CamNews

ភ្នំពេញ : អភិបាលរង ខណ្ឌ សែនសុខ លោក ម៉ូវ ម៉ានិត បានដឹកនាំកម្លាំង សមត្ថកិច្ច និងអាជ្ញាធរជា ច្រើននាក់ នៅវេលាម៉ោង៤រសៀល ថ្ងៃទី៩ ខែមិថុនា ឆ្នាំ២០១៥ ចុះទៅពិនិត្យមើលទូហ្គេម បាញ់ត្រីនៅ ផ្សារទំនើបរតនា ផ្លាហ្សា ។

លោក ម៉ូវ ម៉ានិត បានបញ្ជាក់ថា ក្រោយការចុះ ត្រួតពិនិត្យឃើញថា មានទូហ្គេមប្រភេទបាញ់ត្រី ចំនួន ៤ទូ ប៉ុន្តែអាជីវកម្មនៃ ការហ្គេមបាញ់ត្រីទាំងនេះ ត្រូវបានម្ចាស់ទីតាំងបង្ហាញ ឯកសារ គឺមានសុពលភាព រហូតដល់ខែតុលា ឆ្នាំ២០១៥ ។

នៅចំពោះមុខម្ចាស់ទីតាំងខាងលើ លោក ម៉ូវ ម៉ានិត បានណែនាំអោយធ្វើកិច្ច សន្យាមិនរំខានដល់អ្នកដទៃ និងពេលអស់សុពលភាព នៃលិខិតធ្វើអាជីវកម្ម ត្រូវធ្វើការរុះរើ បើសិនខាង មន្ទីរវប្បធម៌ មិនបានបន្ត ច្បាប់អោយ ទៅទៀតនោះ ។

តាមសម្តីអាជីករដែលលក់ដូរនៅ ក្នុងផ្សារទំនើបរតនាផ្លាហ្សា បានឲ្យដឹងថា ទីតាំងហ្គេមបាញ់ត្រីនៅ ផ្សារនោះ ស្ថិតនៅជាន់ទី២ មានច្រើនទូរ នឹងចាប់ផ្តើមបើកលេងតាំងពី ព្រឹករហូតដល់ម៉ោង ៩៖០០នាទី ទៅ ១០៖០០នាទីយប់ ទើបឈប់ ហើយអ្នកចូលលេងមានទាំងចាស់ទាំងក្មេង ចូលលេងជាបន្តបន្ទាប់ ។ អាជីវករដដែលបានបន្តថា រាល់ថ្ងៃគាត់ ក៏ដូចអាជីវករផ្សេងទៀតមានការ ធុញថប់ខ្លាំងណាស់ ដោយសារ តែសម្លេងស្រែកហ៊ោកញ្រៀវរបស់ក្រុមអ្នកចូលលេង។

មួយរយៈនេះគេសង្កេតឃើញ តាមបណ្តាខណ្ឌនានា ក្នុងរាជធានីភ្នំពេញ ជាពិសេសខណ្ឌដូនពេញ បានបង្ក្រាបល្បែងហ្គេមបាញ់ត្រីនេះ ជាបន្តបន្ទាប់ តាមលំនៅឋានរបស់ក្រុមឈ្មួញ ដែលប្រកបអាជីវកម្ម តែមិនដែលឃើញ អាជ្ញាធរខណ្ឌណាហ៊ានចាប់នឹងបង្ក្រាបល្បែងហ្គេមបាញ់ត្រី នៅតាមផ្សារទំនើបទេ មិនដឹងថាមូលហេតុអ្វីឡើយ សង្ស័យម្ចាស់ទីតាំងបើកហ្គេមបាញ់ត្រី ទាំងនោះមានតួនាទី ធំណាស់ហើយ បានជាអាជ្ញាធរធ្វើព្រងើយមិនអើពើបែបនេះ ឬក៏អស់លោកអាជ្ញាធរ ទាំងអស់ទទួលបានលាភសក្ការៈ ពីក្រុមឈ្មួញបើកហ្គេមបាញ់ត្រី ហើយមើលទៅបានសម្ងំឈឹងចឹង៕

ផ្ដល់សិទ្ធដោយ៖ ដើមអម្ពិល