ត្បូងឃ្មុំ៖ សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ា នី ហ៊ុន សែន ប្រធានកាកបាទក្រហមកម្ពុជា អមដោយមន្រ្តីជាន់ខ្ពស់រាជរដ្ឋាភិបាលកម្ពុជាជាច្រើនរូប នៅព្រឹកថ្ងៃ ទី០៥ ខែមករា ឆ្នាំ២០១៥នេះ បានអញ្ជើញជាអធិបតីដ៏ខ្ពង់ខ្ពស់ បើកការដ្ឋានសាងសង់អគាររដ្ឋបាលសាលា ខេត្តត្បូងឃ្មុំ។
ពិធីបើកការដ្ឋាននេះ ក៏មានការអញ្ជើញចូលរួមពីមន្រ្តីរាជការ កងកម្លាំងប្រដាប់អាវុធ និងប្រជាពលរដ្ឋខេត្តត្បូង ឃ្មុំជាច្រើនរយនាក់ផងដែរ។
ផ្ទៃដី ដែលប្រារព្ធពិធីបើកការដ្ឋានសាងសង់អគាររដ្ឋបាលសាលាខេត្តត្បូងឃ្មុំនាព្រឹកថ្ងៃនេះ មានទំហំ ៣០០ហិក តា ក្នុងចំណោមផ្ទៃដីសរុបប្រមាណ ២.០០០ហិកតា ដែលត្រូវបានគេត្រៀមបម្រុងទុកសម្រាប់សាងសង់ប្រព័ន្ធ ហេដ្ឋារចនាសម្ព័ន្ធនានា សម្រាប់បំពេញតម្រូវការរដ្ឋបាលនៅក្នុងខេត្តដែលទើបបង្កើតថ្មីមួយនេះ។
ផ្ទៃដី ដែលប្រើប្រាសសម្រាប់សាងសង់អគារដ្ឋបាលខេត្តត្បូងឃ្មុំ ស្ថិតនៅព្រៃម៉ៃសាក់ដងទង់ ក្នុងឃុំស្រឡប់ ស្រុកត្បូងឃ្មុំ។
សូមបញ្ជាក់ថា ខេត្តត្បូងឃ្មុំដែលទើបបង្កើតថ្មីនេះ ជាខេត្ត ដែលត្រូវបានកាត់ចេញពីខេត្តកំពង់ចាម មានផ្ទៃក្រ ឡាជិត ៥ពាន់គីឡូម៉ែត្រ មានក្រុងចំនួនមួយ (ក្រុង សួង) ស្រុកចំនួនប្រាំមួយ (ស្រុកត្បូងឃ្មុំ ក្រូចឆ្មារ ដំបែ មេ មត់ ពញាក្រែក និង អូរាំងឪ) ឃុំសង្កាត់ចំនួន ៦៤ និង មានប្រជាពលរដ្ឋជាង ៧៥ម៉ឺននាក់៕
ផ្ដល់សិទ្ធដោយ៖ដើមអម្ពិល