ផ្តល់សិទ្ធដោយ ៖ ដើមអម្ពិល</span></a></p>