ភ្នំពេញ៖ រថយន្តទំនើបមួយគ្រឿង ដែលចតខាងមុខ ផ្ទះម៉ាក តូយូតា កាម៉ារី អាយ៉ារីស ដែលឳពុកម្តាយទុកឲ្យ កូនស្រី លេងខាងក្នុងតែម្នាក់ឯង បានរអិលថយក្រោយ បណ្តាលឲ្យប៉ះជាមួយ រថយន្តមួយគ្រឿង និងម៉ូតូមួយ គ្រឿងទៀត ដែលកំពុងធ្វើដំណើរ តាមដងផ្លូវ ប៉ុន្តែសំណាងល្អ មិនបង្កឲ្យមានគ្រោះថ្នាក់ ធ្ងន់ធ្ងរកើតឡើង នោះទេ។
ហេតុការណ៍ធ្វេសប្រហែសនេះ បានកើតឡើងកាលពីវេលាម៉ោង ប្រហែល ១០៖៣០នាទីព្រឹក ថ្ងៃទី១៥ ខែកុម្ភៈ ឆ្នាំ២០១៤ នៅចំណុចខាងមុខផ្ទះ ពេទ្យសត្វមួយកន្លែងលេខ ៣៣៨ ផ្លូវលេខ ២៧១ សង្កាត់ទឹកល្អក់៣ ខណ្ឌ ទួលគោក។
សាក្សីដែលឃើញហេតុការណ៍ផ្ទាល់ភ្នែក បាននិយាយថា មុនដំបូងគេបានឃើញម្ចាស់ផ្ទះ ពេទ្យសត្វខាងលើបាន បណ្តោយឲ្យកូនស្រីរបស់ខ្លួន ដែលមានអាយុប្រហែល ៦ឆ្នាំ ឲ្យលេងក្នុងរថយន្តតែម្នាក់ ដោយក្មេងស្រីនោះ បានចុចស៊ីផ្លេលេងទៀតផង ស្រាប់តែមួយស្របក់ក្រោយមក គេឃើញរថយន្តទំនើបម៉ា តូយូតា អាយ៉ារីស ពាក់ស្លាក់លេខ ភ្នំពេញ 2Y-5962 នោះ បានរអិលថយក្រោយ សំដៅទៅថ្នល់ប៉ះជាមួយរថយន្តមួយគ្រឿងទៀត ម៉ាកកាម៉ារី គូទស្វិត ពណ៌សំបកឳឡឹក បន្ទាប់ក៏ប៉ះជាមួយនឹង ម៉ូតូមួយគ្រឿងទៀត ម៉ាកហុងដា សេ១២៤ ពណ៌ខ្មៅ សេរី ២០១២ បណ្តាលឲ្យម៉ូតូដួល ចំណែករថយន្តបង្ក បែកស្តុបខាងក្រោយផ្នែកខាងស្តាំ រីឯអ្នកបើក ម៉ូតូសំណាងល្អ លើកជើងទាន់ ហើយម៉ូតូខូចខាតតិចតួច។
ក្រោយហេតុការណ៍កើតឡើង រថយន្តម៉ាកកាម៉ារី គូចស្វិតដែលប៉ះដំបូងគេនោះ មិនបានឲ្យភាគីរថយន្តបង្ក សងការខូចខាតនោះទេ រួចហើយក៏បន្តដំណើរទៅមុខ ដោយឡែកម៉ូតូរងគ្រោះ ត្រូវបានភាគីរថយន្តជាកម្មសិទ្ធិ របស់ម្ចាស់ផ្ទះពេទ្យសត្វនោះ សម្របសម្រួលដោយចេញថ្លៃ ខូចខាត ដើម្បីបញ្ចប់រឿង និងមិនបានរំខាន ដល់ សមត្ថកិច្ចមូលដ្ឋាននោះទេ។
សូមបញ្ជាក់ផងដែរថា នៅក្នុងគ្រោះថ្នាក់ដោយចៃដន្យនេះ អ្នកឃើញហេតុការណ៍ បានដាក់ការស្តីបន្ទោស ទៅលើឳពុកម្តាយ ដែលបណ្តោយឲ្យកូនស្រីដែល មានអាយុត្រឹមតែប្រហែល ៦ឆ្នាំ លេងក្នុងរថយន្តនោះ ហើយ នេះក៏ជាសំណាង ល្អមួយដែរ ដែលការខូចខាតមានទំហំតិចតួច ប៉ុន្តែបើមានរថយន្ត ណាមួយបើកលឿន ខណៈរថយន្តរអិល ថយក្រោយវិញ ប្រាកដជាមានរឿងអកុសល កើតឡើងជាក់ជាមិនខាន។ នេះក៏ជា មេរៀនមួយដែរសម្រាប់ ឳពុកម្តាយគ្រប់រូប បើស្រឡាញ់កូន មិនត្រូវទុកកូនៗឲ្យ លេងក្នុងរថយន្តនោះទេ ៕
ផ្តល់សិទ្ធិដោយ៖ ដើមអំពិល