<div class="article-content">
<p><strong>ភ្នំពេញ៖</strong> ជនសង្ស័យ បុរស នារី ពីររូបត្រូវកម្លាំង កងរាជអាវុធហត្ថ ខណ្ឌចំការមន ធ្វើការឃាត់ខ្លួន នៅម៉ោង ប្រមាណ២ រំលងអាធ្រាត្រ ឈានចូលថ្ងៃទី១១ ខែសីហា ឆ្នាំ២០១៤ នៅម្តុំចំណុចមុខ វត្តបុទុម ខណៈដែលកំពុង ជិះម៉ូតូមួយគ្រឿង ដែលបក្ខពួកខ្លួន បានលួចកាច់ក បានសម្រេចនៅកោះពេជ្រ។</p>
<p>តាមប្រភពពីមន្រ្តី កងរាជអាវុធហត្ថ ខណ្ឌចំការមន បានឲ្យដឹងថា ជនសង្ស័យទាំងពីរនោះ ទី១.ឈ្មោះ ឃុន ឡាលីន ភេទស្រី អាយុ២៦ឆ្នាំ មុខរបរអ្នកលក់មីឆា ស្នាក់នៅសង្កាត់ ទន្លេបាសាក់ ខណ្ឌចំការមន និងទី២.ឈ្មោះ ហុក ណារិន ភេទប្រុស អាយុ១៧ឆ្នាំ ស្នាក់នៅភូមិតាស្ករ ឃុំសារិកាកែវ ស្រុកល្វាឯម ខេត្តកណ្តាល។</p>
<p>ចំណែកឯជនរងគ្រោះ ឈ្មោះ ជា ភ័ក្តី មុខរបរជាអ្នកសិល្បៈ មានស្រុកកំណើតនៅ ភូមិបារាជ ឃុំស្វាយជ្រុំ ស្រុក ខ្សាច់កណ្តាល ខេត្តកណ្តាល។</p>
<p>បើតាមសាក្សីនៅកន្លែងកើតហេតុ បានឲ្យដឹង មុនពេលកើតហេតុ ជា ភ័ក្តីនេះ បានទុកម៉ូតូនៅខាងមុខ មហោស្រប កោះពេជ្រ រួចខ្លួនឡើងសម្តែង ខណៈនោះ ជនសង្ស័យ ហុក ណារិន ក៏បានធ្វើសកម្មភាពកាច់ក របស់ជនរងគ្រោះ ម៉ាក ស៊ុយស៊ីគី និច ពណ៌ស ពាក់ស្លាក់លេខ ភ្នំពេញ 1BP-6483។</p>
<p>សាក្សីបានបន្តទៀតថា ក្រោយពីកាច់កម៉ូតូ បានសម្រេចហើយ ជនសង្ស័យម្នាក់ទៀតឈ្មោះ ឡាលីន បានទៅ យកម៉ូតូពី ហុក ណារិន ជិះក្នុងគោលបំណងធ្វើអ្វីមួយ ស្រាប់តែពេល ជិះចេញពីកោះពេជ្រទៅ កម្លាំងកង រាជអាវុធហត្ថ ខណ្ឌចំការមន មានការសង្ស័យដោយ ម៉ូតូពុំមានស្លាក់លេខ ក៏ឃាត់ហើយធ្វើការសួរនាំ ទើបជន សង្ស័យសារភាព ហើយឈានដល់ការឃាត់ខ្លួន នាំមកបញ្ជាការដ្ឋាន កងរាជអាវុធហត្ថខណ្ឌតែម្តង ៕</p>
<p style="text-align: center;"><img src="http://image.dap-news.com:81/dap-news/dap-images/2014/August/id-078/Lay-191.jpg" alt="Photo by DAP-News" width="550" /></p>
<p style="text-align: center;"><img src="http://image.dap-news.com:81/dap-news/dap-images/2014/August/id-078/Lay-189.jpg" alt="Photo by DAP-News" width="550" /></p>
<p style="text-align: center;"><img src="http://image.dap-news.com:81/dap-news/dap-images/2014/August/id-078/Lay-190.jpg" alt="Photo by DAP-News" width="550" /></p>
</div>
<p style="text-align: right;"><a href="http://www.dap-news.com/2011-06-14-02-39-55/92524-2014-08-11-04-28-12.html" target="_blank">ផ្តល់សិទ្ធដោយ ៖ ដើមអម្ពិល</a></p>