ម៉េង កែវពេជ្ជតា ៖ «ខ្ញុំគាំទ្រផលិតផលខ្មែរ តែមិនគួរប៉ាក់រូបប្រាសាទអង្គរវត្តលើកន្លេលដូច្នេះទេ»
(ភ្នំពេញ)៖ កំពូលតារាចម្រៀងចាស់វស្សា សំឡេងពីរោះរណ្តំចិត្ត ប្រៀបនឹងរៃកណ្តឹង អ្នកនាង ម៉េង កែវពេជ្ជតា ក្រោយពីបានប្រទះឃើញ នៅលើផលិតផលកន្លេលរបស់ខ្មែរ ដែលត្រូវបានអ្នកផលិតច្នៃឡើង ដើម្បីឲ្យមានភាពប្លែក និងទាក់ទាញចំណាប់អារម្មណ៍ ពីអតិថិជន ទិញយកទៅប្រើប្រាស់ ដោយសុខចិត្តប៉ាក់រូបប្រាសាទអង្គរវត្ត នៅលើកន្លេល ភ្លាមៗនោះ អ្នកនាង ម៉េង កែវ ពេជ្ជតា ក៏បានថតបង្ហោះភ្ជាប់ ជាមួយការស្នើឲ្យអ្នកផលិត បញ្ឈប់ការយករូបប្រាសាទអង្គរវត្ត មកប៉ាក់លើកន្លេល ដូច្នេះទៀត ព្រោះវាមើលទៅហាក់មិនគប្បីទាល់តែសោះ។
តារាចម្រៀងសំឡេងស្រទន់ អ្នកនាង ម៉េង កែវពេជ្ជតា បានសរសេរនៅលើបណ្តាញ សង្គមហ្វេសប៊ុករបស់ខ្លួនថា «តើអ្នកគិតដូចខ្ញុំទេ? កន្ទេលទាំងនេះជាស្នាដៃ និងជារបស់ខ្មែ ។ ការគាំទ្រផលិតផលខ្មែរ គឺជារឿងមួយដ៏ប្រពៃណាស់ ព្រោះអាចមានបច្ច័យល្អច្រើន ចំពោះប្រទេស ក៏ដូចជាប្រជាពលរដ្ឋខ្មែរទាំងមូល ដូច្នេះការផលិតអ្វីក៏ដោយ ចាំបាច់ត្រូវគិតពីផល ដែលទទួលទាំងវិជ្ជមាន និងអវិជ្ជមាន កន្ទេលដែលថតបង្ហាញនេះមួយ មានរូបភាពប្រាសាទអង្គរវត្ត!»។
អ្នកនាង ម៉េង កែវពេជ្ជតា បានសង្កត់ធ្ងន់ទៀតថា «ប្រសិនបើកន្ទេលនេះ ជាកន្ទេលសម្រាប់ដាក់តាំងលើជញ្ជាំង ដាក់លម្អលើតុ នោះមិនថ្វីទេ តែបើជាកន្ទេល សម្រាប់ក្រាលគេងអង្គុយលើ ដើរជាន់ពីលើ ឬយកទៅប្រើប្រាស់ក្នុងលក្ខខណ្ឌ ដែលមិនសមរម្យនោះ ពិតជាមិនត្រឹមត្រូវឡើយ ព្រោះវាខុសឆ្គង និងប៉ះពាល់ខ្លាំងណាស់ ហើយប៉ះពាល់អ្វីខ្លះនោះ បងប្អូនប្រាកដជាជ្រាបច្បាស់ ។ តាមការគិតរបស់ខ្ញុំ បើអាចឈប់បានគួរតែឈប់!»។
តារាចម្រៀងអ្នកនាង ម៉េង កែវពេជ្ជតា បានបន្ថែមដោយស្នើដល់អ្នកផលិតថា «អ្នកផលិតអាចច្នៃជារូបអ្វី ក៏បាន គ្រាន់តែចៀសវាងរូបភាពប៉ះពាល់។ ចង់ជម្រាបថា នាងខ្ញុំគាំទ្រផលិតផលខ្មែរជារៀងរហូត សូមញ្ជើញអនុមោទនាថ្ងៃសីល ទាំងអស់គ្នាណា៎ !»។
យ៉ាងណាមិញបន្ទាប់ ពីមានការបញ្ចេញមិតបែបនេះ ពីសំណាក់តារាចម្រៀង អ្នកនាង ម៉េង កែវពេជ្ជតា នៅលើបណ្តាញសង្គមរបស់ខ្លួន កាលពីថ្ងៃម្សិលមិញនេះ គេសង្កេតឃើញមានអ្នកនិយម លេងបណ្តាញសង្គមហ្វេសប៊ុកជាច្រើន បង្ហាញអារម្មណ៍ យល់ស្របដូចអ្នកនាង ហើយក៏មានការ Shaer ដោយស្នើរឲ្យអ្នកផលិត បញ្ឈប់ការយករូបប្រាសាទអង្គរវត្ត ទៅប៉ាក់លើកន្លេល ដូច្នេះទៀត៕
ផ្តល់សិទ្ធដោយ ៖ ខ្មែរថកឃីង
តារា ដែលមើលច្រើន
