<div class="article-content">
<p><strong>បន្ទាយមានជ័យ៖</strong> ២នាក់ឪពុក និងកូនប្រុសអាយុ៤ឆ្នាំ បានស្លាប់ភ្លាមៗ នៅនឹងកន្លែង កើតហេតុ ក្រោយពីជួបគ្រោះថ្នាក់ ចរាចរណ៍ បើកម៉ូតូបុកគូទ រថយន្តធន់ធំ ដឹកស្រូវពេញ ហើយចតលើ ចិញ្ចើមផ្លូវ ដោយគ្មានដាក់ភ្លើងសញ្ញា កាលពីវេលាម៉ោង ប្រមាណ ៨៖៣០នាទី យប់ថ្ងៃទី១២ ខែធ្នូ ឆ្នាំ២០១៣ ស្ថិតនៅលើ ផ្លូវជាតិលេខ៦ ពីបន្ទាយមានជ័យ ទៅសៀមរាប ចំណុចព្រៃមាន ត្រង់ ស្ពានស្រែង ឃុំភ្នំលាប ស្រុកព្រះនេត្រព្រះ ខេត្តបន្ទាយមានជ័យ។</p>
<p>អធិការនគរបាល ស្រុកព្រះនេត្រព្រះ លោក កែវ យឿន បានប្រាប់មជ្ឈមណ្ឌល ព័ត៌មាន ដើមអម្ពិល ឲ្យដឹងថា ជនរងគ្រោះពីរនាក់ ឪពុក និងកូនប្រុស បានស្លាប់ ភ្លាមៗ ក្រោយពីបើកម៉ូតូ ទៅបុកគូទ រថយន្តដឹកស្រូវ ចតតាមចិញ្ចើមផ្លូវ ដោយគ្មានដាក់ភ្លើងសញ្ញា។</p>
<p>លោក កែវ យឿន បានបន្តទៀតថា ក្រោយទទួលសេចក្តី រាយការណ៍ខាងលើនេះ កម្លាំងនគរបាល របស់លោក បានចុះទៅជួយ អន្តរាគមន៍ភ្លាមៗ ប៉ុន្តែអ្នកបើករថយន្ត បានរត់គេចខ្លួនបាត់ ។</p>
<p>សេចក្តីរាយការណ៍ពី មន្រ្តីនគរបាល ដែលនៅកន្លែងកើតហេតុ បានឲ្យដឹងថា ជនរងគ្រោះជាឪពុក មានឈ្មោះ ទូ លូ អាយុ២៩ឆ្នាំ និងកូនប្រុស អាយុ៤ឆ្នាំ។ យ៉ាងណាក៏ដោយ មិនទាន់ទទួល ព័ត៌មាន លំអិត អំពីគ្រោះថ្នាក់ចរាចរណ៍ ខាងលើនេះ នៅឡើយទេ ខណៈកម្លាំងសមត្ថកិច្ច បាននិងកំពុងជួយ អន្តរាគមន៍។</p>
<p>ជាមួយគ្នានេះ ប្រជាពលរដ្ឋ បានរិះគន់ ចំពោះម្ចាស់រថយន្តធន់ធំទាំងឡាយណា ដែលចតចោល តាមចិញ្ចើមផ្លូវ ដោយគ្មានដាក់ភ្លើងសញ្ញា ហើយអ្នកជិះម៉ូតូ ជាច្រើននាក់ តែងតែជួយហេតុការណ៍ បែបនេះ នៅតំបន់ខាងលើ ដូច្នេះប្រជាពលរដ្ឋ សូមអំពាវនាវ ដល់ អាជ្ញាធរខេត្ត និងសមត្ថកិច្ច ពាក់ព័ន្ធ ជួយចាត់វិធានការផង៕</p>
<p style="text-align: center;"><img src="http://111.92.240.170:81//dap-news/dap-images/2013/December/id-007/Pheak-0098.jpg" alt="Photo by DAP-NEWS" width="500" /></p>
<p style="text-align: center;"><img src="http://111.92.240.170:81//dap-news/dap-images/2013/December/id-007/Pheak-0099.jpg" alt="Photo by DAP-NEWS" width="500" /></p>
<p style="text-align: center;"><img src="http://111.92.240.170:81//dap-news/dap-images/2013/December/id-007/Pheak-0100.jpg" alt="Photo by DAP-NEWS" width="500" /></p>
<p style="text-align: right;">ផ្តល់សិទ្ធិដោយ៖ <a href="http://www.dap-news.com/2011-06-14-02-39-55/77372-2013-12-12-14-34-19.html"><span style="color: #0000ff;">ដើមអំពិល</span></a></p>
</div>