CamNews

ភ្នំពេញៈ ទស្សនិកជន ស្ទើរតែភ្លេចឈ្មោះ តារាសម្តែង កែវ ស្រីនិច្ច បាត់ទៅហើយ ក្រោយពីនាងបានឈប់ពីសិល្បៈ អស់រយៈពេលជាង៤ឆ្នាំ ក្រោមហេតុផលថា មានការនឿយហត់ខ្លាំង ពីអាជីពសម្តែង ដែលត្រូវថតហាលថ្ងៃហាលខ្យល់ ខូចសាច់ខូចស្បែក។ ប៉ុន្តែការពិតត្រូវ បានទម្លាយចេញនៅពេលថ្មីៗនេះ ខណៈដែលរូបថតជាច្រើនសន្លឹក ត្រូវបានបង្ហោះឡើង ក្នុង Account Facebook របស់នាង បានបញ្ជាក់យ៉ាងច្បាស់ថា កែវ ស្រីនិច្ច មានប្តី និងកូនប្រុសម្នាក់រួចទៅហើយ ។
រូបថតជាច្រើនសន្លឹក ត្រូវបានអតីតតារាសម្តែងស្រីស្រស់ អ្នកនាង កែវ ស្រីនិច្ច បង្ហោះនៅពាសពេញ បណ្តាញទំនាក់ទំនងសង្គម ធ្វើឲ្យ Friend នៅក្នុង Facebook របស់នាងជាច្រើន មានការភ្ញាក់ផ្អើល និងងឿងឆ្ងល់ជាខ្លាំងថា តារារូបនេះ បានលួចទៅរៀបការ មានគ្រួសារ តាំងពីពេលណាទេ ទើបតែពេលនេះនាង បានទម្លាយអាថ៌កំបាំងស្នេហា ជាមួយស្វាមីវ័យស្របាលគ្នា រួមជាមួយកូនប្រុសម្នាក់ ដ៏ស្រស់ស្អាត ក្នុងស្ថានភាពដ៏សាមញ្ញមួយ មិនខ្វល់ពីការងារសិល្បៈ និងមហាជនដែលធ្លាប់ គាំទ្រនាងឡើយ។

កែវ ស្រីនិច្ច គឺជាអតីតបវរកញ្ញាឯក ជាប់លេខ១ សំបកកង់រថយន្ត Bridgerstone ក្នុងឆ្នាំ២០០៨ ហើយបានសម្រេចចិត្ត បញ្ឈប់ការងារសិល្បៈ របស់ខ្លួន ទាំងពាក់កណ្តាលទី និងកំពុងតែមាន យីអ៊ុនឡើងក្រឺតៗ ក្នុងរយៈពេល២ឆ្នាំបន្ទាប់ ធ្វើឲ្យទស្សនិកជន មានចម្ងល់ និងគិតថា ហេតុអ្វីនាងបាត់មុខពី សិល្បៈយ៉ាងតក់ក្រហល់ ក្រោយពីនាងថតចប់ ខ្សែភាពយន្តរឿង “នាងឈូកស” បានបាត់ស្ងាត់សូន្យឈឹង លែងឃើញមាន នៅក្នុងឈុតខារ៉ាអូខេ និងខ្សែភាពយន្ត ទៀតហើយ។

ទាក់ទងនឹងចម្ងល់គ្មានចម្លើយ អស់រយៈពេលជាង៤ឆ្នាំនេះ ទីបំផុតត្រូវបានម្ចាស់សាម៉ីខ្លួន អ្នកនាង ស្រីនិច្ច បានទម្លាយអាថ៌កំបាំងនោះ ជាសាធារណៈ គឺនាងបានទៅសម្ងំសាងគ្រួសារ មានភាពកក់ក្តៅ មានសុភមង្គលជាមួយស្វាមី ។ ពេលនេះនាងថែមទាំងទទួល បានចំណងដៃ អាពាហ៍ពិពាហ៍កូនប្រុស ម្នាក់ថែមទៀតផង ។

គេនៅចាំបានថា ក្នុងអំឡុងពេលឈប់ ពីសិល្បៈភ្លាមៗ មានព័ត៌មានលេចឮ ជាបន្តបន្ទាប់ ដោយមានមតិខ្លះលើកឡើងថា នាងឈប់ពីសិល្បៈទៅសម្ងំ រស់នៅយ៉ាងសុខស្រួល ជាមួយបុរសអ្នកមានទ្រព្យសម្បត្តិស្តុក។ មានមតិខ្លះទៀតលើកឡើងថា នាងទៅសម្ងំធ្វើ ជាថៅកែស្រី បើកហាងលក់មាស ប៉ុន្តែទាក់ទងនឹងរឿងនេះ ត្រូវបានក្រុមគ្រួសារ នាងបង្ហើប ឲ្យដឹងពីមូលហេតុថា នាងឈប់ពីសិល្បៈ ដោយសារតែមាន ការហត់នឿយខ្លាំងពេក ។ ប៉ុន្តែទីបំផុតអ្វីគ្រប់យ៉ាង ត្រូវបានសាបរលាប ទៅវិញប្រៀបដូច ជាអំបិលត្រូវទឹក ក្រោយពីនាង រំលេចរូបថតប្ដី និងកូនប្រុសជាសាធារណៈ ៕

ផ្តល់សិទ្ធដោយ ៖ ដើមអម្ពិល