<p><strong>ភ្នំពេញៈ</strong> បន្ទាប់ពីគេហទំព័រកម្សាន្ត កំពុងតែមានប្រជាប្រិយភាព LookingTODAY បានចុះផ្សាយអត្ថបទមួយ មានចំណងជើងថា “ លីលី បែកធ្លាយដំណឹងស្នេហ៍ ជាមួយកូន ប្រុសមន្ត្រីធំ” កាលពីពេលថ្មីៗនេះរួចមក មិនទាន់បានប៉ុន្មានថ្ងៃផង ស្រាប់តែម្ចាស់សាម៉ីខ្លួន កញ្ញា លីលី បានបញ្ចេញប្រតិកម្ម ដោយបដិសេធ ចំពោះព័ត៌មានលេចឮបែបនេះថា មិនមែនជារឿងពិតនោះទេ ហើយ នាងក៏មិនហ៊ានទទួលស្នេហ៍ ពីកូនអ្នកមានទ្រព្យ ឬក៏ជាកូនមន្ត្រីធំអ្វីឡើយ ។</p>
<p>ជួបជាមួយ LookingTODAY តាមទូរស័ព្ទ នៅថ្ងៃទី១៤ ខែមីនា ឆ្នាំ២០១៤ នេះតារាសម្តែងស្រី ដែលកំពុងតែមានទីផ្សារការងារសិល្បៈ ស្ទើររកពេលសម្រាកគ្មាន កញ្ញា លីលី បានប្រាប់ឲ្យដឹងថា នាងមិនសប្បាយចិត្តទេ នៅពេលមានព័ត៌មានបែបនេះ លេចឮលើនាង ទាំងដែលរឿង មិនមែនជាការពិត។ នាងក៏ចង់ឆ្លៀតពេល ប្រកាសជាសាធារណៈដែរថា បេះដូងនាងនៅទំនេរគ្មាន ម្ចាស់បេះដូង ឬក៏កូនមន្ត្រីណាតាមស្រឡាញ់នោះទេ។</p>
<p>តារាចម្រៀង និងសម្តែងវ័យក្មេងសាច់ស ទ្រលុកទ្រលន់ កញ្ញា លីលី បានប្រាប់ឲ្យដឹងថា “ចំពោះការចុះផ្សាយបែបនេះ វាពិតជាធ្វើឲ្យកិត្តិយសខ្ញុំ ប៉ះពាល់ខ្លាំង ធ្វើឲ្យអ្នកគាំទ្រមានការយល់ច្រឡំ គិតថា ខ្ញុំមិនល្អ ។ម្យ៉ាងរឿងនេះក៏អាចធ្វើឲ្យបាត់ប្រជាប្រិយភាពខ្ញុំដូចគ្នា ព្រោះពេល នេះសន្ទុះកេរ្តិ៍ឈ្មោះខ្ញុំ កំពុងតែលេចធ្លោ ចាប់ផ្តើមមានជោគជ័យ ដូច្នេះហើយទើបខ្ញុំត្រូវប្រញាប់ ចេញ មុខបកស្រាយ ទាក់ទងរឿងបែបនេះ វិញភ្លាមៗ ដើម្បីកុំឲ្យមានការភ័ន្តច្រឡំ ” ។</p>
<p>អតីតពិធីការិនីក្នុងកម្មវិធី "ដំណឹងហួសចិត្ត" របស់បណ្តាញស្ថានីយទូរទស្សន៍ CTN រូបនេះ បានប្រាប់ឲ្យដឹងបន្ថែមទៀតថា “សម្រាប់រឿងមួយទៀត នៅក្នុងអត្ថបទដែលបានចុះផ្សាយ គឺគេបានសរសេរថា ខ្ញុំមានរថយន្តមកចាំទទួល ជាប្រចាំនោះ មិនមែនជារឿងពិតទេ ខ្ញុំមានរថយន្តផ្ទាល់ខ្លួន មិនចាំបាច់គេយករថយន្តមកទទួល ទៅញុំាអីដូចការចុះផ្សាយទេ។ ខ្ញុំក៏ចង់ប្រកាសផងដែរថា ខ្ញុំគ្មានសង្សារទេ ជាពិសេសជាកូនអ្នកមានទ្រព្យ ឬកូនមន្ត្រីនេះតែម្តង គឺខ្ញុំមិនហ៊ានមានទំនាក់ទំនងស្នេហ៍ ជាមួយកូនអ្នកធំទេ ” ។</p>
<p>ទន្ទឹមជាមួយគ្នានេះ កញ្ញា លីលី ក៏បានធ្វើការបញ្ជាក់ថា បើសិនជានាង មានម្ចាស់បេះដូង នាងនឹងប្រកាសជាចំហរ ប្រាប់ជាសាធារណៈ ពោលគឺមិនលាក់លៀមពីក្រសែភ្នែកមហាជនទេ ៕</p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/March/id-065/PISETH-0128.jpg" alt="" width="600" /></p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/March/id-065/PISETH-0129.jpg" alt="" width="600" /></p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/March/id-065/PISETH-0130.jpg" alt="" width="600" /></p>
<p style="text-align: right;"><a href="http://www.lookingtoday.com/index.php/entertainment-general-news/28528-2014-03-14-07-58-18.html" target="_blank">ផ្តល់សិទ្ធដោយ ៖ ដើមអម្ពិល</a></p>