(ភ្នំពេញ)៖ តារាសម្ដែងធ្លាប់មានកេរ្តិ៍ឈ្មោះល្បីសុះសាយ កាលពីជិត១០ឆ្នាំមុន នាង ប្រាសាទ ដាវីន បានបង្ហាញវត្តមាន ក្នុងពិភពសិល្បៈឡើងវិញ ក្នុងរយៈពេលថ្មីៗនេះ គួរឲ្យភ្ញាក់ផ្អើលបំផុត ខណៈដែលការបាត់វត្តមានរបស់នាង អស់ពេលជាច្រើនឆ្នាំមកនេះ ត្រូវបានមហាជនគិតថា ប្រាសាទ ដាវីន លែងមកជាន់ទឹកដីសិល្បៈទៀតហើយ ព្រោះតែកម្រិតជីវភាព និងពូជពង្សវង្សត្រកូលរបស់នាង ជាអ្នករស់នៅបែបធូរធា មិនចាំបានមកចំណាយកម្លាំងមកសន្សំប្រាក់ល្អិត បែកញើស ពីវិស័យនេះឡើយ។ ប៉ុន្តែអ្វីដែលនឹកស្មានមិនដល់នោះ ប្រាសាទ ដាវីន បានមកកាន់សង្វៀនសិល្បៈដូចដើមវិញ តែលើកនេះ នាងហាក់ស៊ីថ្លៃខ្ពស់បន្តិចហើយ បើសិនជាចង់បាននាងសម្ដែង ឬថតឲ្យផលិតផលរបស់ខ្លួន។
ជាការកត់សម្គាល់ នៅក្នុងឆ្នាំ២០១៦ នេះមានព្រឹត្តិការណ៍ជាច្រើន ក្នុងពិភពសិល្បៈខ្មែរ បានកើតឡើង ខណៈអ្នកសិល្បៈមួយចំនួន ដែលបានបោះបង់ចោលអាជីពនេះ ក៏នាំគ្នាត្រឡប់មកប្រឡូកវិញយ៉ាងព្រោងព្រាត រួមមាន នាង វីជេ អាណូ ,នាង ប្រាសាទ ដាវីន, ឌីជេ អាលីយ៉ា និងអ្នកនាង លី ម៉ារីណា ជាដើម ក៏បង្ហាញមុខឡើងវិញផងដែរ។
ការវិលត្រឡប់មកវិញរបស់អ្នកសិល្បៈល្បីៗទាំងនេះ ធ្វើឲ្យពួកគេហាក់មានការងារធ្វើច្រើន ជាងមុនពេលពួកគេចាកចេញ ពីសិល្បៈទៅទៀត ជាក់ស្ដែងដូចជា នាង វិជេ អាណូ គ្រាន់តែថតឲ្យសំអាងការគេ គឺក្នុងមួយថ្ងៃនាង ស៊ីថ្លៃរហូតដល់៧៥០ដុល្លារឯណោះ ដែលតលៃនេះខ្ពស់ជាង សុគន្ធ នីសា និង សុខ ស្រីនាង ទៅទៀត។ កាន់តែខ្លាំងជាងនេះ នាង ប្រាសាទ ដាវីន តួឯកស្រីក្នុងបទ «ភ្លើង» របស់អេដា ឯណេះវិញ ដែលកំពុងតែប្រឡូកសិល្បៈ យ៉ាងសស្រាក់សស្រាំ ក៏មានតម្លៃខ្លួនថ្លៃកប់ពពកដែរ ។
ប្រភពពីក្រុមអ្នកសំអាងការ បាននិយាយថា នាង ប្រាសាទ ដាវីន គ្រាន់តែថតឲ្យសំអាងការ «សុខណា៣៥» ស៊ីថ្លៃដល់ទៅ១៥០០ដុល្លារឯណោះ ដែលលើសពី វីជេ អាណូ ពីរដង ព្រោះនាងមិនសូវថតសំអាងការច្រើនឡើយ ពោលគឺបើកឆាកឡើងថតឲ្យសំអាងការ «សុខណា៣៥» នេះផ្ទាល់តែម្ដង។ មូលហេតុដែលធ្វើឲ្យ ម្ចាស់សំអាងការ រើសយកនាងជាមួយនឹងតម្លៃខ្ពស់បែបនេះ ព្រោះតែយល់ថា នាងជាតារាកាលីបខ្ពស់ ថែមទាំងមិនសូវថតឲ្យសំអាងការច្រើនឡើយ។ ម្យ៉ាងនាង ប្រាសាទ ដាវីន ទើបតែមកប្រឡូកក្នុងសិល្បៈវិញ ដូចនេះម្ចាស់សំអាងការ ចាយលុយមិនស្ដាយទេ ក្នុងការបានតារាស្រីរូបនេះ មកថតផ្សព្វផ្សាយ ពីសំអាងការរបស់ខ្លួន ក្នុងរដូវកាលថ្មីនេះ។
អ្នកនាង ប្រាសាទ ដាវីន មិនអាចសុំការបំភ្លឺបានទេ ចំពោះរឿងដែលនាងស៊ីថ្លៃ ដល់ទៅ១៥០០ដុល្លារ គ្រាន់តែថតសំអាងការមួយថ្ងៃ ព្រោះអាចស្មើរនឹង តារាល្បីខ្លះ ថតរឿងដល់ទៅមួយខែឯណោះ។
អ្នកនាង ប្រាសាទ ដាវីន ជាអតីតហ្វ្រេស៊ី ហើយបានចាកចេញពីប្រទេសកម្ពុជា ទៅរៀបការប្ដីនៅប្រទេសអូស្ត្រាលី។ តែក្រោយមកអ្នកនាង ប្រាសាទ ដាវីន ក៏វិលមកប្រឡូកសិល្បៈ ហើយអ្វីដែលសំខាន់រូបរាងនាង នៅតែស្អាតផូរផង់ មិនចាស់ទៅតាមវ័យឡើយ ទើបនាង នៅតែមានទីផ្សារខ្ពស់ ក្នុងវិស័យសិល្បៈដដែល៕
ផ្តល់សិទ្ធដោយ ៖ ខ្មែរថកឃីង