<div class="ja-content-main">
<div class="article-content">
<p><strong>ភ្នំពេញ៖</strong> គណៈកម្មាធិការរៀបចំ បុណ្យជាតិ និងអន្តរជាតិ បានសាកល្បងដើរក្បួន សម្រាប់ដង្ហែព្រះបរមអដ្ឋិ ព្រះករុណា ព្រះបាទសម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតា "ព្រះបរមរតនកោដ្ឋ" នៅថ្ងៃទី១១ ខែកក្កដា ឆ្នាំ២០១៤ខាងមុខ។</p>
<p>បន្ទាប់ពីបញ្ចប់ពិធីសាកល្បង នៅថ្ងៃទី៣ ខែកក្កដា នេះ លោក ឃួង ស្រេង អភិបាលរងរាជធានីភ្នំពេញ បានមានប្រសាសន៍ប្រាប់ ក្រុមអ្នកសារព័ត៌មានថា សម្រាប់ការ ដង្ហែព្រះបរមអដ្ឋិខាងមុខ សាលារាជធានី បានរៀបចំផ្លូវបន្ថែមទៀត ដោយធ្វើយ៉ាងណា ឲ្យកម្មវិធីមានភាពសុក្រឹត និងទទួលបានកោតសរសើរ ពីថ្នាក់ជាតិ-អន្តរជាតិ។</p>
<p>លោកបានបន្តថា “ការហែហ្នឹង ដូចយើងបានឃើញហើយ គឺហែព្រះបរមអដ្ឋិហ្នឹង គឺចេញពីទ្វារជ័យ ហើយបត់ឆ្វេងទៅផ្លូវ ១៨៤ ទៅផ្លូវនរោត្តម រហូតដល់ផ្លូវសុធារស ទៅព្រះសីហនុ ទៅផ្លូវសុធារស ហើយត្រឡប់មកព្រះវិហារព្រះកែវមរកត”។</p>
<p>អភិបាលរងបានបន្ថែមថា ប្រជាពលរដ្ឋដែលរស់នៅរាជធានីភ្នំពេញ នឹងចូលរួមដង្ហែព្រះបរមអដ្ឋិ មានចំនួន ២០.០០០នាក់ រួមទាំងមន្ត្រីរាជការផងដែរ។</p>
<p>ក្នុងរយៈពេល ១ ថ្ងៃនៃការតម្កល់ ព្រះបរមអដ្ឋិ ព្រឹក ថ្ងៃ យប់ មានកម្មវិធីសាសនា កម្មវិធីគោរពព្រះ វិញ្ញាណក្ខន្ធ កម្មវិធីបាញ់កាំជ្រួច និងមាន កម្មវិធី បាញ់កាំភ្លើងធំ នៅពេលដង្ហែ និងបញ្ចុះព្រះបរមអដ្ឋិ។</p>
<p>សូមបញ្ជាក់ថា ព្រះរាជកម្មវិធីនេះ រៀបចំឡើងរយៈពេល ៣ថ្ងៃ ចាប់ពីថ្ងៃទី១០ ដល់ថ្ងៃទី១២ ខែកក្កដា ដោយនៅព្រឹកថ្ងៃទី១០ ខែកក្កដា នៅមុខព្រះបរមរាជវាំង មានពិធីរាប់បាត្រប្រគេនព្រះសង្ឃ ៣.៦០០ អង្គ ហើយនៅថ្ងៃទី១១ ខែ កក្កដា ព្រះរាជពិធីដង្ហែ និងតម្កល់ ព្រះបរមអដ្ឋិ ទីតាំងនៅ ព្រះចេតិយ នៃបរិវេណព្រះវិហារព្រះកែវមរកត និងនៅព្រឹកថ្ងៃទី ១២ ខែ កក្កដា ពិធីរាប់បាតព្រះសង្ឃ ៣.៦០០ អង្គ ធ្វើនៅមុខព្រះវិហារព្រះកែវមរកត៕</p>
<p><img src="http://image.dap-news.com:81/dap-news/dap-images/2014/July/id-011/Hong-0065.jpg" alt="" width="500" /></p>
<p><img src="http://image.dap-news.com:81/dap-news/dap-images/2014/July/id-011/Hong-0064.jpg" alt="" width="500" /></p>
<p><img src="http://image.dap-news.com:81/dap-news/dap-images/2014/July/id-011/Hong-0066.jpg" alt="" width="500" /></p>
<p style="text-align: right;"><br />ផ្តល់សិទ្ធិដោយ៖ ដើមអម្ពិល</p>
<div></div>
</div>
</div>