ភ្នំពេញ៖ បុរសម្នាក់បាន ស្លាប់ភ្លាមៗ នៅកន្លែងកើតហេតុ ក្រោយពេលដែល គេសង្ស័យថា បាន
លោតសម្លាប់ខ្លួន ពីលើផ្សារទំនើបសូរិយា ក្នុងខណ្ឌដូនពេញ កាលពីវេលាម៉ោង ៩៖១០នាទី យប់
ថ្ងៃទី៥ ខែមីនា ឆ្នាំ២០១៣ នេះ ដោយមិនទាន់ដឹង មូលហេតុ នៅឡើយទេ។ សេចក្តីរាយការណ៍
ពីកន្លែងកើតហេតុ បានឲ្យដឹងថា គេមិនទាន់ស្គាល់ អត្តសញ្ញាណ ជនរងគ្រោះ នៅឡើយទេ ខណៈ
សមត្ថកិច្ច បានទៅជួយអន្តរាគមន៍ ប៉ុន្តែមិនឲ្យអ្នកកាសែត យកព័ត៌មានឡើយ។
សេចក្តីរាយការណ៍ បានបន្តទៀតថា នៅម៉ោងកើតហេតុ ស្រាប់តែមានបុរសម្នាក់ ស្លៀកខោ ខ្មៅជើង
វែង តែគ្មានអាវ អាយុជាង៣០ឆ្នាំ បានធ្លាក់ពីលើអគារ ផ្សារទំនើបសូរិយា បណ្តាលឲ្យស្លាប់ភ្លាមៗ តែ
មិនទាន់ដឹងមូលហេតុ នៅឡើយទេ ខណៈសមត្ថកិច្ច មិនបានផ្តល់ ព័ត៌មាននៅឡើយ ។
យ៉ាងណាក៏ដោយ គេមិនទាន់ដឹងថា តើជនរងគ្រោះពិតជាបានលោត ពីលើអគារមែនឫ មួយជាអំពើ
ឃាតកម្ម នោះឡើយ។ ក្រោយកើតហេតុ សមត្ថកិច្ច មូលដ្ឋាន និងសមត្ថកិច្ចជំនាញ បានចុះទៅពិនិត្យ
សព និងនៅកន្លែងកើតហេតុ រកមូលហេតុពិត៕
ផ្តល់សិទ្ធិដោយ៖ ដើមអំពិល