ឃីត សំម៉ាលីស ត្រូវស្វាមីហាម មិនឲ្យច្រៀងក្នុងផលិតកម្មផ្សេង ជះទុន២០ម៉ឺនដុល្លារ បើក
(ភ្នំពេញ)៖ អតីតតារាចម្រៀង របស់ផលិតកម្មដាយម៉ិន អ្នកនាង ឃិត សំម៉ាលីស បន្ទាប់ពីស្ងប់ស្ងាត់ លើវិថីសិល្បៈអស់រយៈពេល ជាង១ឆ្នាំមក ខណៈនេះត្រូវបានលេចវត្តមានជាថ្មី ឡើងវិញ នៅលើទីផ្សារចម្រៀង ជាមួយការបង្ហាញខ្លួនចូលច្រៀង នៅក្នុងផលិតកម្មថ្មី ដែលទើបបង្កើតឡើងមានឈ្មោះថា «បុត្រាភាពយន្ត» ហើយត្រូវបានទស្សនិកជនដឹងទេថា ផលិតកម្មថ្មីមួយនេះ ជាការបង្កើតឡើងរួមគ្នា រវាងនាងនិងស្វាមី ដោយបានចាយទុនប្រមាណ២០ម៉ឺនដុល្លារ។
ការបែកធ្លាយដំណឹង ធ្វើជាថៅកែម្ចាស់ផលិតកម្ម «បុត្រា» ពីសំណាក់តារាស្រី អ្នកនាង ឃិត សំម៉ាលីស ខាងលើនេះ គឺបានកើតឡើងស្របពេលជាមួយគ្នា នៃការរៀបចំពិធីគំរប់ខួបអាពាហ៍ពិពាហ៍ រយៈពេល១ឆ្នាំ រវាងនាងជាមួយស្វាមី ដែលបានធ្វើឡើង នាថ្ងៃទី០៧ ខែវិច្ឆិកា ឆ្នាំ២០១៦ ខណៈដែលពិធីនេះ បានធ្វើផ្គួបចូលរួមគ្នា ក្នុងពេលតែមួយ គឺពិធីគំរប់ខួបអាពាហ៍ពិពាហ៍,ការដាក់តាំងបង្ហាញផលិតផល នាំចូលពីក្រៅស្រុក និងការប្រកាសបើកដំណើរការផលិតកម្ម «បុត្រា»។
តារាចម្រៀងស្រី អ្នកនាង ឃិត សំម៉ាលីស បានថ្លែងប្រាប់ Khmertalking ឲ្យដឹងថា កាលពីថ្ងៃទី០៧ ខែវិច្ឆិកា ឆ្នាំ២០១៦ កន្លងមកនេះ នាងបានរៀបចំធ្វើពិធីគំរប់ ខួបអាពាហ៍ពិពាហ៍ផង នឹងការដាក់តាំងបង្ហាញនូវផលិតផល នាំចូលមកពីក្រៅប្រទេស។ មិនតែប៉ុណ្ណោះ ក៏ដើម្បីអបអរការបើក ផលិតកម្មថ្មីរបស់នាង ជាមួយស្វាមីដែលមានឈ្មោះថា «បុត្រាភាពយន្ត» នេះផងដែរ។
អ្នកនាង ឃិត សំម៉ាលីស បានបញ្ជាក់ប្រាប់ ពីមូលហេតុដែលនាំឲ្យនាង និងស្វាមីសម្រេចចិត្ត ចាយទុនខ្ទង់រាប់ម៉ឺនដុល្លារ ដើម្បីបើផលិតកម្មនេះថា «ដំបូងឡើយ គឺស្វាមីរបស់ខ្ញុំគាត់ឲ្យឈប់ ពីសិល្បៈ ប៉ុន្តែក្រោយមកទៀត ដោយសារខ្ញុំមិនសូវទម្លាប់ខ្លួន តាមរយៈការរកស៊ីបើកមុខជំនួញនោះ ទើបសម្រេចចិត្ត សុំស្វាមីចូលច្រៀងវិញ រួចក៏មានឯកភាពយល់ព្រម ពីគាត់(ស្វាមី) តែមិនអនុញ្ញាតិឲ្យចូល ផលិតកម្មផ្សេងទេ ដោយគាត់បើកផលិតកម្មថ្មីខ្លួនឯង ឲ្យខ្ញុំច្រៀងផង និងមើលការខុសត្រូវក្នុងនោះផង!»។
តារាចម្រៀងអ្នកនាង ឃិត សំម៉ាលីស បានបញ្ជាក់បន្ថែមថា ចំពោះដើមទុនដែលត្រូវចំណាយ លើការបើកផលិតកម្មនេះ គឺមានរហូតដល់ទៅប្រមាណ២០ម៉ឺនដុល្លារ ដោយហេតុថា យើងត្រូវចំណាយលើសម្ភារៈថត ខារ៉ាអូខេទាំងស្រុងតែម្ដង៕
ផ្តល់សិទ្ធដោយ ៖ ខ្មែរថកឃីង
តារា ដែលមើលច្រើន
