អង្គការសមាគមអភិរក្សសត្វព្រៃ នឹងលែងសត្វកូនកន្ធាយក្បាលកង្កែប ចំនួន២០០ក្បាល

ព័ត៌មានជាតិ

អង្គការសមាគមអភិរក្សសត្វព្រៃ នឹងលែងសត្វកូនកន្ធាយក្បាលកង្កែប ចំនួន២០០ក្បាល

01:43 PM 21.05.2019
Print Email

ភ្នំពេញ៖ អង្គការសមាគមអភិរក្សសត្វព្រៃ WCS និងរដ្ឋបាលជលផល គ្រោងនឹងលែងសត្វកូនកន្ធាយក្បាលកង្កែប ឬល្មិច ចំនួន២០០ក្បាល ចូលទៅក្នុងទន្លេមេគង្គ ក្នុងភូមិសាស្រ្តឃុំកំពង់ចាម ស្រុកសំបូរ ខេត្តក្រចេះ នៅចុងសប្តាហ៍នេះ ខណៈដែលសត្វនេះត្រូវបានចាត់ទុកជាប្រភេទសត្វជិតផុតពូជ ដោយសារកត្តាគំរាមកំហែងពីមនុស្ស និងធម្មជាតិ។

ប្រធានផ្នែកទំនាក់ទំនងនៃអង្គការសមាគមអភិរក្សសត្វព្រៃ លោក ល័ក្ខ រតនា (Leak Ratna) បានឲ្យដឹងកាលពីថ្ងៃម្សិលមិញថា បច្ចុប្បន្ន សត្វកន្ធាយកង្កែប ត្រូវបានចាត់ចូលក្នុងបញ្ជីក្រហមរបស់អង្គការ IUCN ជាប្រភេទសត្វជិតផុតពូជ ដោយសារតែប្រជាពលរដ្ឋនៅតាមតំបន់មួយចំនួន បានចាប់យកសត្វប្រភេទនេះ យកទៅធ្វើជាអាហារ និងជួញដូរឆ្លងប្រទេសជាដើម។

លោកថា៖ «អីចឹងហើយបានជាខាងអង្គការ WCS សហការជាមួយរដ្ឋបាលជលផលកម្ពុជាយើង ធ្វើការអភិរក្សសត្វកន្ធាយក្បាលកង្កែបនេះឡើងវិញ តាមរយៈការការពារសំបុកពងរបស់វា និងយកទៅលែងក្នុងទម្លេមេគង្គជាដើម ដើម្បីកុំឲ្យវាផុតពូជ»។

បើតាម លោក រតនា កូនកន្ធាយក្បាលកង្កែបទាំង ២០០ក្បាល ដែលគ្រោងលែងនៅថ្ងៃសៅរ៍នេះ ជាកូនកន្ធាយដែលបានមកពីការរុករកឃើញ និងកិច្ចខិតខំប្រឹងប្រែងក្នុងការថែរក្សាការពារសំបុកពងរបស់វា ពីសំណាក់មន្ត្រី WCS និងរដ្ឋបាលជលកម្ពុជា។ លោកថា៖ «យើងមានបង្កើតជាក្រុមការងារដើម្បីដើរស្វែងរកសំបុកពងសត្វកន្ធាយនេះនៅតាមឆ្នេរខ្សាច់នៃដងទន្លេមេគង្គ អីចឹងពេលដែលឃើញហើយ យើងដាក់កម្លាំងការពារទាំងយប់ទាំងថ្ងៃ ដើម្បីឲ្យកូនកន្ធាយនឹងវាកើត ហើយពេលដែលវាកើតហើយ យើងមើលថែទាំវាក្នុងទ្រុងរហូតដល់បានច្រើនហើយ បានយើងលែងវាចូលទៅក្នុងទន្លេវិញ។

ការលែងសត្វកូនកន្ធាយក្បាលកង្កែបនេះ ធ្វើឡើងស្របពេលដែលពិភពលោក នឹងប្រារព្ធទិវាអណ្តើកពិភពលោក នៅថ្ងៃទី២៣ខែឧសភានេះ។

លោក រតនា បានបន្ថែមថា៖ «កម្មវិធីនេះ ក៏ជាការផ្ញើសារដល់សាធារណជនចូលរួមអភិរក្សទាំងអស់គ្នា ព្រោះសត្វកន្ធាយក្បាលកង្កែបនេះជាសម្បត្តិរបស់ជាតិ ជាពិសេសក៏សូមឲ្យប្រជាពលរដ្ឋនៅតាមតំបន់មូលដ្ឋានដែលសត្វកន្ធាយរស់នៅ ឲ្យគាត់យល់ដឹងថា កន្ធាយក្បាលកង្កែបនេះ កំពុងតែប្រឈមនឹងការគំរាមកំហែងខ្លាំងមែនទែន ដោយសារមានក្រុមមនុស្សឆ្លៀតឱកាសធ្វើអាជីវកម្មលើសត្វកន្ធាយ ដោយយកទៅលក់ជួញដូរនៅតាមអាហារដ្ឋាន និងជួញដូរទៅក្រៅប្រទេសជាដើម។

ប្រតិភូរាជរដ្ឋាភិបាលកម្ពុជាទទួលបន្ទុកជាប្រធានរដ្ឋបាលជលផល លោកអេង ជាសាន ពុំអាចសុំការអត្ថាធិប្បាយជុំវិញករណីនេះបានទេ កាលពីថ្ងៃម្សិលមិញ។

បើតាម WCS សត្វកន្ធាយក្បាលកង្កែប ឬល្មិច ត្រូវបានក្រុមអភិរក្សស្រាវជ្រាវរកឃើញសារជាថ្មីក្នុងអំឡុងឆ្នាំ២០០៧ នៅតាមបណ្តោយទន្លេមេគង្គចម្ងាយប្រមាណ ៤៨គីឡូម៉ែត្រ ដែលលាតសន្ធឹងពីខេត្តក្រចេះដល់ខេត្តស្ទឹងត្រែង។កាលពីខែមេសា ក្រុមអ្នកអភិរក្សសត្វព្រៃរបស់អង្គការ WCS និងមន្ត្រីរដ្ឋបាលជលផល ក៏បានលែងកូនកន្ធាយក្បាលកង្កែបនេះជាង ៥០០ក្បាល ចូលទៅក្នុងទន្លេមេគង្គនៃខេត្តក្រចេះនេះផងដែរ ដែលគិតចាប់តាំងពីឆ្នាំ២០០៧ មកដល់ដើមឆ្នាំនេះ សត្វប្រភេទនេះត្រូវបានលែងជាង ១០០០ក្បាលទៅក្នុងទឹកទន្លេដែលជាជម្រកធម្មជាតិរបស់វា ៕

ប្រភព ៖ khmertimes

Facebook Comments

Tags: Local news, Social news,

CamNews