CamNews

(ភ្នំពេញ)៖ «ម្រេចកំពត» ត្រូវបានសហភាពអឺរ៉ុប ចុះបញ្ជីសម្គាល់ភូមិសាស្រ្ត។ នេះជាផលិតផលដំបូងគេរបស់កម្ពុជា ដែលត្រូវបានសហភាពអឺរ៉ុប ចុះបញ្ជីសម្គាល់អត្តសញ្ញាណ ដើម្បីបង្ការការក្លែងបន្លំ ដែលអាចបណ្ដាលឲ្យមានការរំលោភ បំពានកេរ្តិ៍ឈ្មោះ របស់ម្រេចកំពត។

យោងតាមសេចក្តីប្រកាសព័ត៌មាន របស់សហភាពអឺរ៉ុប ដែល Khmertalking ទើបទទួលបាននៅថ្ងៃទី០២ ខែមីនា ឆ្នាំ២០១៦នេះ បានឲ្យដឹងថា ការចុះបញ្ជីផលិតផល​សម្គាល់ភូមិសាស្ត្រ​ លើកដំបូងបំផុត​សម្រាប់ផលិតផល របស់​ប្រទេសកម្ពុជានៅលើទីផ្សា​ សហភាពអឺរ៉ុប ដែលបានបង្កើតឡើង​ដោយប្រទេសចំនួន២៨ នឹងជួយពង្រីកទីផ្សារ «ម្រេចកំពត» ទៅអ្នកប្រើប្រាស់ច្រើន ជាង ៥០០លាននាក់។

សេចក្តីប្រកាសព័ត៌មានដដែលនេះ បន្តថា «ម្រេចកំពត ឬ Poivrede Kampot» នឹងទទួលបានអត្ថប្រយោជន៍ ​ពីការការពារកម្រិត​ខ្ពស់បំផុត​ លើទីផ្សារអឺរ៉ុប ជាពិសេសប្រឆាំងការចម្លង និង កែច្នៃជៀស​វាង​ ​មិនឲ្យមានការក្លែងបន្លំ ដែលអាចនឹង​បណ្ដាលឲ្យមានការ រំលោភ​បំពានកេរ្តិ៍ឈ្មោះ របស់ម្រេចកំពតនេះ។ វាជាផលិតផលសម្គាល់​ភូមិសាស្ត្រ មិនមែនជាផលិតផល​របស់សហភាពអឺរ៉ុបទី២០ ដែលទទួល​បាន ការការពារស្របច្បាប់​ពីសហភាពអឺរ៉ុប ក្នុងបទប្បញ្ញត្តិ ១១៥១/២០១២ ដែលបានចូលរួមជាមួយ​ផលិតផល ល្បីល្បាញ​ជាច្រើន​ផ្សេងទៀត។

សហភាពអឺរ៉ុប បានអះអាងថា ការចុះឈ្មោះ នៃស្លាកសញ្ញាសម្គាល់ភូមិសាស្រ្ត របស់ផលិតផលប្រទេសកម្ពុជាមួយនេះ បានជួយត្រួសត្រាយផ្លូវ សម្រាប់ការចុះបញ្ជី​លើផលិតផល សំគាល់​ភូមិសាស្រ្ត ​របស់ប្រទេសកម្ពុជា​បន្ថែមទៀត ហើយរឿង ដ៏ជោគជ័យមួយនេះ នឹងអាចជួយឲ្យមានការផ្លាស់ប្តូរ​ ដល់ផលិតផលកម្ពុជា ដែលមាន​គុណភាពខ្ពស់ ផ្សេងៗទៀត។

