តន្រ្តី តារា
ព្រាប សុវត្ថិ សាយប្រជាប្រិយភាពដល់បងប្អូនខ្មែរក្រោមនៅវៀតណាម
ភ្នំពេញ : នៅក្នុងរថយន្តក្រុងដែលកំពុងតែដឹកភ្ញៀវទេសចរខ្មែរ ទៅទស្សនាទីក្រុងស្នេហ៍ដ៏ត្រជាក់ស្រេបនៃប្រទេសវៀតណាម បទ ខ្លុយស្នេហ៍ត្នោតទេរ ត្រូវបានបង្ហើរសំនៀងដ៏ក្រអួនក្រអៅចេញពីមាត់មគ្គុទ្ទេសក៍ទេសចរ មួយរូប ឈ្មោះ ទ្រី ដែលមានដើមកំណើតជាកម្ពុជាក្រោម តាមការសំណូមពររបស់ភ្ញៀវទេសចរ ដែលចង់ទទួលសណ្ដាប់ចម្រៀងជាតិ បើទោះជាខ្លួនកំពុងស្ថិតនៅក្នុងទឹកដីប្រទេសជិតខាងក្ដី។
ក្រោយពីច្រៀងគោកជាភាសាខ្មែរយ៉ាងច្បាស់ ដោយមិនមានសាច់ភ្លេង ឬខារ៉ាអូខេអមមក បុរសមគ្គុទ្ទេសក៍មាឌក្រអាញម្នាក់ក្នុងវ័យល្បាក់សាមស្ដើងរូបនេះ បានបញ្ជាក់ជាភាសាខ្មែររាងប៉ៃឡាំបន្តិចថា៖ នៅក្នុងចំណោមអ្នកចម្រៀងខ្មែរយើងទាំងអស់ ខ្ញុំចូលចិត្តបទលោក ព្រាប សុវត្ថិ ជាងគេ ព្រោះគាត់នេះល្បីណាស់សម្រាប់បងប្អូនខ្មែរក្រោមយើង ហើយខ្ញុំចេះច្រៀងតែបទគាត់ និងបទលោក ស៊ីន ស៊ីសាមុត ទេ។
រំពេចនោះ ភ្ញៀវទេសចរខ្មែរមួយរូបដែលស្ថិតក្នុងវ័យទើបតែម្ភៃឆ្នាំ ហើយកំពុងអង្គុយកៀកកើយជាមួយស្វាមីទើបនឹងរៀបការបានបីថ្ងៃនោះ ក៏បានស្រែកសួរពីកៅអីខាងក្រោយថា៖ ហេតុអ្វីបានជាលោក ព្រាប សុវត្ថិ ល្បីនៅកម្ពុជាក្រោមអ៊ីចឹងបង?។
នេះមិនមានអ្វីចម្លែកទេដែលយុវវ័យខ្មែរចោទសួរដូច្នេះ ដោយសារតែនៅប្រទេសកម្ពុជាសម្បូរតារាចម្រៀងស្ទើរតែគរជើងគ្នា និងផលិតកម្មព្រោងព្រាត។ ម៉្យាងដោយសារតែបទពិសោធដ៏ជ្រាលជ្រៅរបស់តារា ព្រាប សុវត្ថិ លោកទំនងជាកញ្ឆក់បានបេះដូងយុវជនវ័យលើម្ភៃ និងសាមក្រាស់ទៅវិញ ខណៈដែលតារាចម្រៀងស្រករក្រោយ ដូចជា ខេមរៈ សិរីមន្ត ហេង ពិទូ និង ឆាយ វីរៈយុទ្ធ ជាដើមកំពុងវាយលុកទីផ្សារយុវវ័យ។
យ៉ាងណាមិញ លោក ទ្រី ដែលរស់នៅក្នុងសហគមន៍ខ្មែរកម្ពុជាក្រោម បានប្រាប់ពីមូលហេតុថា៖ បងប្អូនកម្ពុជាក្រោមយើង គាត់ចូលចិត្តអ្នកចម្រៀងណាច្រៀងច្បាស់ៗ ហើយយើងស្គាល់លោក ព្រាប សុវត្ថិ តាំងពីដើមឆ្នាំពីរពាន់មកម្ល៉េះ ដោយសារតែគាត់ច្រៀងខ្មែរម៉ាម៉ាត់ៗច្បាស់ៗផសគាត់។
