<p><span style="color: #000000;"><strong>ភ្នំពេញ៖</strong> ក្រោយម្ចាស់ផ្ទះកម្ពុជា ផ្ដល់កាដូ ៣គ្រាប់ ជូនក្រុមភ្ញៀវម៉ាកាវ ក្នុងជើងទី១ នៃវគ្គជម្រុះពានរង្វាន់ World Cup ឆ្នាំ២០១៨ កាលពីម្សិលមិញ គ្រូបង្វឹកក្រុមជម្រើសជាតិម៉ាកាវ ក៏បានសម្លឹងមើល អំពីសមត្ថភាព កីឡាករលេចធ្លោ មួយចំនួនរបស់កម្ពុជា ដើម្បីត្រៀមទប់ទល់ ពេលជួបគ្នា ក្នុងជើងទី២ នៅលើទឹកដី ម៉ាកាវ វិញផងដែរ ។</span></p>
<p><span style="color: #000000;">លោក Joseph Tam Cao San គ្រូបង្វឹកក្រុមជម្រើសជាតិម៉ាកាវ បានថ្លែងក្នុងសន្និសីទ សារព័ត៌មាន បន្ទាប់ពីក្រុមខ្លួន បរាជ័យក្រោមថ្វីជើង ក្រុមជម្រើសជាតិកម្ពុជា យ៉ាងចាស់ដៃភ្លាមៗថា ទោះបីជើងទី២ ការប្រកួតនឹងធ្វើឡើង នៅលើទឹកដីម៉ាកាវ ក៏ពិតមែន ប៉ុន្ដែបើប្រៀបធៀប សមត្ថភាពកីឡាករ ក្នុងការប្រកួតជើងទី១នេះ កីឡាករម៉ាកាវ មិនអាចប្រៀបនឹងកីឡាករកម្ពុជា បាននោះទេ ទាំងល្បឿន កម្លាំង និងបច្ចេកទេស ។</span></p>
<p><span style="color: #000000;">លោកបានបញ្ជាក់យ៉ាង ដូច្នេះថា «ជួបគ្នាជើងទី១នេះ កីឡាករខ្ញុំល្អតែតង់ទី១ទេ ព្រោះកម្លាំងនៅមាន ប៉ុន្ដែចូលដល់តង់ទី២ កម្លាំងចាប់ផ្ដើមធ្លាក់ចុះ ស្របពេលកីឡាករកម្ពុជា កាន់តែមានសន្ទុះខ្លាំង ធ្វើឲ្យខ្ញុំជាគ្រូបង្វឹក ពិបាកនឹងរកយុទ្ធសាស្រ្ដ ទប់ទល់ណាស់ ។ ក្នុងនោះកីឡាករកម្ពុជា ៣-៤នាក់ ដែលខ្ញុំព្រួយបារម្ភ ពេលទៅប្រកួត នៅម៉ាកាវ គឺមានកីឡាករ ពាក់អាវលេខ៧ (ប្រាក់ មុន្នីឧត្តម), លេខ៩ (ឃួន ឡាបូរ៉ាវី), លេខ១១ (ចាន់ វឌ្ឍនាកា) និងកីឡាករពាក់អាវលេខ១៧ (ឈិន ឈឿន)» ។</span></p>
<p><span style="color: #000000;">គ្រូបង្វឹករូបនេះ បានបន្ដថា កីឡាករកម្ពុជាទាំង ៤រូប មានល្បឿនលឿន ហើយមានទិចនិចខ្ពស់ទៀត ដូច្នេះពេលទៅប្រកួត នៅលើទឹកដីម៉ាកាវ លោកនឹងផ្លាស់ប្ដូរ យុទ្ធសាស្ដ្រលេង ដើម្បីការពារពួកគេទាំង ៤នាក់ ។ ដូច្នេះជើងទី២ លោកនឹងប្រមូលផ្ដុំ កីឡាករហ្វឹកហាត់ ដោយយកចិត្តទុកដាក់ ខ្ពស់បំផុត ដើម្បីស្វែងរកជ័យជំនះ ត្រឡប់មកវិញ ។ ចាំមើលតើលោក Joseph Tam Cao San នឹងប្រើយុទ្ធសាស្ដ្រអ្វី ដើម្បីការពារកីឡាករឆ្នើមទាំង ៤នាក់ របស់កម្ពុជា ពេលជួបគ្នាក្នុងជើងទី២?</span></p>
<p><span style="color: #000000;">គួរបញ្ជាក់ថា ជំនួប ជុំទី១ ជើងទី២ នៃវគ្គជម្រុះពានរង្វាន់បាល់ទាត់ ពិភពលោក FIFA World Cup ឆ្នាំ២០១៨ នៅប្រទេសរុស្ស៊ី ប្រចាំទ្វីបអាស៊ី រវាងក្រុមបាល់ទាត់ ជម្រើសជាតិកម្ពុជា និងម៉ាកាវនោះ នឹងធ្វើឡើងនៅថ្ងៃទី១៧ ខែមីនា ខាងមុខនេះ នៅទីក្រុងម៉ាកាវ ប្រទេសចិន ៕</span></p>
<p><span style="color: #000000;"><a class="thickbox" title="" href="/FileManager/Commons/2015/3/13/3-13-2015-11-56-20-am-13-03-2015--16-20-33.png"><span style="color: #000000;"><img src="/FileManager/Articles/mce/2015/3/13/3-13-2015-11-56-20-am-13-03-2015--16-20-33.png" alt="" /></span></a></span></p>
<p style="text-align: right;"><span style="color: #000000;">ផ្ដល់សិទ្ធដោយ៖ ដើមអម្ពិល</span></p>