CamNews

ភ្នំពេញ៖ បុរសស្រវឹងជោកជាំ បើករថយន្តកូរ៉ូឡា ពណ៌ខ្មៅ បង្កហេតុ ឈ្មោះ ឡុង សាវុធ អាយុ
៣១ឆ្នាំ មុខរបមិនពិតប្រាកដ ទីលំនៅមិនពិតប្រាកដ បើករថយន្តក្នុងល្បឿនលឿន រេចង្កូតជ្រុល
ទៅបុករនាំងដែក ពុះចែកផ្លូវពេញទំហឹង បណ្តាលឲ្យ ដួលបាក់ ៥ ផ្ទាំង កាលពីវេលាម៉ោង៩នឹង
៣៥នាទី យប់ថ្ងៃទី១៩ ខែធ្នូ ឆ្នាំ២០១២ តាមបណ្តោយ មហាវិថីសហព័ន្ធ រុស្ស៊ី ទល់ មុខផ្សាររតនា
ផ្លាហ្សា ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ ។         

 ប្រភពព័ត៌មាន ពីនគរបាលចរាចរ ដែលឈរជើងប្រចាំការ ២៤ម៉ោង បានឲ្យដឹងថា មុនពេលកើត
ហេតុ គេឃើញរថយន្តកូរ៉ូឡា ពណ៌ខ្មៅមួយគ្រឿង ពាក់ស្លាកលេខ ភ្នំពេញ 2D 9379 បើកបរដោយ
បុរសម្នាក់ ក្នុងស្ថានភាពស្រវឹងស្រាជោក បានបោះពួយ រថយន្តយ៉ាងលឿន តាមមហាវិថីសហព័ន្ធ
រុស្ស៊ី ក្នុងទិសដៅពីលិចទៅកើត ស្រាប់តែមកដល់ កន្លែងកើតហេតុខាងលើ ក៏ព្យាយាមបើកវ៉ារថយន្ត
មួយគ្រឿងទៀត នៅពីមុខស្របគ្នា ទើបជ្រុលចង្កូត ទៅបុករនាំងដែកពុះចែកទ្រូង ចំពីមុខពេញទំហឹង
បណ្តាលឲ្យដួលបាក់អស់ចំនួន ៥ផ្ទាំង។ រីឯរថយន្តបង្កហេតុ ព្យាយាមបើករត់ទាំងបែកកង់មុខខាង
ឆ្វេងបានប្រមាណ ១០០ម៉ែត្រ ក៏ទៅមុខលែងរួច ទើបត្រូវនគរបាល ធ្វើការឃាត់រថយន្តបង្កហេតុ និង
អ្នកបើកបរដែលស្រវឹងនោះបាន ស្រាប់តែ លេចមុខបុរស ២នាក់ទៀត ជិះរថយន្តកាម៉ារីបាឡែនពណ៌
ខ្មៅមួយគ្រឿង គ្មានស្លាកលេខ ត្រូវជាមិត្តភត្តិរបស់បុរសស្រវឹង ចេញមុខមកកាង សម្លុតគំរាម និង
ប្រើពាក្យមិនសមរម្យ មកលើមន្រ្តីនគរបាល ហើយបានមកចាប់ម៉ាស៊ីនកាមេរ៉ារបស់ អ្នកកាសែត
២នាក់ រកបោក និងរកវាយអ្នកសែត រួចតាមថតរូបអ្នកការសែត ទាំង២នាក់នោះ នៅពេលដែលអ្នក
កាសែត ទាំង២នាក់ កំពុងយកព័ត៌មាន។

ក្រោយពេលកើតហេតុ នគរបាលចរាចរ បានវាស់វែង និងស្ទូចយករថយន្តបង្កហេតុ យកទៅកាន់
សាលារាជធានីភ្នំពេញ រង់ចាំការដោះស្រាយ៕

ដោយ៖ ដើមអំពិល
ផ្តល់សិទ្ធិដោយ៖ ដើមអំពិល