<p>អស្ថេរភាពនយោបាយនៅក្នុងអ៊ុយក្រែន បានចោទ ជាហានិភ័យដ៏ធំចំពោះសុវត្ថិភាព នៃឃ្លាំងអាវុធរបស់ប្រទេសនេះ និងអតីតសហភាពសូវៀត ហើយអាចបង្កជាគ្រោះគំរាមកំហែង ដ៏ធ្ងន់ធ្ងរសម្រាប់សុខសន្តិភាពរបស់ពិភពលោក។ នេះបើយោងតាមការចេញផ្សាយរបស់គេហទំព័រ ក្រសួងមហាផ្ទៃ កម្ពុជា ដែល បានដកស្រង់ប្រភពពីបណ្តាញព័ត៌មានបរទេស។</p>
<p><img src="http://image.dap-news.com:81/dap-news/dap-images/2014/February/id-009/S-078.jpg" alt="" width="550" /></p>
<p>អត្ថបទដែលចេញផ្សាយលើគេហទំព័ររបស់ក្រសួងមហាផ្ទៃកម្ពុជា គ្រាដែលស្ថានភាព នៅក្នុង ប្រទេសអ៊ុយក្រែន កំពុងស្ថិតក្នុងភាពតានទឹង អាចនឹងមានការអន្តរាគមន៍យោធាពីប្រទេសរុស្ស៊ីនោះ បានធ្វើការពណ៌នាបន្តថា អស្ថេរភាពនយោបាយនៅអ៊ុយក្រែន នៅតែមិនទាន់មានសញ្ញា នៃការ ថយកំដៅនោះទេ។ ការកើនឡើងជាប់ៗគ្នា នៅក្នុងអំពើហិង្សារវាងក្រុមអ្នកតវ៉ា និងប៉ូលីស។ អំពើ ហិង្សា ដែលកើនឡើងនៅក្នុងប្រទេសនេះ ដោយសារមួយ ផ្នែកបណ្តាល មកពីការបាត់ម្ចាស់ ការ ក្នុងការគ្រប់គ្រងឃ្លាំងអាវុធ ដែលរដ្ឋាភិបាលគ្រប់គ្រង។</p>
<p>លោក Oleksandr Yakimenko ប្រធាន នៃភ្នាក់ងារសន្តិសុខជាតិរបស់អ៊ុយក្រែន (SBU) បាននិយាយ ថាកាំភ្លើងជាង ១.៥០០ដើម និងគ្រាប់ចំនួន ១០០.០០០គ្រាប់បានធ្លាក់ចូលទៅក្នុងដៃរបស់ឧក្រិដ្ឋ ជន។</p>
<p>ព្រឹត្តិការណ៍នេះ គឺជាសញ្ញាប្រកាសអាសន្នចំពោះអសន្តិសុខឃ្លាំងអាវុធរបស់អ៊ុយក្រែន ពិសេស ប្រភេទអាវុធប្រកបដោយគ្រោះថ្នាក់។ ពួកឈ្មួញរត់ពន្ធអាវុធ នឹងក្តាប់ឱកាសនេះ ដើម្បីបញ្ចេញ អាវុធទាំងនេះ ទៅបរទេស ជាពិសេស គឺអាវុធមីស៊ីលឆ្លងទ្វីប, មីស៊ីលប្រឆាំងយន្តហោះ ជាដើម។</p>
<p>គួររំលឹកថា អ៊ុយក្រែន ជាផ្នែកមួយដ៏សំខាន់បំផុត នៃសហភាពសូវៀត ។ ពេលដែលសហភាព សូវៀត បានដួល រលំ, ឃ្លាំងអាវុធ ដ៏ធំជាច្រើនរបស់សូវៀត ស្ថិតនៅលើទឹកដីអ៊ុយក្រែន ក្នុងនោះ រួមមានទាំងអាវុធមហាប្រល័យផងដែរ។</p>
<p>ពេលដែលសហភាពសូវៀតដួលរលំនៅឆ្នាំ១៩៩១ អ៊ុយក្រែន បានប្រកាសឯករាជ្យភាព។ ក្នុងពេល នោះ ពួកគេបានក្លាយជាម្ចាស់កម្មសិទ្ធលើឃ្លាំងនុយក្លេអ៊ែរមួយដ៏ធំ គឺមានទំហំ ធំជាងឃ្លាំង នុយ ក្លេអ៊ែរ របស់ប្រទេសអង់គ្លេស, បារាំង និងប្រទេសចិនបូកបញ្ចូលគ្នា។ សរុបក្បាលគ្រាប់នុយក្លេអ៊ែរ មានចំនួន ៥.០០០គ្រាប់ ត្រូវបានរក្សាទុក នៅក្នុងឃ្លាំងលើទឹកដីអ៊ុយក្រែន នៅពេលពួកគេ បាន ប្រកាសឯករាជ្យ។</p>
<p><img src="http://image.dap-news.com:81/dap-news/dap-images/2014/February/id-009/S-079.jpg" alt="" width="550" /></p>
<p style="text-align: center;"><strong>KH-55 ធ្លាប់លក់ជាសម្ងាត់ទៅអោយចិន និង អៀរ៉ង់</strong></p>
<p>ក្រៅពីនេះ អ៊ុយក្រែននៅក្តាប់ចំនួនធំ នៃមីស៊ីលឆ្លងទ្វីប (ICBM), មីស៊ីលវាយប្រហារលើដី, មីស៊ីល យុទ្ធសាស្ត្រពី លើយន្តហោះ និងយន្តហោះទំលាក់គ្រាប់បែកជាយុទ្ធសាស្ត្រ ដែលបំពាក់ មីស៊ីល ១៣០ដើម ប្រភទ R-36 ICBM: SS-18 ដែលមានសមត្ថភាពបាញ់បានចម្ងាយ ១៦.០០០គីឡូម៉ែត្រ និង មីស៊ុល46 ICBM-23-SS-24Scalpel ដែលមានសមត្ថភាពបាញ់បានចម្ងាយ ១០.០០០គីឡូម៉ែត្រ។</p>
<p>ប្រសិនបើអាវុធ «មហាប្រល័យ» នេះធ្លាក់ចូលទៅក្នុងដៃ របស់ភេរវករ ឬប្រទេស «អមិត្ត» នោះ នឹងដាក់នូវការ គំរាមកំហែងជាច្រើនមួយដល់សន្តិសុខពិភពលោក។ នៅក្នុងបរិបទ នៃវិបត្តិ នយោ- បាយ និងកង្វះថវិកានោះ តើគេអាចធានាថា អាវុធទាំងនេះនឹងមានការរក្សាទុកដោយសុវត្ថិភាព ដែរឬ ទេ?៕</p>
<p><img src="http://image.dap-news.com:81/dap-news/dap-images/2014/February/id-009/S-080.jpg" alt="" width="550" /></p>
<p style="text-align: center;"><strong>OTR-21 TOCHKA គឺជាប្រភេទមីស៊ីលអន្តរទ្វីប ដែលក្លាយជាគោលដៅរបស់ពួករត់ពន្ធអាវុធចង់បានបំផុត</strong></p>
<p style="text-align: center;"><strong><br /></strong></p>
<p style="text-align: right;">ផ្តល់សិទ្ធិ ៖ ដើមអំពិល</p>