CamNews

ភ្នំពេញៈ កន្លងមកទស្សនិកជន ធ្លាប់តែឮព័ត៌មានថា តារាសម្ដែង តារាចម្រៀងស្រី មានអ្នកសម្បូរទ្រព្យ តាមហួងហែង និងទិញសម្ភារៈទំនើបៗ ផ្គាប់ចិត្ត ដើម្បីយកធ្វើជាស្រីកំណាន់ ឬធ្វើជាស្រីលួចលាក់ក្រោយខ្នងប្រពន្ធ។ ដោយឡែក ពេលនេះព័ត៌មានបែបនោះ បែរជាត្រូវបោកបក់មកប៉ះលើ កំលោះសង្ហា ជាតារាសម្តែង លោក ហ៊ុន សត្យា ដោយលេចឮថាថ្មីៗនេះ លោក ទើបតែត្រូវបានសង្សារបណ្តូលចិត្ត ជាអ្នកមានទ្រព្យ ទិញរថយន្តស៊េរីទំនើប ផ្គាប់ចិត្តលោកទៅវិញ ។

កាលពីពេលថ្មីៗកន្លងទៅ មានព័ត៌មានចចាមអារ៉ាម លេចឮល្ហិចល្ហៀងថា តារាប្រុស ជាអតីត Freshie Boy ប្រចាំឆ្នាំ២០០៨ លោក ហ៊ុន សត្យា លួចមានទំនាក់ទំនងស្នេហា ក្រៅសាច់រឿង ជាមួយនារីអាណិកជនខ្មែរម្នាក់ ដែលគេដឹងថា ជា នារីសម្បូរលុយមានជំនួញរាប់ម៉ឺនដុល្លារ ។ ចំណងស្នេហ៍មួយនេះ បានកើតឡើង ក្នុងរយៈពេលប្រមាណ១-២ឆ្នាំនេះឯង ។ បន្ទាប់ពីលោកចាប់ផ្តើម មានស្នេហាមួយនេះភ្លាម ស្ថានភាពរស់នៅ របស់លោក ក៏កាន់តែមានភាពហ៊ឺហាទ្វេដង ប្រើប្រាស់របស់របរទំនើបៗ ជិះរថយន្តថ្មី សម្ញែងគេឯង ប្លែកខុសពីពេលមុនៗ ។

ពាក់ព័ន្ធនឹងការលេចឮ បែបនេះ លោក ហ៊ុន សត្យា បានប្រាប់ LookingTODAY ឲ្យដឹងតាមទូរស័ព្ទ នៅថ្ងៃទី ០២ ខែមេសា ឆ្នាំ ២០១៤នេះថា លោកពិតជាមានការភ្ញាក់ផ្អើល និងហួសចិត្តខ្លាំងណាស់ នៅពេលមានព័ត៌មានបែបនេះ លេចឮមកលើរូបលោក ទាំងមិនមែនជាពិត។ តែទោះជាយ៉ាងណា លោកក៏ពេញចិត្ត ក្នុងការបកស្រាយការពិត ទៅដល់ទស្សនិកជន ឲ្យបានដឹងដែរ ។

លោក ហ៊ុន សត្យា បានប្រាប់ឲ្យដឹងទៀតថា "ខ្ញុំទទួលស្គាល់ថា កន្លងមកខ្ញុំជិះតែម៉ូតូទេ ព្រោះថាអត់មាន រថយន្តជិះដូចគេ ដោយ សារតែជីវភាពខ្ញុំ មិនសូវល្អ គ្មានភាពហ៊ឺហាអ្វីឡើយ។ តែពេលនេះ ការងារខ្ញុំមមាញឹក និងអាចរកចំណូលបានច្រើន ជាងមុនឆ្ងាយ ដោយសារខ្ញុំមាន ជំនាញមួយទៀត ក្រៅពីសិល្បៈ គឺបង្ហាត់តៃក្វាន់ដូ ដល់សិស្សតាមផ្ទះ។ ដូច្នេះហើយបានជាខ្ញុំ សន្សំលុយទិញ រថយន្តនេះជិះតែម្តងទៅ ហើយវាមានតម្លៃ ជាង១ម៉ឺនដុល្លារ" ។

តារាសម្តែង ហ៊ុន សត្យា បានប្រាប់ឲ្យដឹងបន្ថែមទៀតថា ចំណូលដែលលោករកបាននេះ មិនមែនបានមកពីគូស្នេហ៍ណាម្នាក់ ជួយឧបត្ថម្ភនោះទេ។ ដូច្នេះលោកសង្ឃឹមថា ក្រោយពីធ្វើការបកស្រាយរួច ទស្សនិកជន នឹងលែងយល់ច្រឡំតទៅទៀត ព្រោះថាអ្វីៗដែលលោកមានសព្វថ្ងៃ គឺជាញើសឈាមផ្ទាល់ ហើយក៏មិនទទួលយកការឧបត្ថម្ភ ពីអ្នកណានោះឡើយ ៕

ផ្តល់សិទ្ធដោយ ៖ ដើមអម្ពិល