<p><span style="color: #000000;"><strong>ភ្នំពេញ ៖</strong> ក្នុងករណីដែលស្រ្តីម្នាក់ បានបើករថយន្តម៉ាក់ទំនើប BMW ក្នុងស្ថានភាពស្រវឹង ជោគជាំហើយ ជ្រុលទៅបុកដើមឈើ និងអង្គរក្ស ចំនួន២នាក់ នៅមុខភូមិគ្រឹះរបស់ សម្តេចតេជោ ហ៊ុន សែន នាយករដ្ឋមន្រ្តី នៃប្រទេសកម្ពុជា កាលពីពេលថ្មីនេះ គឺសម្តេចបានលើកឡើងថា សម្តេចមិនប្រកាន់ ទោសពៃអ្វីឡើយ ប៉ុន្តែបើនៅអាម៉េរិកវិញ ត្រូវបាញ់សម្លាប់ចោលហើយ។</span></p>
<p><span style="color: #000000;">សម្តេចតេជោ ហ៊ុន សែន បានមានប្រសាសន៍ថា “គេបើកឡានបុករបងផ្ទះនាយករដ្ឋមន្រ្តី តើអ្នកបើកបរ ខុស ឬខ្ញុំធ្វើផ្ទះខុស …ហួសចិត្តតែម្តង ហើយមកសុទ្ធតែស្រីស្អាត២នាក់ បើករថយន្ត BMWសំណាងហើយក្មួយ។ ខ្ញុំក៏អត់ដឹងដែរ។ មកពីស្ទឹងត្រែងវិញទើបបានដឹង។ ខ្ញុំបានទូរស័ព្ទទៅ ប្រធានតុលាការអំពីករណីនេះ ថា អាចនៅក្រៅឃុំបានទេ។ គាត់ប្រាប់ មកវិញថា បាន។ ស្រវឹងមកបុកផ្ទះនាយករដ្ឋមន្រ្តី ព្រោះវាជានីតិវិធី ធម្មតាបង់ប្រាក់។ ហើយជារឿងផ្ទាល់ខ្លួនមិនពាក់ព័ន្ធនឹងផ្លូវច្បាប់កុំឲ្យគេថា អាងជានាយករដ្ឋ មន្រ្តីយកកូន គេទៅឃុំ”។</span></p>
<p><span style="color: #000000;">សម្តេចនាយករដ្ឋមន្រ្តីបន្ថែមថា សំណាងហើយដែលអង្គរក្សមិនបាញ់សម្លាប់ព្រោះមាន រឿងខ្លះដាក់គ្រាប់បែកអត្តឃាតជាច្រើនករណី។សម្តេចថា ពាក់ព័ន្ធនឹងករណីនេះដែរ មានស្រ្តីម្នាក់ជិះរថយន្តជិតសេតវិមានរបស់ប្រធានាធិបតីសហរដ្ឋអាម៉េរិកលោក ប៉ារ៉ាក់ អូប៉ាម៉ា ប៉ូលីសបាន ហៅឲ្យឈប់ប៉ុន្តែមិនព្រមឈប់បាញ់ក៏សម្លាប់ចោលតែម្តង។</span></p>
<p><span style="color: #000000;">សម្តេចបន្តថា អង្គរក្សទាំងពីរនាក់ដែលត្រូវរងរបួសដោយ សាររថយន្តនោះ បានបែកប្រអប់ជើង ហើយបច្ចុប្បន្នកំពុងសម្រាក់ ព្យាបាលនៅមន្ទីរ ពេទ្យកាល់ម៉ែត្រ។</span></p>
<p><span style="color: #000000;">សូមបញ្ជាក់ថា កាលពីម៉ោង ២ និង១០នាទីរំលងអាធ្រាត្រឈានចូលថ្ងៃទី០១ ខែមេសា ឆ្នាំ២០១៥ កន្លងទៅ នេះ នារីស្រស់សោភា អ៊ុង កុលហ្សានិច អាយុ២៦ឆ្នាំ រួមនិងមិត្តភក្តិ២ រូបផ្សេងទៀត ដែលផឹកស៊ីស្រវឹងជោកជាំ បានបើករថយន្ត BMW ស៊េរីទំនើប ពណ៌ខ្មៅ ពាក់ស្លាកលេខ ភ្នំពេញ 2AE-1113 យ៉ាងលឿន តាមបណ្តោយ ផ្លូវលេខ២៦៨ ក្នុងទិសដៅ ពីកើតទៅលិច បណ្តាលឱ្យរ៉េពេញផ្លូវ ហើយជ្រុលទៅបុកអង្គរក្ស ដែលឈរយាមនៅ ខាងមុខភូមិគ្រឹះសម្តេចនាយករដ្ឋមន្រ្តី បណ្តាលឲ្យរងរបួសធ្ងន់ ២នាក់ ក្នុងនោះមានថ្នាក់ផ្កាយ ២នាក់ ព្រមទាំង ជ្រុលទៅបុកដើមឈើបាក់អស់មួយដើម និង បន្តជ្រុលបុករះម៉ូតូចំនួន ៤គ្រឿងទៀតផង។</span></p>
<p><span style="color: #000000;">នារី អ៊ុង កុលហ្សានិច គឺជាអ្នករកស៊ីលក់រថយន្ត BMW ត្រូវបានសមត្ថកិច្ចចោទប្រកាន់ ៣ករណី រួមមាន បើកបរ ក្នុងស្ថានភាពស្រវឹង ធ្វើឱ្យខូចខាត ទ្រព្យសម្បត្តិសាធារណៈ និង បង្ករបួសស្នាម៕</span></p>
<p><span style="color: #000000;"><a class="thickbox" title="" href="/FileManager/Commons/2015/4/6/4-6-2015-4-16-12-pm-06-04-2015--16-21-49.png"><img src="/FileManager/Articles/mce/2015/4/6/4-6-2015-4-16-12-pm-06-04-2015--16-21-49.png" alt="" /></a></span></p>
<p style="text-align: right;"><span>ផ្ដល់សិទ្ធដោយ៖ ដើមអម្ពិល</span><span style="color: #000000;"><br /></span></p>