ព្រះសីហនុ ៖ គ្រោះថ្នាក់ចរាចរណ៍ ដ៏គួរឲ្យរន្ធត់មួយទៀត បានកើតឡើង នាថ្ងៃចុងក្រោយ នៃព្រះរាជពិធី បុណ្យអុំទូក នៅខេត្តព្រះសីហនុ បណ្តាលឲ្យ មានអ្នករង របួសធ្ងន់ ស្រាលចំនួន៧នាក់ ក្នុងនោះ របួសធ្ងន់៣នាក់ ហើយ មានជនជាតិ បរទេសចំនួន៣នាក់ផងដែរ ។
យ៉ាងណាក៏ដោយ គ្រោះថ្នាក់ ចរាចរណ៍ ខាងលើមិនបណ្តាលឲ្យ នរណាម្នាក់ស្លាប់នោះឡើយ ប៉ុន្តែ រថយន្តទាំង៤គ្រឿង របស់ជនរងគ្រោះ រងការខូតខាតយ៉ាងខ្លាំង។ មន្រ្តីនគរបាល ចរាចរណ៍ នៃស្នងការដ្ឋាន នគរបាលខេត្តព្រះសីហនុ បានឲ្យដឹងថា គ្រោះថ្នាក់ចរាចរណ៍ ខាងលើនេះ បង្កឡើងដោយរថយន្ត កុងតឺន័រ មួយគ្រឿង បានបើកបុករះរថយន្ត ចំនួន៤គ្រឿង កាលពីវេលាម៉ោង ៧យប់ ថ្ងៃទី៧ ខែវិច្ឆិកា ឆ្នាំ២០១៤ ស្ថិតនៅលើផ្លូវជាតិលេខ៤ ក្នុងភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ ។
មន្រ្តីនគរបាលចរាចរណ៍ បានឲ្យដឹងទៀតថា រថយន្តបង្កម៉ាក កុងតឺន័រពណ៌ខៀវ Freight Liner ពាក់ស្លាកលេខ ភ្នំពេញ3A.1283 ធ្វើដំណើរពីក្រុងព្រះសីហនុ ពេល ដល់ចំណុចខាងលើ បានបុករថយន្ត បន្តបន្ទាប់ចំនួន៤គ្រឿង រួមមាន ទី១-ម៉ាកត្រាយតុន ពាក់ស្លាកលេខ ព្រះសីហនុ 2A.4983 មានអ្នកជិះ៥នាក់ ទី២-ម៉ាកកាមរី ពាក់ស្លាកលេខ ភ្នំពេញ 2L.4401 មានអ្នកជិះ២នាក់ ទី៣-កាមរី ពាក់ស្លាកលេខ ភ្នំពេញ 2Y.1647 មានអ្នកជិះ៣នាក់ និងទី៤-ម៉ាក កាមរី ពាក់ស្លាកលេខភ្នំពេញ 2K.3808 មានអ្នកជិះ៣នាក់ ។
មន្រ្តីនគរបាល បានបន្តទៀតថា គ្រោះថ្នាក់ចរាចរណ៍ខាងលើនេះ បណ្តាលឲ្យរងរបួស៧នាក់ ស្រីម្នាក់ (ជនបរទេស៣នាក់) ក្នុងនោះរបួសធ្ងន់៣នាក់ ទី១-ឈ្មោះ Poliewulski Dariusz Zdzislaw ភេទប្រុស ជនជាតិស្វីស ទី២-ឈ្មោះ Choporkon Stantin Varbnov ភេទប្រុស ជនជាតិ អាមេរិក និងទី៣-ឈ្មោះ ញឹម រ៉ា ភេទប្រុស អាយុ២៨ឆ្នាំ ជនជាតិខ្មែរ ចំណែក៤នាក់ទៀត (បរទេសម្នាក់) រងរបួសស្រាល ។
ជនរងគ្រោះទាំងអស់ ត្រូវបានសមត្ថកិច្ច ដឹកយកទៅសង្គ្រោះ នៅមន្ទីរពេទ្យ ភ្លាមៗ ក្រោយកើតហេតុ។ ដោយឡែក រថយន្ត ទាំង២គ្រឿង ត្រូវបានយកទៅរក្សាទុក នៅការិយាល័យ ចរាចរណ៍ផ្លូវគោក ដើម្បីរង់ចាំការ ដោះស្រាយបន្តទៀត តាមផ្លូវច្បាប់៕
