ក្រសួងព័ត៌មាន ផ្អាកមិនអោយផ្សាយស្ប៉តពាណិជ្ជកម្មផលិតផលគ្រឿងស្រវឹងតាមប្រព័ន្ធផ្សព្វផ្សាយ

ព័ត៌មានជាតិ

ក្រសួងព័ត៌មាន ផ្អាកមិនអោយផ្សាយស្ប៉តពាណិជ្ជកម្មផលិតផលគ្រឿងស្រវឹងតាមប្រព័ន្ធផ្សព្វផ្សាយ

02:48 PM 03.05.2019
Print Email

ភ្នំពេញ៖ ក្រសួងព័ត៌មាន ស្នើដល់ម្ចាស់ប្រព័ន្ធផ្សព្វផ្សាយទាំងអស់ ផ្អាកការផ្សាយស្ប៉តពាណិជ្ជកម្មផលិតផលគ្រឿងស្រវឹងតាមប្រព័ន្ធផ្សព្វផ្សាយនៅថ្ងៃបុណ្យវិសាខបូជា និងមាឃបូជា ជារៀងរាល់ឆ្នាំ ដើម្បីលើកស្ទួយវិស័យព្រះពុទ្ធសាសនា និងស្នើដល់ក្រសួងឧស្សាហកម្ម និងសិប្បកម្ម ពិនិត្យលើការស្នើដាក់សារព្រមានលើសំបកកំប៉ុងនិងដបផលិតផលគ្រឿងស្រវឹង។

រដ្ឋមន្ត្រីក្រសួងព័ត៌មាន លោកខៀវ កាញរីទ្ធ បានចេញលិខិតទៅកាន់ម្ចាសប្រព័ន្ធផ្សព្វផ្សាយទាំងអស់ កាលពីអង្គារ និងត្រូវបានផ្សព្វផ្សាយកាលពីថ្ងៃម្សិលមិញថា ពិធីបុណ្យវិសាខបូជា និងមាឃបូជា ត្រូវបានរាជរដ្ឋាភិបាលកំណត់ថាជាថ្ងៃបុណ្យជាតិ និងត្រូវបានប្រារព្ធធ្វើជារៀងរាល់ឆ្នាំ ដើម្បីរំលឹកដល់ព្រឹត្តិការណ៍ពិសេសចំនួន៣ ដែលទាក់ទងនឹងព្រះសម្មាសម្ពុទ្ធប្រសូត្រ ត្រាស់់ដឹង និងការចូលនិព្វានក្នុងថ្ងៃទី១៥កើត ពេញបូរណ៌បីខែវិសាខ។

លោកបន្តថា ចំណែកបុណ្យមាឃបូជា ត្រូវបានប្រារព្ធឡើងក្នុងន័យរំលឹកដល់ថ្ងៃដែលព្រះសម្មាសម្ពុទ្ធទ្រង់ប្រកាសបង្កើតព្រះពុទ្ធសាសនាក្នុងលោកនៅប្រទេសឥណ្ឌា កាលពី៥៨៨ឆ្នាំ មុនគ្រឹស្តសករាជនាថ្ងៃទី១៥កើតខែមាឃ។

ករណីនេះ លោកបានស្នើថា៖ «ដើម្បីលើកស្ទួយវិស័យព្រះពុទ្ធសាសនា ជាសាសនារបស់រដ្ឋដែលប្រជាពលរដ្ឋខ្មែរភាគច្រើនលើសលប់ជាពុទ្ធសាសនិកជន និងរំលឹកដល់ព្រឹត្តការណ៍មួយចំនួននោះ សូមម្ចាស់ប្រព័ន្ធផ្សព្វផ្សាយទាំងអស់ ផ្អាកការចាក់ផ្សាយស្ប៉តពាណិជ្ជកម្មផលិតគ្រឿងស្រវឹងនៃថ្ងៃប្រារព្ធពិធីបុណ្យវិសាខបូជានិងមាឃបូជា រៀងរាល់ឆ្នាំ តាមកាលបរិច្ឆេតជាក់ស្តែងក្នុងឆ្នាំនិមួយៗ»។

ស្របពេលគ្នានេះដែរ លោកខៀវ កាញារីទ្ធ ក៏បានផ្ញើលិខិតស្នើទៅកាន់ក្រសួងឧស្សាហកម្ម និងសិប្បកម្ម ប្រាប់ទៅក្រុមហ៊ុនផលិតគ្រឿងស្រវឹងនៅក្នុងស្រុកទាំងអស់ ដាក់សារព្រមាននៅលើសំបកកំប៉ុង និងសំបកដបផលិតផលគ្រឿងស្រវឹង ដូចជាសារព្រមាន «ពិសារគ្រឿងស្រវឹងសូមកុំបើកបរ» ដែលអាចជួយពញ្ញាក់អារម្មណ៍អ្នកទទួលទានគ្រឿងស្រវឹងឲ្យទទួលទានដោយមានការទទួលខុសត្រូវ និងជៀសវាងការទទួលទានហួសប្រមាណធ្វើឲ្យប៉ះពាល់ដល់សុខភាព អាយុជីវិត និងបង្កគ្រោះថ្នាក់ចរាចរណ៍។

