ព័ត៌មានអន្តរជាតិ ៖ ក្រុមសកម្មជន ជាច្រើនរយនាក់ ក្នុងនោះ រួមមាន បុរសៗ ជាច្រើនរូប បាននាំ គ្នាធ្វើការតវ៉ា "អាវក្នុង" កណ្តាលទីក្រុងហុងកុង អំឡុងថ្ងៃអាទិត្យ ទី ២ សីហា ម្សិលមិញនេះ ក្រោយ ពីស្រ្តីម្នាក់ ត្រូវអាជ្ញាធរ សម្រេច ដាក់ពន្ធនាគារ ៣ខែកន្លះ រងនូវការចោទ ប្រកាន់ ពីបទ ប្រើប្រាស់ ដើមទ្រូង វាយប្រហារ ប៉ូលីស អំឡុងធ្វើការតវ៉ា ។
ក្រុមសកម្មជន ច្រើនជាង ១០០ នាក់បានប្រមូលផ្តុំគ្នា ធ្វើការ តវ៉ា "ដើរពាក់អាវក្នុង" នៅខាងក្រៅ ស្នងការប៉ូលីសក្រុង ហុងកុង សង្កាត់ Wan Chai ពោល ក្រុម សកម្មជនទាំងអស់ បាននាំគ្នាធ្វើការ តវ៉ា ដោយអ្នកខ្លះពាក់ អ្នកខ្លះកាន់អាវក្នុង របស់ស្រ្តី ។ បុរស ជាសមាជិក សកម្មជនម្នាក់ ស្ថិតនៅ ក្នុងសភាព ដោះអាវ ពាក់ត្រឹមតែអាវក្នុងស្រ្តីពណ៌ខ្មៅ អោយ ដឹងថា ពួក យើងត្រូវតែធ្វើការតវ៉ា ចូរ នឹកគិតថា នៅថ្ងៃណាមួយ តិចក្រុមមន្រ្តីប៉ូលីស អាចនឹងចោទប្រកាន់ពួកយើង ថាបានវាយប្រហារ ពួកគេ ដោយការប្រើប្រាស់អវយវៈភេទ លិង្គ ឬ គូថ ក៏ថាបាន ។
ស្ថិតនៅក្នុងវ័យ ៦៦ ឆ្នាំ លោកគ្រូចូលនិវត្តម្នាក់ដែលមានឈ្មោះថា James Hon ស្ថិតនៅក្នុងសភាព ពាក់អាវក្នុងពណ៌ផ្កាឈូកអោយដឹងថា ៖ នេះជាលើកទីមួយហើយ ក្នុង មួយឆាកជីវិត ពាក់ព័ន្ធនឹង ការពាក់អាវក្នុងរបស់ស្រ្តី ។ ពួកយើងត្រូវតែធ្វើយ៉ាងដូច្នេះ ជា ការ ស្តែងអោយជាក់ស្តែង ដល់ពិភព លោកពាក់ព័ន្ធនឹងការចោទប្រកាន់ គួរអោយអស់សំណើចប្រការនេះ ។ ក្រុមសកម្មជន ផ្ទុះការតវ៉ា មួយក្រុមនេះ ស្រែកតវ៉ាខ្លាំងអោយដឹងថា ៖ "ដើមទ្រូង ពុំមែនជាអាវុធនោះទេ អោយត្រលប់មកវិញ នូវសេរីភាព ដើមទ្រូងរបស់ពួកយើង" "គួរអោយខ្មាន់ខ្លាំងណាស់ ប៉ូលីស ចោទ ប្រកាន់យ៉ាងដូច្នេះ" ។ គួររំឮកថា ទន្ទឹមនឹងសម្រែកតវ៉ាខាងលើនេះ អ្នកតំណាងក្រុមសកម្មជន បានដាក់ញ្ញាត្តិ ទៅដល់ មន្រ្តីប៉ូលីសផ្លូវការ នៃស្នងការប៉ូលីសក្រុង ហុងកុង ។
របាយការណ៍ បញ្ជាក់អោយដឹងថា ៖ ស្ត្រីវ័យ ៣០ឆ្នាំម្នាក់ ត្រូវបានគេរកឃើញ កំហុសដ៍ធ្ងន់ធ្ងរមួយ កាលពី ២សប្តាហ៍មុន រហូតដល់តុលាការ សំរេច ដាក់គុក ៣ខែកន្លះ ពីបទប្រើប្រាស់ ហឹង្សាទៅលើ ប៉ូលីស ដោយប្រើ ដើមទ្រូងរបស់ខ្លួន។ ជនជាប់ចោទមានឈ្មោះថា Ng Lai-ying ត្រូវបានចាប់ខ្លួន ខណៈពេលកំពុងធ្វើបាតុកម្ម ប្រឆាំងទៅនឹង ការបើកសិទ្ធិអោយធ្វើពាណិជ្ជកម្ម ដូចគ្នារវាងហុងកុង និងចិនដីគោក។ នាងបានធ្វើការចោទប្រកាន់ទៅកាន់ប៉ូលីសថា បានធ្វើបាបនាងនឹងបំពានទៅលើ រាងកាយ ជាពិសេសគឺ ដើមទ្រូងតែម្តង ៕
ប្រែសម្រួល ៖ កុសល
ប្រភព ៖ CNA