<p><span style="color: #000000;"><strong>ភ្នំពេញ៖</strong> នាយករដ្ឋមន្រ្តី នៃព្រះរាជាណាចក្រកម្ពុជា សម្តេចតេជោ ហ៊ុន សែន តាមការគ្រោងទុកនៅវេលាម៉ោង ៤រសៀលថ្ងៃទី១២ ខែមករា ឆ្នាំ២០១៥ នឹងអញ្ជើញទៅកាន់ស្ថានទូតបារាំងប្រចាំនៅកម្ពុជា ដើម្បីចូលរួមគោរព វិញ្ញាណក្ខន្ធអ្នកព័ត៌មាន និងប៉ូលីសបារាំង ១៧នាក់ ដែលបានស្លាប់បាត់បង់ជីវិត ដោយការបាញ់ប្រហារដ៏ឃោរ ឃៅកាលពីសប្តាហ៍មុន។</span></p>
<p><span style="color: #000000;">សូមបញ្ជាក់ថា នៅសប្តាហ៍កន្លងទៅនេះ ក្រុមភេរវករ ៣នាក់ បានបាញ់ប្រហារទៅលើទីស្នាក់ការកាសែត និង ទ ស្សនាវដ្តី «Charlie Hebdo» នៅកណ្តាលទីក្រុងប៉ារីស ប្រទេសបារាំង បណ្តាលឲ្យអ្នកព័ត៌មាន និង ប៉ូលីស សរុប ១៧នាក់ បានស្លាប់បាត់បង់ជីវិត និងជាច្រើននាក់ទៀតរងរបួស។ ក្រុមជនល្មើសម្នាក់បានចូលសារភាព និង២នាក់ទៀត ត្រូវបានកម្លាំងសមត្ថកិច្ច តាមប្រមាញ់ និង បាញ់សម្លាប់។</span></p>
<p><span style="color: #000000;">ក្រុមភេរវករ បានអះអាងថា ពួកគេជាក្រុមរបស់ ISIS និងទទួលការហ្វឹកហាត់ពីក្រុមអាល់កៃដា។ អំពើបាញ់ បាញ់ប្រហារ ដ៏ឃោរឃៅនេះ បានទទួលរងនូវការថ្កោលទោសយ៉ាងខ្លាំងពីបណ្តាមេដឹកនាំប្រទេសនានា រួមនិង អ្នកព័ត៌មានទូទាំងសាកលលោក។</span></p>
<p><span style="color: #000000;">ក្រោយហេតុការណ៍បាញ់ប្រហារនេះ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានផ្ញើសារទៅកាន់ នាយករដ្ឋមន្រ្តីបារាំង លោក Manuel Valls ដើម្បីចូលរួមរំលែកទុក្ខជាមួយរដ្ឋាភិបាលបារាំង និងក្រុមគ្រួសារជន រងគ្រោះ ដែលរងការបាញ់ប្រហារនេះ។</span></p>
<p><span style="color: #000000;">ក្នុងសារលិខិតកាលពីថ្ងៃទី៨ ខែមករា ឆ្នាំ២០១៥ សម្តេចតេជោ បានបញ្ជាក់ថា «ខ្ញុំមានក្តីរន្ធត់ឥតឧបមា ដោយ បានទទួលព័ត៌មាន ពីការវាយប្រហាររបស់ក្រុមភេរវករទៅលើ ទីស្នាក់ការទស្សនា វដ្តីបារាំង «Charlie Hebdo» ដែលធ្វើឲ្យប្រជាពលរដ្ឋ ស្លូតត្រង់ បាត់បង់ជីវិត និងរងរបួសជា ច្រើននាក់ និងបណ្តាល ឲ្យប្រជាជនបារាំង មាន ការតក់ ស្លុតយ៉ាងខ្លាំង កាលពីថ្ងៃទី៧ មករា ឆ្នាំ២០១៥»។</span></p>
<p><span style="color: #000000;">សម្តេចបានបន្តថា «កម្ពុជាសូមថ្កោលទោសយ៉ាងខ្លាំង ចំពោះអំពើភេរ វកម្មដ៏ព្រៃផ្សៃនេះ ។ ទង្វើដ៏ឃោឃៅរបស់ ជនជ្រុលនិយមនេះ វាក៏ជាការវាយប្រហារ ផងដែរប្រឆាំងនឹងលទ្ធិប្រជាធិបតេយ្យ និងសេរីភាពអ្នកកាសែត»។</span></p>
<p><span style="color: #000000;">សម្តេនាយករដ្ឋមន្រ្តី បានបន្ថែមទៀតថា «ខ្ញុំសូមចូលរួមរំលែកទុក្ខយ៉ាងក្រៀមក្រំបំផុត ដល់ជនរងគ្រោះ និងក្រុម គ្រួសារនៃសព ចំពោះការបាត់បង់ជីវិតជនស្លូតត្រង់ ក្នុងអំពើហិង្សាគួរឲ្យស្អប់ខ្ពើមនេះ»៕</span></p>
<p><span style="color: #000000;"><a class="thickbox" title="" href="/FileManager/Commons/2015/1/12/1-12-2015-10-52-16-am-12-01-2015--10-56-48.png"><span style="color: #000000;"><img src="/FileManager/Articles/mce/2015/1/12/1-12-2015-10-52-16-am-12-01-2015--10-56-48.png" alt="" /></span></a></span></p>
<p style="text-align: right;"><span>ផ្ដល់សិទ្ធដោយ៖ ដើមអម្ពិល</span></p>