ការស្នើនេះ បានធ្វើឡើងក្រោយពី គណៈប្រតិភូក្រសួងព័ត៌មាន បានជួបប្រជុំពិភាក្សាជាមួយសមាជិកឧត្តមក្រុមប្រឹក្សាពិគ្រោះ និងផ្តល់យោបល់ កាលពីថ្ងៃទី២៥ខែមេសា ដើម្បីពិនិត្យអំពីផលប៉ះពាល់នៃការផ្សាយពាណិជ្ជកម្មគ្រឿងស្រវឹង និងការទទួលទានគ្រឿងស្រវឹងហួសបរិមាណ។

អ្នកនាំពាក្យក្រសួងឧស្សាហកម្ម និងសិប្បកម្ម លោក អ៊ុំ សុថា បានមានប្រសាសន៍នៅថ្ងៃព្រហស្បត្តិ៍នេះថា លោកនៅពុំទាន់បានឃើញលិខិតនោះនៅឡើយ ហើយការឆ្លើយតបយ៉ាងណានោះ គឺរងចាំការពិនិត្យនិងសម្រេចពីថ្នាក់ដឹកនាំក្រសួងសិន។ លោកថា៖ «ប្រហែលជាលិខិតនោះដាក់ទៅខុទ្ទកាល័យឯកឧត្តមទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម អីចឹងរងចាំគាត់ពិនិត្យ និងមានចំណារសិន បានយើងអាចឆ្លើយតបបានចំពោះការស្នើនោះ»។

សម្រាប់ លោកអ៊ុំ សុថា យល់ថា ការដាក់ជាសារព្រមាន «ពិសារគ្រឿងស្រវឹងសូមកុំបើកបរ» នៅលើសំបកកំប៉ុង និងសំបកដបផលិតផលគ្រឿងស្រវឹងនេះ ក៏ជាការពញ្ញាក់ស្មារតីដល់អ្នកទទួលទាន កុំឲ្យបើកបរក្នុងពេលស្រវឹង ឬទទួលទានហួសប្រមាណដែលធ្វើឲ្យប៉ះពាល់ដល់សុខភាព និងសង្គម។ លោកថា៖ «ខ្ញុំគិតថា បើសិនជាដាក់សារព្រមាននេះ ក៏អាចជួយពញ្ញាក់ស្មារតីដល់អ្នកទទួលទានគ្រឿងស្រវឹងដែរ ដូចថា ម្នាក់ៗនៅពេលដែលយើងលូកដៃយកឬទិញរបស់[ផលិតផលគ្រឿងស្រវឹង]ហ្នឹងមកទទួលទាន ហើយឃើញសារនេះ អីចឹងពួកគេអាចភ្ញាក់ស្មារតីមិនទទួលទានច្រើនឬមិនទទួលទានដែរ អីចឹងខ្ញុំគិតថាល្អបើសិនមានការដាក់សារនេះ»។

លោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជា បានសាទរចំពោះវិធានការដែលលើកឡើងដោយក្រសួងព័ត៌មាននៅពេលនេះ ដែលជាការអប់រំដល់ប្រជាពលរដ្ឋពីផលប៉ះពាល់នៃគ្រឿងស្រវឹង។ ប៉ុន្តែដើម្បីកាត់បន្ថយហានិភ័យធ្ងន់ធ្ងរដែលបង្កឡើងដោយការទទួលទានគ្រឿងស្រវឹងនេះ លោកបានជំរុញឲ្យក្រសួង និងស្ថាប័នពាក់ព័ន្ធ ដាក់ចេញនូវវិធានការផ្សេងៗបន្ថែមទៀត ដូចជាការកំហិតការផ្សាយពាណិជ្ជកម្ម និងកំហិតលើការលក់ផលិតផលគ្រឿងស្រវឹងជាដើម។

លោកថា៖ «វិធានការទោលតែមួយណានោះ អត់មានប្រសិទ្ធិភាពគ្រប់គ្រាន់ក្នុងការកាត់បន្ថយការសេពគ្រឿងស្រវឹងទេ អីចឹងក្រសួងពាក់ព័ន្ធគួរតែមានវិធានការជាកញ្ចប់ ដូចជាការហាម ឬកំហិតការផ្សាយពាណិជ្ជកម្មគ្រឿងស្រវឹង ដែលជាមូលហេតុចម្បងមួយដែលនាំឲ្យប្រជាពលរដ្ឋយ៉ាងច្រើនបានប្រើប្រាស់គ្រឿងស្រវឹង ហើយចាប់ផ្តើមប្រើប្រាស់ក្នុងវ័យកាន់តែក្មេង អីចឹងយើងត្រូវមានវិធានការរួមផ្សំផ្សេងៗទៀត ដើម្បីដោះស្រាយករណីនេះឲ្យមានប្រសិទ្ធិភាព»។

បើតាមលោកវេជ្ជបណ្ឌិត មុំ គង់ ការសេពគ្រឿងស្រវឹង បានបង្កនូវផលប៉ះពាល់ចំនួន៤យ៉ាងសំខាន់ ក្នុងនោះរួមមាន បង្កឲ្យមានផលប៉ះពាល់ដល់សុខភាពដែលអាចកើតមានជំងឺជាង ២០០មុខ, បង្កើតឲ្យមានអំពើហិង្សា, បណ្តាលឲ្យមានគ្រោះថ្នាក់ចរាចរណ៍ និងការសេពគ្រឿងស្រវឹងក៏ជាផ្នែកមួយយ៉ាងសកម្មធ្វើឲ្យមានភាពក្រីក្រផងដែរ ៕

ប្រភព ៖ khmertimes

Facebook Comments

Tags: Local news, Social news,

CamNews