នាយ កុយ និង ខាត់ សុឃីម ត្រូវបាន អ្នកគាំទ្រសរសើរថា លេងកំប្លែងមិនចេះប្រើពាក្យ ចំអេសចំអាស
(ភ្នំពេញ)៖ តារាកំប្លែងប្រុស-ស្រីពីររូប គឺលោក ជូង ជី ហៅនាយ កុយ និងតារាស្រីពហុជំនាញ អ្នកនាង ខាត់ សុឃីម ថ្មីៗនេះ ត្រូវបានអ្នកលេង Facebook ម្នាក់ លើកសរសើរពីអត្តចរឹកឫកពារ ព្រមទាំងពាក្យសម្តី និយាយបានសមរម្យមិនចេះលេងកំប្លែង ប្រើពាក្យសម្តីចំអេសចំអាស ដូចតារាកំប្លែងស្រី-ប្រុស ដទៃទៀតឡើយ។
តាមរយៈ Account Facebook មួយឈ្មោះថា «Lin Bebe» បានសរសេរបង្ហោះ ជាសាធារណៈដោយមានភ្ជាប់មក ជាមួយរូបថតនាយ កុយ និងអ្នកនាង ខាត់ សុឃីម ថតរួមគ្នាថា «ខ្ញុំចូលចិត្តពួកគាត់ ត្រង់ពាក្យសម្តីមិនចំអេសចំអាស ដូចតារាកំប្លែងឥឡូវទេ បានល្បីបន្តិចតម្លើងឫក។ ពួកគាត់បានផ្តល់ការអប់រំ តាមរយៈការលេងកំប្លែង អ៉ីចឹងបានគេយកពួកគាត់ ធ្វើជាគណៈកម្មាធិការ Cambodia’s Got Talent ..!»។
ទន្ទឹមគ្នានឹងការលើកសរសើរ ពីសំណាក់ម្ចាស Account Facebook ឈ្មោះ Lin Bebe ខាងលើនេះ គេក៏សង្កេតឃើញមានមហាជន អ្នកលេងហ្វេសប៊ុកមួយចំនួនធំ ក៏បានបញ្ចេញមតិគាំទ្រ និងលើកសរសើរពីតារាកំប្លែងនាយ កុយ និងអ្នកនាង ខាត់ សុឃីម ស្រដៀងគ្នានេះថា ពួកគេក៏ស្រឡាញ់តារាប្រុស-ស្រីទាំងពីរូបនេះដែរ ។ អ្នកកំប្លែងសម័យឥឡូវ គេមិនដែលមើលសោះ។
ដោយឡែកសម្រាប់តារាស្រីពហុជំនាញអ្នកនាង ខាត់ សុឃីម ឯណេះវិញ បន្ទាប់ទទួលបានការសរសើរនេះហើយ នាងក៏បានចេញមុខសរសេរតបវិញថា «អរគុណប្អូនស្រី Lin Bebe ដែលបានគាំទ្របង កុយ និងបង តាមពិតការសម្តែងរបស់ពួកបង តែងតែចង់ឲ្យមហាជនសប្បាយ តែសប្បាយជាមួយពាក្យល្អៗ។ អរគុណប្អូនស្រីអស់ពីចិត្ត បងនឹងខំរកអ្វីល្អៗ មកសម្តែងបន្តទៀត ជួយគាំទ្របន្ត ពួកខ្ញុំកាន់តែមានទឹកចិត្ត Love you all..!»។
សូមបញ្ជាក់ថា នេះមិនមែនទើបតែជាលើកទី១ទេ សម្រាប់តារាកំប្លែងនាយ កុយ និងអ្នកនាង ខាត់ សុឃីម ដែលទទួលបាននូវពាក្យសម្តី កោតសរសើរពីសមត្ថភាព និងទេពកោសល្យកំប្លែងក្នុងន័យអប់រំ ដល់ទស្សនិកជន និងយុវជនក្នុងសង្គមបច្ចុប្បន្ន ដោយប្រើសម្តីសមរម្យមានសីលធម៌នោះ ព្រោះកន្លងមកក៏ធ្លាប់មានការ លើកសរសើរផងដែរ ពីការគោរពពេលវេលា ក្នុងការសម្តែង ផ្ទុយពីតារាថ្មីៗ ដែលមានឈ្មោះល្បីភ្លាម ចាប់ផ្ដើមតម្លើងឫក មើលស្រាលទៅលើពេលវេលា និងការងារនោះឡើយ៕
ផ្តល់សិទ្ធដោយ ៖ ហ្វ្រេសញូវអាស៊ី
តារា ដែលមើលច្រើន
