ខ្លាត្រីដ៏កម្រ ត្រូវបានគេថតជាប់ក្នុងប្រទេសកម្ពុជា
ពូជសត្វខ្លាត្រីនេះ ត្រូវបានផុតពូជនៅក្នុងប្រទេសវៀតណាម ប៉ុន្តែមិនទាន់មានរបាយការណ៍ណាមួយថា វាបានផុតពូជនៅប្រទេសឡាវ មីយ៉ាន់ម៉ា ថៃ និងកម្ពុជានៅឡើយទេ។
កាលពីខែកុម្ភៈកន្លងទៅ អ្នកស្រាវជ្រាវ ពី Cambodian Fishing Cat Project បានបំពាក់នូវកាមេរ៉ាចំនួន ៣០ នូវជម្រកព្រៃកោងកាង ដែលជាតំបន់អភិរក្សសម្រាប់ពូជសត្វខ្លាត្រីនេះ។
លទ្ធផលបានផ្តល់នូវ រូបភាពដំបូងនៃ សត្វខ្លាត្រី ក្នុងប្រទេសកម្ពុជា គិតតាំងពីការស្រាវជ្រាវកាលពីឆ្នាំ២០១៥។
Dr. Jan F. Kamler អ្នកសម្របសម្រួលកម្មវិធីសត្វខ្លារខិន អាស៊ីអាគ្នេយ៍ សម្រាប់អង្គការអភិរក្សសត្វខ្លាព្រៃពិភពលោក Panthera បាននិយាយថា៖ « ការថតរូបសត្វខ្លាត្រី បានម្តងទៀត ក្រោយរយៈពេល២ឆ្នាំនេះ ពិតជាដំណឹងល្អណាស់។»
អ្នកស្រាវជ្រាវ Sarady Moul បានប្រទះឃើញ ខ្លាត្រីមួយក្បាលកណ្តាលថ្ងៃ កំឡុងពេលទៅពិនិត្យមើលកាមេរ៉ា នៅតាមព្រែកតូចៗ។ គាត់បានរំលឹកថា៖ «ខ្ញុំមានភាពភ្ញាក់ផ្អើលមែនទែន ដែលខ្ញុំសឹងតែលោតចេញពីទូកទៅហើយ។ ម៉ោងប្រហែល 8:45 ព្រឹក ខ្ញុំបានឃើញវាចេញពីម្តុំឬសដើមកោងកាង ដែលខ្ញុំមិនដែលរំពឹងថាឃើញវានៅពេលនោះឡើយ។»
លោក Moul បានស្នើរឲ្យអ្នកបើកទូក ខិតចូលទៅជិតដើម្បីថតរូប ប៉ុន្តែខ្លាត្រីនោះបានបែរខ្លួន បាត់ទៅក្នុងព្រៃកោងកាង។ លោក Moul បាននិយាយថា៖ «ឃើញសត្វខ្លាត្រី ក្នុងព្រៃបែបនេះ ពិតជាអស្ចារ្យមែនទែន។»
បើតាមអ្នកស្រាវជ្រាវ លោក Herranz Muñoz បាននិយាយថា៖ «តាមការសនិ្នដ្ឋានរបស់ខ្ញុំ សត្វខ្លាត្រីនោះទំនងជារកកន្លែងហែលឆ្លងទៅត្រើយម្ខាងទៀត។ ខ្លាត្រីត្រូវបានគេស្គាល់ថាជាសត្វរាត្រី។ កាលដែលឃើញវានៅពេលថ្ងៃបែបនេះ ពីព្រោះតែជំនោរទឹកទាប ងាយស្រួលក្នុងការឆ្លងពីត្រើយម្ខាង ទៅម្ខាងទៀត»។
លោក Moul បានបំពាក់នូវកាមេរ៉ា ឲ្យកាន់តែជិតកន្លែងនោះ តាមដែលអាចធ្វើទៅបាន។ «ពួកយើងពិតជាសប្បាយចិត្តណាស់ ដែលកាមេរ៉ារបស់ពួកយើងបានថតជាប់សត្វខ្លាត្រី ហែលទឹកក្នុងព្រៃបែបនេះ»៕
ប្រភព៖ mongabay
ប្រែសម្រួល៖ High