សូមបញ្ជាក់ថា សូចនាករភូមិសាស្រ្ត (GIs) គឺជាប្រភេទកម្មសិទ្ធិបញ្ញាមួយ ដែលកំណត់នូវអត្តសញ្ញាណ របស់ផលិតផល មួយដែលមានប្រភពមកពីតំបន់ ឬ​ប្រទេសមួយជាក់លាក់ ក៏ដូចជាទទួល​បាន តាមរយៈវិធីសាស្រ្ត​ផលិតកម្ម មួយច្បាស់លាស់ផងដែរ។ កេរ្តិ៍ឈ្មោះរបស់ផលិតផល សម្គាល់ភូមិសាស្រ្តមួយ ដែលផ្តោតសំខាន់ ទៅលើគុណភាព ឬភាព ត្រឹមត្រូវរបស់ផលិតផលនោះ ​ត្រូវបានផ្សារ​ភ្ជាប់​យ៉ាងជិតស្និទ្ធ​ទៅនឹងប្រភព នៃភូមិសាស្ត្រដើមរបស់វា។ សូចនាករភូមិសាស្ត្រ មានសារៈសំខាន់ខ្លាំងណាស់ នៅក្នុងសហភាពអឺរ៉ុប (EU) ដែលជាកន្លែងមានប្រវត្តិសម្បូរ ទៅដោយផលិតកម្ម កសិកម្ម ឯកទេស និង ផលិតផលក្នុងស្រុក ដែលមានផលិតផលល្បីៗ ជាច្រើនទៀត បានផ្សារភ្ជាប់យ៉ាងជិតស្និទ្ធ ទៅនឹងកន្លែងដែលជាប្រភពដើម របស់ពួកគេ មានដូចជា កាហ្វេកូឡុំប៊ី ឬ ស្រាសាំប៉ាញ ឬ តែដាជែលលីង ជាដើម។

សូចនាករភូមិសាស្រ្ត (GIs) គឺមានសារៈសំខាន់ណាស់ សម្រាប់ប្រទេសកំពុងអភិវឌ្ឍន៍។ សូចនាករ ភូមិសាស្រ្ត (GIs) អាចទទួលបានការពារ និង​អភិរក្សនូវកម្មសិទ្ធិបញ្ញា ដែលទាក់ទងទៅនឹងវប្បធម៌ ប្រពៃណីទំនៀមមទម្លាប់ ភាពសម្បូរបែប នៃភូមិសាស្ត្រ និង វិធីសាស្ត្រនៃការផលិតរបស់ផលិតផលនោះ។ នៅក្នុងប្រទេសកម្ពុជា តាមរយៈកិច្ច​សហប្រតិបត្តិការ អភិវឌ្ឍន៍ សហភាពអឺរ៉ុប បានគាំទ្រ​សមាគម ក្នុងការផ្សព្វផ្សាយម្រេច​កំពត ក្នុងកិច្ចខិតខំប្រឹងប្រែង​របស់ពួកគេ ដើម្បីលើកកម្ពស់ និងធ្វើទីផ្សារផលិតផល ដែលមានគុណភាពខ្ពស់ មួយនេះ។

ធាតុសំខាន់នៅក្នុងគោលនយោបាយ គុណភាពផលិតផលរបស់ សហភាពអឺរ៉ុប គឺការចុះបញ្ជីជាផលិតផល សម្គាល់ភូមិសាស្ត្រ ដែលនឹងផ្តល់តម្លៃបន្ថែម ទៅលើកេរ្តិ៍ឈ្មោះ​របស់ម្រេចកំពត ក៏ដូចជាជួយ​ប្រយុទ្ធ​ប្រឆាំង ទៅនឹងការក្លែងបន្លំផលិតផល ព្រមទាំងជួយបង្កើនភាពលេចធ្លោរ របស់វានៅលើទីផ្សារ ផលិតផល នៅក្នុងសហភាពអឺរ៉ុប ក៏ដូចជានៅ​ប្រទេសកម្ពុជា និងនៅលើទីផ្សារដទៃទៀត ដោយ​សារតែផលិតផលនេះ មានបិទស្លាកសញ្ញាបញ្ជាក់គុណភាព ភីជីអាយ (PGI) នៅលើវា ចាប់ពីពេលនេះទៅ៕

ផ្តល់សិទ្ធដោយ ៖ ហ្វ្រេសញូវអាស៊ី