<div class="ja-content-main">
<div class="article-content">
<p><strong>ភ្នំពេញ ៖</strong> សាលាដំបូង រាជធានីភ្នំពេញ កាលពីថ្ងៃទី២ ខែកក្កដា បានបើកសវនាការ ជំនុំជម្រះ និងកាត់ទោស ជាបចោទម្នាក់ ដែលជាអតីត ប្រធានទីផ្សារម្នាក់ និង ជាអ្នកប្រមូល លុយពីអតិឋិជន នៃអង្គការបឹងបៃតង ពីបទ«រំលោភលើ ទំនុកចិត្ត» ជាប់ពាក់ព័ន្ធ នឹងករណី យកលុយពីអង្គការ ចំនួនជាង៨ម៉ឺនដុល្លារ ដែលប្រមូលបានពី អតិឋិជន ដែលខ្ចីប្រាក់ កម្ចីពីអង្គការ យកទៅលេងល្បែង នៅកាស៊ីណូចាញ់ គ្មានសល់អ្វី។ </p>
<p>លោកចៅក្រម អ៊ី ឋាវរៈ ចៅក្រមជំនុំជម្រះ នៃសាលាដំបូង រាជធានីភ្នំពេញ បានឲ្យដឹងថា ជនជាប់ចោទរូបនេះមាន ឈ្មោះ ហង្ស សុជាតិ ភេទប្រុស អាយុ៣៥ឆ្នាំ មានមុខរបរមុនចាប់ខ្លួន ជាបុគ្គលិក និងជាប្រធានទីផ្សារ នៃអង្គការបឹងបៃតង ដែលមានស្នាក់ការ នៅក្នុង រាជធានីភ្នំពេញ ។</p>
<p>ជនជាប់ចោទត្រូវ បានចោទប្រកាន់ពី តំណាងអយ្យការពី«រំលោភលើទំនុកចិត្ត» តាមមាត្រា៣៩០ និង ៣៩២ នៃ ក្រមព្រហ្មទណ្ឌកម្ពុជា។ ជននេះ ត្រូវបានចាប់ខ្លួន កាលពីថ្ងៃ២១ ខែមករា ឆ្នាំ២០១៤ តាមបណ្តឹងរបស់ប្រធាន អង្គការបឹង បៃតង ។ </p>
<p>យោងតាមអង្គហេតុ នៃសំណុំរឿងព្រហ្មទណ្ឌនេះ កាលពីកំឡុងខែធ្នូ ឆ្នាំ២០១៣ និង ខែមករា ឆ្នាំ ២០១៤ ជនជាប់ចោទ ឈ្មោះ ហង្ស សុជាតិ ដែលកាលនោះ ជាបុគ្គលិក និងជាប្រធានទីផ្សារ នៃអង្គការ បឹងបៃតង បានដើរប្រមូលលុយ ពីអតិថិជនដែលខ្ចីលុយពី អង្គការបាន ចំនួនជាង៨ម៉ឺនដុល្លារ ។</p>
<p>ប៉ុន្តែ ឈ្មោះ ហង្ស សុជាតិ មិនបានយកលុយ ទាំងនោះ ឲ្យអង្គការនោះទេ តែបានយកវា ទៅលេងល្បែង កាស៊ីណូ ចាញ់ល្បែង ទាំងអស់។ ទង្វើរបស់ ជនជាប់ចោទនេះ បានធ្វើឲ្យអង្គការ របស់គាត់ខាត បង់ប្រាក់កាក់អស់ រាប់សិបម៉ឺនដុល្លារ អាមេរិក ។</p>
<p>នៅក្នុងសំណុំរឿងនេះ ភាគី ដើមបណ្តឹង បានប្តឹងទាមទារថ្លៃខូច ខាតចំនួនជាង៨ម៉ឺនដុល្លារ និងជម្ងឺចិត្តចំនួន ៧ម៉ឺនដុល្លារអាមេរិក ។ សាលាដំបូងរាជធានីភ្នំពេញ នឹងប្រកាសសាលក្រម នៃ សំណុំរឿងនេះ នៅរសៀល ថ្ងៃ ទី ១៥ ខែ កក្កដា ២០១៤ខាងមុខនេះ ៕</p>
<p><img src="http://image.dap-news.com:81/dap-news/dap-images/2014/July/id-067/CH-00420.jpg" alt="" width="500" /></p>
<p style="text-align: right;"><br />ផ្តល់សិទ្ធិដោយ៖ ដើមអម្ពិល</p>
<div></div>
</div>
</div>