CamNews

ស្វែងរកកំរិតខ្ពស់
ព័ត៌មានជាតិ 

ផ្សារកោះកុងថ្មីដែលមាន​២៧៤តូប បានបើក​សម្ពោធជាផ្លូវការ​នៅថ្ងៃនេះ ដើម្បីចូលរួមអភិវឌ្ឍ​ពាណិជ្ជកម្ម​ក្នុង

(កោះកុង)៖ ផ្សារកោះកុងថ្មី ដែលវិនិយោគដោយវិនិយោគិនខ្មែរ បានបើកសម្ពោធជាផ្លូវការ នៅព្រឹកថ្ងៃទី២៧ ខែធ្នូ ឆ្នាំ២០១៥នេះ ជាមួយនឹងតូបលក់ដូរប្រមាណ ២៧៤តូប ដើម្បីអភិវឌ្ឍពាណិជ្ជកម្ម ក្នុងតំបន់ និងព្រំដែនកម្ពុជាថៃ។ ពិធីសម្ពោធផ្សារថ្មីនេះ ត្រូវបានធ្វើឡើងក្រោមការចូលរួមពីសំណាក់ លោក ប៊ុន លើត អភិបាលខេត្តកោះកុង រួមទាំងអាជីវករ ពាណិជ្ជករ ជាច្រើនរូប។

លោក ហង្ស តារា ប្រធានគ្រប់គ្រងផ្សារកោះកុងថ្មី បានថ្លែងនៅក្នុងពិធីសម្ពោធផ្សារនេះថា ការបើកដំណើរការផ្សារនេះ ត្រូវបានធ្វើឡើងបន្ទាប់ពីពិនិត្យឃើញពី ភាពរីកចំរើនរបស់​ខេត្តកោះកុងដែលជា​ខេត្តជាប់ព្រំដែន​ថៃ ទាំងឧស្សាហកម្ម សិប្បកម្ម ពាណិជ្ជកម្ម និងសេវាកម្មផ្សេងៗ ហេតុដូច្នេះហើយគំនិតបង្កើត ផ្សារកោះកុងថ្មីនេះ គឺដើម្បីចូលរួមចំណែកក្នុងការអភិវឌ្ឍខេត្ត និងជួយសម្រួល​ដល់អាជីវករ​ដែលខ្វះកន្លែងលក់ដូរ ទទួលបានរបរចិញ្ចឹមជីវិត ។

ផ្សារកោះកុងថ្មីនេះ មានតូបចំនួន២៧៤តូប ក្នុងនោះមានតូបលក់របស់របរចំនួន៣៧តូប តូបលក់សម្លៀកបំពាក់៣៤តូប តូបលក់ចាបហួយ៤៨តូប តូបលក់អង្ករ១៦តូប តូបលក់ផ្លែ​ឈើនិង​បន្លែ៥៨តូប តូបលក់គ្រឿងសមុទ្រ និងសាច់ជ្រូក៦៥តូប និងតូបលក់ចំណីអាហារចំនួន១៦តូប។ ផ្សារកោះកុងថ្មីបានចាប់ផ្តើមសាងសង់ កាលពីខែកុម្ភៈ ឆ្នាំ២០១៥ និងបានបញ្ចប់​រួចរាល់ជាស្ថាពរ។

លោក ប៊ុន លើត អភិបាលខេត្តកោះកុង ក៏បានកោតសរសើរដល់កិច្ចខិតខំប្រឹងប្រែងរបស់ម្ចាស់ផ្សារកោះកុងថ្មីនេះ រហូតដល់ផ្សារនេះ​ បានលេចចេញជារូបរាងផងដែរ។

សូមជំរាបថា នៅក្នុងឱកាសសម្ពោធផ្សារកោះកុងថ្មី ក្រុមហ៊ុនបានប្រកាសឱ្យអាជីវករទាងអស់ដែលខ្វះកន្លែងលក់ដូរ ជាពិសេសអ្នកលក់ត្រី បន្លែ និងសាច់ ចូលទៅលក់ដូរ នៅក្នុងផ្សារកោះកុងថ្មីនេះ ដោយមិនតម្រូវឱ្យបង់​ប្រាក់រយៈពេល១ឆ្នាំផងដែរ៕

ផ្ដល់សិទ្ធដោយ៖ ហ្វ្រេសញ៉ូវអាស៊ី


Tags: National news,  local news,  social news,  Cambodia,  Khmer,  Asia,  Phnom Penh

ព័ត៌មានជាតិ ដែលមើលច្រើន

ព័ត៌មានដែលមើលច្រើន