<div class="article-content">
<p><strong>ភ្នំពេញ៖</strong> គ្រោះថ្នាក់ចរាចរណ៍នៅទូទាំងប្រទេស ដែលបានកើតឡើង ក្នុងរយៈពេល ៤ថ្ងៃ ក្នុង ឱកាសថ្ងៃបុណ្យចូលឆ្នាំចិន-វៀតណាម មានចំនួន ៩៨លើក បណ្តាលឲ្យមានមនុស្ស ស្លាប់រហូត ទៅដល់ ៣៣នាក់ និងមានអ្នករងរបួសធ្ងន់ស្រាល ១៩៧នាក់។</p>
<p>លោក សុខ ណុប ប្រធានការិយាល័យនីតិវិធី នៃនាយកដ្ឋានសណ្តាប់ធ្នាប់ បានមានប្រសាសន៍ ប្រាប់ មជ្ឈមណ្ឌលព័ត៌មានដើមអម្ពិល នៅព្រឹកថ្ងៃទី៣ ខែកុម្ភៈ ឆ្នាំ២០១៤ថា ក្នុងរយៈ ៤ថ្ងៃ ចាប់ ពីថ្ងៃទី៣០ ខែមករា ដល់ថ្ងៃទី២ ខែកុម្ភៈ នេះ គ្រោះថ្នាក់ចរាចរណ៍បានបណ្តាលឲ្យមនុស្សស្លាប់ និងរងរបួស សរុបទាំងអស់ ២៣០នាក់ នៅទូទាំងប្រទេស ហើយអ្នករងបួសធ្ងន់ ១១៦នាក់ ស្រាល ៨១នាក់។</p>
<p>លោកបន្ថែមថា “យើងពិនិត្យមើលគឺនៅរាជធានីភ្នំពេញ កើតឡើងច្រើនជាងគេ មានចំនួន ១៣លើក បណ្តាលឲ្យមនុស្សស្លាប់ ៥នាក់ បន្ទាប់មកមានខេត្តកំពង់ចាម ៩លើក បណ្តាល ឲ្យមនុស្សរបួសធ្ងន់ ១៣នាក់ ហើយខេត្តឧត្តរមានជ័យ ៨លើក បណ្តាលឲ្យមនុស្សស្លាប់ ១នាក់ និងរបួសធ្ងន់ ១០នាក់”។</p>
<p>លោក សុខ ណុប បានបញ្ជាក់ថា មូលហេតុបណ្តាលឲ្យមានគ្រោះថ្នាក់ចរាចរណ៍នេះ កើតឡើង ពីការបើកបរហួសល្បឿនកំណត់មាន ៤១លើក បើកបរមានជាតិស្រវឹង ២៦លើក បើកបរក្នុង ស្ថានភាពប្រជែង ១០លើក និងមិនគោរពសិទ្ធិអាទិភាព ៩លើក មិនប្រកាន់ស្តាំ ៥លើក បត់ឆ្វេង បត់ស្តាំមិនគោរពច្បាប់ ២លើក និងបញ្ហាផ្សេងៗទៀត ៣លើក។</p>
<p>លោកបានបញ្ជាក់ថា ក្នុងឱកាសបុណ្យចូលឆ្នាំចិន-វៀតណាម ឆ្នាំ២០១៤នេះ មានចំនួនកើនឡើង ជាងឆ្នាំ២០១៣ ចំនួន ៥លើក ចំនួនអ្នកស្លាប់វិញថយចុះចំនួន ១០នាក់៕</p>
<p style="text-align: center;"><img src="http://image.dap-news.com:81/dap-news/dap-images/2014/February/id-030/Kosal-0001.jpg" alt="" width="500" /></p>
<p style="text-align: center;"><img src="http://image.dap-news.com:81/dap-news/dap-images/2014/February/id-030/Kosal-0002.jpg" alt="" width="500" /></p>
<p style="text-align: right;">ផ្តល់សិទ្ធិដោយ៖ <a href="http://www.dap-news.com/2011-06-14-02-39-55/80171-2014-02-03-03-36-55.html"><span style="color: #0000ff;">ដើមអំពិល</span></a></p>
</div>