ក្រុងឡុងដ៍៖ យោងតាមគេហទំព័រ Mirror បានឲ្យដឹងថា ក្លឹបជើងខ្លាំងប្រចាំអង់គ្លេសតោខៀវ Chelsea បានត្រៀមកញ្ចប់ថវិកា ចំនួន១៧៧លានដុល្លារអាម៉េរិក ដើម្បីទិញកីឡាករខ្សែប្រយុទ្ធជួរមុខ Lionel Messi របស់ក្លឹប អេស្ប៉ាញ FC Barcelona ។
ប្រភពខាងលើដដែលបានបន្តឲ្យដឹងថា មហាសេដ្ឋីជនជាតិរុស្ស៊ីលោក Abrahimovic ដែលជាម្ចាស់ក្លឹប Chelsea បាន រៀបចំកញ្ចប់ថវិកា ដ៏ច្រើនសន្ធឹកសន្ធាប់មិនធ្លាប់មានពីមុនមកក្នុងការតាមប្រម៉ាញ់ ខ្សែប្រយុទ្ធលំដាប់លេខ១ របស់ពិភព លោក Lionel Messi ដើម្បីមកលេងចាប់ដៃគូ ជាមួយនឹងខ្សែប្រយុទ្ធ ដែលមានស្រាប់ Diego Costa ក្នុងការឈោងចាប់ ពាន Premier League និង UEFA Champions League ជាដើម ។
ក្រៅពីតាមប្រម៉ាញ់ម្ចាស់ពានបាល់មាសនៅ World Cup 2014 Messi នេះ Chelsea ក៏បានធ្វើការចរចាសុំទិញខ្សែ ប្រយុទ្ធលេខ១របស់ Real Madrid គឺកីឡាករ Cristiano Ronaldo ផងដែរក្រោមគម្រោង របស់គ្រូបង្វឹកលោក Jose Mourinho ហើយក៏ត្រូវត្រៀមលុយចាប់ពី ១៥០លានដុល្លារឡើង ទៅផងដែរនៅដើមខែមករា ឆ្នាំ២០១៥ខាងមុខ ដែល ពេលរដូវកាល ដោះដូរកីឡាករលើទី១ក្នុងឆ្នាំថ្មីចាប់ផ្តើម ។
តែយ៉ាងណាក៏ដោយមិនសង្ឃឹមថា ក្លឹបទាំងពីរមាន FC Barcelona និងស្តេចស Real Madrid លក់ជើងខ្លាំងនោះ ឡើយ ក្នុងខណៈដែលពួកគេបាន កំពុងតែបញ្ចេញសមត្ថភាពយ៉ាង អស្ចារ្យនៅលើទីលាន ហើយកំពុងតែមមាញឹក ក្នុងការប្រជែងយកពាន La Liga ក៏ដូចជាការពារពានអន្តរជាតិ Champions League ផងដែរនោះ ហើយតារាពិភពលោក ទាំងពីរខាងលើនេះ ក៏ជួយឲ្យទម្រង់លេងរបស់ក្លឹប ឡើងជើងទៀតផង ៕