(ភ្នំពេញ)៖ មិនដឹងថាមានបញ្ហាអ្វីជាមួយនរណាម្នាក់ ឬចង់សំដៅលើបុគ្គលណាទេ ទើបតារាស្រីរាងតូចច្រឡឹងស្រស់សោភាកញ្ញា ឃឹម ចរិយា ថ្មីៗនេះបានបញ្ចេញប្រតិកម្មហាក់មានអារម្មណ៍មិនសប្បាយចិត្ត ខណៈភាពរាប់អានស្មោះ ត្រង់របស់នាងត្រូវបានគេមើលរំលង និងមិនផ្តល់តម្លៃឲ្យចំពោះ ទង្វើល្អៗជាច្រើន ដែលធ្លាប់មាននាពេលកន្លងមក ។
តាមរយៈខ្លឹមសារដែលត្រូវបានតារាសម្តែង និងពិធីការិនីសាច់សខ្ចីរបស់ស្ថានីយទូរទស្សន៍ PNN កញ្ញា ឃឹម ចរិយា សរសេរបង្ហោះនៅលើបណ្តាញសង្គម Facebook នាងបានលើកឡើងថា មនុស្សមិនមែនទេវតា ។ សង្ឃឹមថាឆ្នាំថ្មីខ្ញុំ នឹងជួបអ្វីល្អៗជាងឆ្នាំចាស់ ។ មនុស្សណាមិនដឹង តែខ្ញុំដឹងគុណ ដឹងបុណ្យ អ្នកណាដើររំលងខ្ញុំឲ្យទោសខ្ញុំ អ្នកណាជួយលើកខ្ញុំ ពេលខ្ញុំដួល ឥឡូវខ្ញុំមិនទាន់មានសមត្ថភាពសងគុណ តែខ្ញុំមិនដែលភ្លេចដែរ ។
ពិធីការិនីចង្កាស្រួចក្រសោបបានទីផ្សារសិល្បៈច្រើនគួរសមកញ្ញា ឃឹម ចរិយា បានបញ្ជាក់ទៀតថា មិនចង់និយាយច្រើនជាងធ្វើ តែសូមបើកចិត្តឲ្យទូលាយ មើលខ្ញុំឲ្យច្បាស់សិមវាយតម្លៃ ។ ស្រឡាញ់ និង រាប់អានដោយស្មោះនិងអ្នកដែលស្មោះនឹងមិត្តភាពដូចគ្នា ពពួកឆ្អិនក្បាលស៊ីក្បាលអីនោះ សូមកុំឲ្យប្រទះទៀត ។
ថ្វីត្បិតតែមានការបង្ហោះសារបែបនេះក្តី រហូតមកទល់ពេលនេះពុំទាន់ត្រូវបានប្រភពណាម្នាក់ដឹងទេថា តើកញ្ញា ឃឹម ចរិយា ធ្វើឡើងក្នុងគោលបំណងខឹង បុគ្គលណាម្នាក់ ឬគ្រាន់តែជាការបង្ហោះដាស់តឿងអារម្មណ៍ទស្សនិកជននោះឡើយ ។ ខណៈនៅរសៀលថ្ងៃទី២៦ ខែកុម្ភៈ ឆ្នាំ២០១៦នេះ មិនអាចទំនាក់ទំនងដើម្បីសុំការសួរនាំពីកញ្ញា ឃឹម ចរិយា ជុំវិញរឿងរ៉ាវខាងលើនេះបានទេ ព្រោះលេខទូរសព្ទនាងមិនអាចទំនាក់ទំនងបាន ។
អតីតពិធីការិនីរបស់ស្ថានីយទូរទស្សន៍លេខ៣ ដែលមានឱកាសវិវឌ្ឍន៍ខ្លួនចូលមកកាន់ក្បាលមេក្រូហ្វូន នៅទូរទស្សន៍ប៉ុស្តិ៍ PNN កញ្ញា ឃឹម ចរិយា ត្រូវបានគេកត់ស្គាល់ឃើញថា មួយរយៈពេលចុងក្រោយ ដែលនាងចូលខ្លួនប្រឡូកជោគជាំក្នុងអាជីពសិល្បៈ គឺតារាស្រីរូបនេះហាក់ កំពុងក្តាប់បានឱកាសច្រើនតាមរយៈការចេញមុខតួសម្តែងឈុតកាយវិការខារ៉ាអូខេ ខ្សែភាពយន្ត និងឱកាសធ្វើជាពិធីករជាដើម ៕
ផ្តល់សិទ្ធដោយ ៖ ហ្វ្រេសញូវអាស៊ី