ហ៊ុន បរិញ្ញា ចេញពីផលិតកម្ម Bigman ចូលសាន់ដេ សង្ស័យអន់ចិត្តនឹងការមិនចេញបទចម្រៀងឲ្យ
(ភ្នំពេញ)៖ អតីតារាចម្រៀងប្រុសវ័យ២៧ឆ្នាំ របស់ផលិតកម្ម Bigman លោក ហ៊ុន បរិញ្ញា ក្រោយពីស្ងប់ស្ងាត់បាត់មុខ មួយរយៈពេលលើវិស័យចម្រៀង ថ្មីៗនេះ ស្រាប់តែធ្លាយដំណឹងថា តារាប្រុសរូបនេះ បានសម្រេចចិត្តចាកចេញ ពីផលិតកម្មចាស់ ដែលធ្លាប់ផ្តល់ដំបូល គឺផលិតកម្ម Bigman ដោយគ្មានភាពស្តាយស្រណោះបន្តិចសោះឡើង ខណៈដែលបទចម្រៀង របស់លោកមិនត្រូវបានចរាចរណ៍ ចេញលក់នៅលើទីផ្សារ ដែលជាដើមចមធ្វើឲ្យតារារូបនេះ ស្ទើរបាត់ឈ្មោះពីទីផ្សារសិល្បៈ។
បើតាមប្រភពផ្លូវការមួយ បានបង្ហើបថា តារាចម្រៀងប្រុសធ្លាប់មានឈ្មោះល្បីគួរសម លើវិថីសិល្បៈ លោក ហ៊ុន បរិញ្ញា ក្រោយពីរសាត់ចេញពីផលិតកម្ម Bigman បានមួយរយៈពេលខ្លីលោកក៏ឈោងចាប់បាន ឱកាសចូលជាតារាចម្រៀង របស់ផលិតកម្មល្បីឈ្មោះ សាន់ដេ។ មិនតែប៉ុណ្ណោះ បច្ចុប្បន្នតារាប្រុសរូបសង្ហា លោក ហ៊ុន បរិញ្ញា ក៏ត្រៀមចេញបទចម្រៀង ចំនួន២បទ ដើម្បីអង្រួនបេះដូងយុវវ័យ និងដណ្តើមយកទីផ្សារគាំទ្រពីទស្សនិកជន ផងដែរ។
ឆ្លើយតបសំណួររបស់គេហទំព័រ Khmertalking នារសៀលថ្ងៃទី២៨ ខែតុលា ឆ្នាំ២០១៦នេះ តារាចម្រៀងមានដើមកំណើត ពីទឹកដីខេត្តកំពង់ចាម លោក ហ៊ុន បរិញ្ញា បាននិយាយថា លោកពិតជា បានចាកចេញពីផលិតកម្ម Bigman ហើយឈោងចូលផលិតកម្ម សាន់ដេ ប្រាកដមែន ប៉ុន្តែការចាកចេញពី ផលិតកម្មចាស់ Bigman គឺពុំបណ្តាលមកពីមូលហេតុ ជម្លោះ ឬបញ្ហាអ្វីនោះឡើយ គ្រាន់តែលោកចង់ប្តូរមកចាប់យកឱកាសថ្មី ជាមួយផលិតកម្ម សាន់ដេ តែប៉ុណ្ណោះ។
តារាប្រុសលោក ហ៊ុន បរិញ្ញា បានបន្តទៀតថា អំឡុងពេលដែលលោកចាប់ផ្តើម ឈានជើងចូលមកផលិតកម្មសាន់ដេ បើគិតរហូតមកទល់ពេលនេះ គឺមានរយៈពេលមួយខ្យល់ធំមកហើយ ដែលក្នុងនោះបច្ចុប្បន្នលោក ក៏ត្រៀមចេញលក់ CD បទចម្រៀងចំនួន២បទ នៅក្នុងផលិតកម្មសាន់ដេ ដោយបទទី១-មានចំណងជើងថា «សារភាពថាបងឈប់ស្រឡាញ់អូន» និងបទទី២ «ក្តីសុខបងគឺអូន ក្តីសុខអូនគឺលុយ»។
ជាមួយការថ្លែងយ៉ាងដូច្នេះ តារាចម្រៀងចំណូលថ្មី របស់ផលិតកម្មសាន់ដេ លោក ហ៊ុន បរិញ្ញា បានបញ្ជាក់បន្ថែមថា តាមរយៈបទចម្រៀងចំនួន២បទខាងលើនេះ លោកសង្ឃឹម និងជឿជាក់ថា ក្រោយពីចេញលក់ជា CD និង VCD ផ្លូវការ អាចទទួលបានការចាប់អារម្មណ៍គាំទ្រ ពីសំណាក់មិត្តៗយុវវ័យ ព្រោះទាំង២បទនេះ ភាគច្រើន មានបញ្ចូលមនោសញ្ចេតនា ទាក់ពីជីវិតស្នេហាបែបយុវវ័យ នាសម័យបច្ចុប្បន្ន៕
ផ្តល់សិទ្ធដោយ ៖ ខ្មែរថកឃីង
តារា ដែលមើលច្រើន
