<div class="article-content">
<p><strong>សៀមរាប៖</strong> អាជ្ញាធរអប្សរា បានចេញសេចក្តីប្រកាសព័ត៌មាន មួយឲ្យដឹងថា នៅថ្ងៃទី១២ ខែសីហា ថាមានឧបទ្ទវហេតុមួយបានកើតឡើង នៅខ្លោងទ្វារទន្លេអុំ នៃអតីតក្រុងអង្គរធំ បង្កដោយភ្ញៀវទេសចរជនជាតិកូរ៉េម្នាក់ ធ្វើឲ្យព្រះកេសយក្សធ្វើពីស៊ីម៉ង់ ធ្លាក់របូតពីដងខ្លួន។</p>
<p>ភ្ញៀវកូរ៉េនោះឈ្មោះ គីម ជុនហុង អាយុ ២២ឆ្នាំ ជានិស្សិតមកទស្សនាអង្គរ តាមរយៈព្រះវិហារគ្រិស្តសាសនាមួយ ប្រចាំនៅប្រទេសកម្ពុជាឈ្មោះ UN Cheon First Church បានឡើងថតរូបឱបកៀកក នឹងរូបចម្លាក់តួយក្សទាញព្រ័ត្រទី១១ ពីក្រោយ ហើយបណ្តាលឲ្យព្រះកេសនោះ ធ្លាក់របូតចុះមកក្រោម ប៉ះជើងខ្លួនឯងនាំឲ្យមានរបួសភ្លាមៗ និងចម្លាក់ព្រះកេសយក្សខូចខាត។</p>
<p>ក្រោយពីបានជួបប្រជុំ ជាមួយតំណាងព្រះវិហារគ្រិស្តសាសនាឈ្មោះ Chois Suchel និងមគ្គុទេ្ទសក៍ទេសចរឈ្មោះLee Yong Chan នៃក្រុមហ៊ុន Best Tour របស់កូរ៉េ ដោយពិនិត្យមើលស្ថានភាពជាក់ស្តែង នៃឧបទ្ទវហេតុតំណាងព្រះវិហារ និងមគ្គុទ្ទេស ក៏បានសារភាពកំហុស ដោយសារការធ្វេសប្រហែស បណ្តាលឲ្យភ្ញៀវឡើងតោងរូបចម្លាក់ ហើយទទួលខុសត្រូវរាល់ទង្វើ ដែលបានប្រព្រឹត្ត និងទទួលខុសត្រូវមើលព្យាបាល អ្នករបួសព្រមទាំងសន្យាថា នឹងកែលម្អរាល់កំហុសឆ្គង ហើយណែនាំភ្ញៀវរបស់ខ្លួន កុំឲ្យមានរឿងដូច្នេះកើតឡើង នាពេលអនាគតទៀត៕</p>
<p style="text-align: center;"><img title=" " src="http://image.dap-news.com:81/dap-news/dap-images/2014/August/id-030/Kosal-0247.jpg" alt="" width="500" /></p>
</div>
<p style="text-align: right;"><a href="http://www.dap-news.com/2011-06-14-02-39-55/92737-2014-08-13-11-05-35.html" target="_blank">ផ្តល់សិទ្ធដោយ ៖ ដើមអម្ពិល</a></p>