ដូចគ្នានេះដែរ អ្នកស្រី ញ៉ា ដែលមានស្វាមីឈ្មោះលោក ទ្រឿង ជាអ្នកប្រកបរបរលក់ចាប់ហួយ នៅខេត្តអានយ៉ាង បានឲ្យដឹងថា គ្រួសារអ្នកស្រីធ្លាប់ឡើងចុះភ្នំពេញទៅលេងបងប្អូន ហើយក៏បានឲ្យឆ្លៀតទិញឌីសរបស់លោក ព្រាប សុវត្ថិ មកចាក់ស្ដាប់ ដោយសារតែលោកច្រៀងភាសាបានច្បាស់ល្អ ហើយសំឡេងគាត់ឲ្យគ្រលួចតែម្ដង ជាពិសេសគឺបទសម័យ និងបទយកមកច្រៀងឡើងវិញ ដូចជាបទ ថ្ងៃបាក់រសៀល ឱស្នេហ៍មាសបង និង អារុណោទ័យ ជាដើម។
ស្ត្រីវ័យ ២៨ ឆ្នាំ រូបនេះបានបន្តថា៖ ខ្ញុំនិយាយខ្មែរមិនសូវដូចបងប្អូនខ្មែរយើងនៅឯណោះមែន ប៉ុន្តែខ្ញុំចូលចិត្តស្ដាប់បទខ្មែរណាដែលច្រៀងច្បាស់ៗ។ ខ្ញុំឃើញមានតែគាត់ហ្នឹងទេ (ព្រាប សុវត្ថិ) ដែលច្រៀងបទសម័យយើងច្បាស់។
លោក ព្រាប សុវត្ថិ បានថ្លែងក្នុងសំឡេងគ្រលរៗ ដោយសារលោកទើបក្រោកពីទម្រេតថ្ងៃរសៀលនោះថា៖ ខ្ញុំអត់ដែលដឹងថា ចម្រៀងរបស់ខ្ញុំមានភាពនិយមខ្លាំងទេ នៅទឹកដីកម្ពុជាក្រោម។ ខ្ញុំគ្រាន់តែដឹងថា ខ្មែរក្រោមដែលគាត់រស់នៅក្នុងប្រទេសកម្ពុជាយើងខ្លះ ពួកគាត់ចូលចិត្តស្ដាប់ចម្រៀងរបស់ខ្ញុំ។
យ៉ាងណាមិញ តារាចម្រៀងវ័យ ៣៦ ឆ្នាំដែលល្បីខាងរួសរាយជាមួយមហាជននោះមិនមានអំណួតលើការសរសើរ នេះ ហើយបន្តុះបង្អាប់តារាចម្រៀងស្រករក្រោយ ដែលសឹងតែជាន់ពន្លិចខ្លួនបានម្ដងម្កាលនោះទេ។
លោក ព្រាប សុវត្ថិ បែរជាថ្លែងលើកទឹកចិត្តតារាចម្រៀងយុវវ័យទាំងនោះថា៖ សម្រាប់រូបខ្លួនខ្ញុំផ្ទាល់គឺ មានអារម្មណ៍សប្បាយចិត្តណាស់ចំពោះអ្នកចម្រៀងសម័យថ្មីនេះ គឺគាត់មានទេពកោសល្យល្អពីធម្មជាតិរីកដុះដាលច្រើន។
ម្ចាស់បទ Call មកបងពេលគេបោះបង់អូន រូបនេះ បានសម្ដែងនូវអារម្មណ៍រំភើបរីករាយ ដោយសារតែលោកទទួលបានជ្រុងមួយថ្មីទៀតនៃប្រជាប្រិយភាពរបស់ ខ្លួន ពីបងប្អូនខ្មែរកម្ពុជាក្រោម នៅប្រទេសវៀតណាម។
លោក ព្រាប សុវត្ថិ ក៏បានបង្ហើបគំនិតផ្ទាល់ខ្លួនរបស់លោកផងដែរថា៖ ខ្ញុំគិតថា ថ្ងៃណាមួយនឹងមានកម្មវិធីជួបគ្នានៅកម្ពុជាក្រោម ក្នុងផ្នែកណាមួយ។
ឆ្លៀតឱកាសនេះផងដែរ លោកក៏បានកំពុងត្រៀមខ្លួនហ្វឹកហាត់ទឹកដមសំឡេង និងក្បាច់រាំថ្មីៗ ដើម្បីយកទៅសម្ដែងនៅក្នុងកម្មវិធីប្រគំតន្ត្រីហង្សមាស Best of the Best នាថ្ងៃបុណ្យនៃក្ដីស្រឡាញ់ ១៤ កុម្ភៈខាងមុខនេះ នៅពហុកីឡដ្ឋានជាតិ អូឡាំពិក ផងដែរ៕
http://khmer.phnompenhpost.com/index...tyle&Itemid=79
Tags:
តន្រ្តី តារា ដែលមើលច្រើន
