<div>
<p><span style="color: #000000;"><strong>(ភ្នំពេញ)៖</strong> ថ្មីៗនេះ មានដំណឹងពីការបាត់ខ្លួន របស់តារាចម្រៀងខ្មែរ នាង យ៉ុង ចាន់សុធាវី ខណៈដែលតារារូបនេះ ត្រូវបានផ្តល់ឱកាសធានាចេញទៅច្រៀង និងសម្តែងលើទឹកដី ប្រទេសមហាអំណាច សហរដ្ឋអាមេរិក ដោយមិនទាន់ដឹងពីមូលហេតុច្បាស់ ពីដំណឹងនៃការបាត់ខ្លួន ខណៈក្រុមគ្រួសារកំពុងជ្រួលច្របល់ក្នុងរឿងនេះយ៉ាងខ្លាំង។ ដំណឹងនៃការបាត់ខ្លួន របស់តារាស្រីខ្មែរនាង យ៉ុង ចាន់សុធារី នេះ ស្របពេលដែលត្រូវដល់វេលាកាលកំណត់ វិលត្រឡប់មកស្រុកខ្មែរ។</span></p>
<p><span style="color: #000000;">យ៉ាងណាមិញ ចំពោះការបាត់ខ្លួន របស់កញ្ញា យ៉ុង ចាន់សុធាវី លើទឹកដីប្រទេសអាមេរិកនេះ ពុំទាន់ត្រូវបានបញ្ជាក់ប្រាប់ ច្បាស់ពីមូលហេតុពិត ពីប្រភពណាមួយនៅឡើយទេ។ ប៉ុន្តែក៏មានប្រភពខ្លះទៀត បានដាក់ការសង្ស័យថា ទំនងជាចេតនា នៃការគេចវេស ដើម្បីរត់គេចខ្លួនក្នុងគោលបំណង បានរស់នៅទីនោះ ដោយមិនវិលត្រឡប់មកស្រុកខ្មែរវិញ។</span></p>
<p><span style="color: #000000;">ជុំវិញបញ្ហានេះគេហទំព័រ Khmertalking មិនទាន់ស្វែងរកការបំភ្លឺ ពីក្រុមគ្រួសារនាងបាននៅឡើយទេ នារសៀលថ្ងៃទី០៦ ខែមករានេះ។ ដោយឡែកបើតាមការបញ្ជាក់ នៅលើបណ្តាញហ្វេសប៊ុករបស់ប្រធានសមាគមន៍សិល្បករខ្មែរ លោក សុះ ម៉ាច បានសរសេរថា «<strong>ម្សិលមិញ ក្រោយពីទទួលដំណឹងថា មានសិល្បការិនីម្នាក់ កំពុងបាត់ខ្លួន(រត់គេចនៅទីក្រុងSan Diego )គឺកញ្ញា យ៉ុង ចាន់សុធាវី ខ្ញុំមានអារម្មណ៍សោកស្តាយណាស់</strong>..» ។</span></p>
<p><span style="color: #000000;">លោក សុះ ម៉ាច បានបញ្ជាក់ថា«<strong>មិនគួរនាងប្រព្រឹតខុស នឹងកិច្ចសន្យាជាមួយសមាគមសិល្បៈ ដែលខ្ញុំចេញលិខិតបញ្ជាក់ស៊ីញ៉េ និងបោះត្រាឲ្យនាង ព្រមទាំងណែនាំថា ត្រូវប្រកាន់ខ្ជាប់នូវសេចក្តីថ្លៃថ្នូរ ជាពិសេសគោរពច្បាប់ទិដ្ឋាការ(visa) ដែលស្ថានទូតអាមេរិកផ្តល់ឲ្យ(US Embassy)តែបែរជានាង មិនគោរពហើយរត់គេចដូច្នេះសោះ នាងកំពុងធ្វើឲ្យខ្លួនមានទោស ដែលពិបាកក្នុងការរស់នៅ ព្រោះសមាគមនៅទីនោះ បានប្តឹងទៅប៉ូលីសឲ្យតាមចាប់ខ្លួននាង ជាពិសេសទៅទៀតនោះ នាងបាន និងកំពុងតែបង្កផលវិបាកដល់សិល្បករសិល្បការិនីដទៃ ដែលនឹងត្រូវចេញទៅសម្តែងនៅទីនោះ ស្របពេលស្ថានទូតអាមេរិក លោកចាប់ផ្តើមផ្តល់ឱកាសសម្រួល ដល់ការផ្តល់ទិដ្ឋាការ ដល់សិល្បករសិល្បការិនី យើងថ្មីៗនេះផងដែរ</strong> »។</span></p>
<p><span style="color: #000000;">ប្រធានសមាគមនសិល្បកររូបនេះ បានបន្ថែមថា <strong>«ជាសំណូមពររបស់ខ្ញុំ សូមឲ្យនាងពិចារណាឡើងវិញ ឯក្រុមគ្រួសាររបស់នាង មេត្តាជួយពន្យល់ណែនាំនាង ឲ្យត្រឡប់មកវិញកុំខាន ព្រោះថាប៉ូលីសចាប់បាននាង នឹងគ្មានឱកាសបានរស់នៅ និងបានទៅអាមេរិកជារៀងរហូត។ សិល្បការិនីបីរូបហើយ ដែលគេចខ្លួន ដែលខ្ញុំចេញលិខិតបញ្ជាក់ឲ្យក្នុងនោះមាន ហង្សពិសី ស៊ិន សុម៉ាលី និងយ៉ុងចាន់សុធាវី ពិតជានាំផលវិបាកមែន..»</strong> ៕</span></p>
<p style="text-align: center;"><span style="color: #000000;"><img src="https://s3.kh1.co/6af18129ab3ff99d8e504dce2533ac45d737e34b.jpg" alt="" width="730" /></span></p>
<p style="text-align: center;"><span style="color: #000000;"><img src="https://s3.kh1.co/501c3832fdda5c1d1d33690df1dfed3b21b431b4.jpg" alt="" width="730" /></span></p>
<p style="text-align: center;"><span style="color: #000000;"><img src="https://scontent-kul1-1.xx.fbcdn.net/hphotos-xap1/v/t1.0-9/1560678_1314588961900744_5322283392176459535_n.png?oh=466f8cd5c77097c287752c8bf6838c5a&oe=57143735" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
</div>