CamNews

ភ្នំពេញ៖ តារាសម្តែង និងជាតារាបង្ហាញម៉ូដ រាងខ្ពស់ស្រឡះ ថ្ពាល់ខួច កញ្ញា ស៊ិន រតនា ចូលដល់ឆ្នាំ ២០១៤នេះ ហាក់ដូចជាពុំសូវឃើញវត្តមាន លេចមុខតាមរយៈការសម្តែង ខ្សែភាពយន្តឲ្យបណ្តាផលិតកម្ម និងតាមស្ថានីយទូរសទ្សន៍ណាមួយ ដូចកាលពីបណ្តាឆ្នាំកន្លងមកនោះឡើយ។ ទន្ទឹមនឹងនេះ ក៏មានការលើកឡើងថា រតនា គ្រោង បញ្ចប់អាជីពសម្តែងសិល្បៈ ចាប់អាជីពផ្សេងទៀតផង។

ជួបជាមួយគេហទំព័រ Looking TODAY តាមទូរស័ព្ទ នារសៀលថ្ងៃទី១៣ ខែមីនា ឆ្នាំ២០១៤ នេះតារាសម្តែង សម្តីផ្អែមកញ្ញា ស៊ិន រតនា បាននិយាយលាយឡំនឹងសំណើចថា "ចាស់ បង…! រាល់ ថ្ងៃនេះ ខ្ញុំមានការរវល់ច្រើន សម្រាប់ការងារខាងក្រៅ។ ចំណែកឯអាជីពសិល្បៈ ការថតសម្តែងខ្សែភាពយន្ត គឺបានផ្អាកមួយរយៈមកហើយ ដោយសាររវល់ការងារផ្ទាល់ខ្លួនពេក..!"។

តារាសម្តែងស្រីរូបស្រស់ មានភាពរួសរាយ កញ្ញា ស៊ិន រតនា បានបន្តថា "ខ្ញុំផ្អាកពីសិល្បៈបានជិត៥ ខែមកហើយ ព្រោះ រវល់ការងារខាងក្រៅច្រើនជាង"។ នៅពេលសួរថា តើ រតនា ឈប់ពីសិល្បៈទាំងស្រុងមែនទេ? ជាចម្លើយ ត្រូវបាន តារាស្រី ស៊ិន រតនា ប្រាប់មកវិញថា "អត់ទេ..! ខ្ញុំគ្រាន់តែផ្អាកទទួលយក ការចេញសម្តែងខ្សែភាពយន្ត មួយរយៈសិនតែប៉ុណ្ណោះ។ ម្យ៉ាងទៀត ដោយសារសព្វថ្ងៃនេះ ភាគច្រើន គឺរវល់ចេញធ្វើពិធីការិនី នៅតាមបណ្តាខេត្ត និងត្រូវមើលការខុសត្រូវ នៅក្នុងក្រុម Sun Super Model ទៀតផង ទើបមិនសូវទទួលថតរឿង.."។

កញ្ញា ស៊ិន រតនា បានបន្ថែមថា ឥឡូវនេះនាងរវល់ខ្លាំងណាស់ ចំពោះការងារផ្ទាល់ខ្លួនខាងក្រៅ។ បើផ្អែកតាមសម្តីខាងលើ អាចលើកអាចសន្និដ្ឋានបានថា រតនា បច្ចុប្បន្ន អាចនឹងមាន មុខរបររកស៊ីផ្ទាល់ខ្លួន ខាងក្រៅដោយស្ងាត់ៗ ទើបគ្មាននណាម្នាក់ បានដឹងដូច្នេះ។ ម្យ៉ាងទៀត ការបើករបរថ្មីនេះ អាចជាគំនិត គូស្នេហ៍របស់នាងនៅបារាំង។

ប៉ុន្តែបើទោះបីមាន ការជជីកសួរដេញដោលចង់ដឹង ពីរឿងនេះយ៉ាងណាក្តី ក៏កញ្ញា ស៊ិន រតនា បាននិ យាយបដិសេធន៍ហាក់ដូចជា មានការលាក់លៀម នៅត្រង់ចំណុចនេះ ថា "មានមកពីណា ..អត់មានផងហ្នឹង?"។ រវល់ខ្លាំងនោះ គឺ ដោយសារត្រូវមើលការខុសត្រូ វគ្រប់គ្រងក្រុមតារាបង្ហាញ ម៉ូដ Sun Super Model និង ធ្វើពិធីការិនី ក្នុងកម្មវិធីរបស់ក្រុមហ៊ុន ផ្សព្វផ្សាយផលិតផល តាមបណ្តាខេត្ត។

ផ្តើមចូលក្រឡូកនៅក្នុង វិស័យសិល្បៈតាំងពីដំបូង កញ្ញា ស៊ិន រតនា ត្រូវបានមហាជនទទួលស្គាល់ ជាតារាដែលមានឱកាសច្រើន ក្នុងការបង្ហាញមុខ តាមរយៈការសម្តែងឈុតខារ៉ាអូខេពាណិជ្ជកម្ម ការសម្តែងជាខ្សែភាពយន្ត និងធ្វើជាពិធីការិនី តាមបណ្តាកម្មវិធីមួយចំនួនទៀតផង៕

ផ្តល់សិទ្ធដោយ ៖ ដើមអម្ពិល