<div class="article-content">
<p><strong>កូរ៉េខាងជើង៖</strong> យោងតាម សារព័ត៌មាន ឯករាជ្យមួយ បានចេញផ្សាយ កាលពីថ្ងៃចន្ទ ទី២៧ ខែមករា ឆ្នាំ ២០១៤ កន្លងទៅនេះថា រដ្ឋាភិបាលកុម្មុយនិស្តកូរ៉េខាងជើង បានកាត់ទោសប្រហារជីវិតដោយ ផ្ទាល់ចំពោះញាតិសណ្តាន ទាំងអស់ ដែល ជាប់ពាក់ព័ន្ធទៅនឹងពូថ្លៃរបស់មេដឹកនាំ គីម ជុងអ៊ុន ដែលត្រូវបានកាត់ទោសប្រហារជីវិត កាលពីខែធ្នូ កន្លងមក នេះ។</p>
<p>សេចក្តីរាយការណ៍ខាងលើនេះ បានបញ្ជាក់ទៀតថា ការសម្លាប់រាល់ញាតិសណ្តានបែបនេះ គឺ កូរ៉េខាងជើង មានគោលបំណង ចង់ជីកស្មៅ ជីកទាំងឬស ចំពោះក្រុមដែលត្រូវបានគេចោទ ប្រកាន់ថាក្បត់ជាតិ និង មានគោល បំណងចង់ដណ្តើមអំណាចពីមេដឹកនាំកំពូលនោះ។</p>
<p>ប្រភពមិនបញ្ចេញឈ្មោះមួយបាន ប្រាប់សារព័ត៌មានយ៉ុនហាប់ របស់កូរ៉េខាងត្បូងថា “ការ កាត់ទោសប្រហារជីវិត ទាំងកម្រោលនេះ ត្រូវបានធ្វើឡើងទៅលើញាតិសណ្តានដែលជាប់ ពាក់ព័ន្ធទាំងអស់របស់ពូថ្លៃលោក គីម ជុងអ៊ុន គឺលោក ចាង សុងថេក។”</p>
<p>គួរបញ្ជាក់ថា ញាតិសណ្តានមួយចំនួនរបស់លោក ចាង សុងថេក ត្រូវបានរដ្ឋាភិបាលកូរ៉េខាង ជើង កោះហៅ ជាបន្ទាន់មកកាន់ទីក្រុងព្យុងយ៉ាង ហើយក្នុងនោះរួមមានអគ្គរដ្ឋទូតរបស់ខ្លួន នៅប្រទេសគុយបា និង ម៉ាឡេស៊ី, ប្អូនស្រីបង្កើតរបស់លោក ចាង រួមទាំងស្វាមី, ក្មួយប្រុស របស់លោក ចាង រួមទាំងកូនប្រុសពីរនាក់ទៀត ត្រូវបាន គេសម្លាប់។</p>
<p>ដោយឡែកកូនប្រុស កូនស្រី និង ចៅ នៃបងប្រុសទាំងពីររបស់លោកចាង ក៏ត្រូវបានគេ ប្រហារជីវិតផងដែរ ប៉ុន្តែ មិនមានព័ត៌មានថា ពួកគេស្លាប់ដោយរបៀបណានោះទេ។ ចំពោះ មនុស្សផ្សេងទៀតត្រូវបានគេបាញ់សម្លាប់ ដោយកាំភ្លើងដៃនៅចំពីមុខ មនុស្សម្នាទូទៅ នៅ គេហដ្ឋានរបស់ញាតិសណ្តានលោកចាង ទាំងនោះតែម្តង។</p>
<p>គួរបញ្ជាក់ថាលោក ចាង សុងថេក ត្រូវជាពូថ្លៃរបស់លោក គីម ជុងអ៊ុន ហើយបន្ទាប់ពីឪពុក របស់លោក គឺលោក គីម ជុងអ៊ីល ទទួលមរណភាពកាលពីខែធ្នូឆ្នាំ ២០១១ នោះ លោក ចាង ត្រូវបានតែងតាំងឲ្យដើរតួនាទីជាទីប្រឹក្សា ផ្ទាល់ ជួយជ្រោលជ្រែងអំណាចរបស់លោក គីម ជុងអ៊ុន ជាក្មួយ។ លោក ត្រូវបានក្មួយខ្លួនកាត់ទោស ប្រហារជីវិត ក្រោមបទចោទប្រកាន់ថា បានលួចលាក់ប្រព្រឹត្តទង្វើក្បត់ និង គ្រោងដណ្តើមអំណាច ៕</p>
<p style="text-align: center;"><img src="http://image.dap-news.com:81/dap-news/dap-images/2014/January/id-078/Lay-417.jpg" alt="Photo by DAP-News" width="500" /></p>
<p style="text-align: right;">ផ្តល់សិទ្ធិដោយ៖ ដើមអម្ពិល</p>
</div>